Валюта бағамы: $ 412.1 454.34 5.82 ¥ 57.62

ҚазМұнайГаз: Шығындарды оңтайландыру басшылықтың жалақысынан басталды

Жаһанға жайылған коронавирус пандемиясы дағдарыс жағдайындағы әлемдік экономиканың ахуалын одан әрі күрделендіре түсті. Әлемдік шаруашылық бастан өткеріп жатқан осынау қиындықтар мен сын-қатерлер кім-кімнің де болсын ойға алған істері мен мақсат-межелеріне түзетулер енгізуде.

Осы орайда Орталық коммуникациялар қызметі алаңында өткен брифинг барысында «ҚазМұнайГаз» ҰК АҚ (ҚМГ) адами ресурстарды басқару жөніндегі басқарушы директоры Дәулетжан Хасанов дағдарысқа қарсы стратегияны іске асыру аясында компанияда атқарылып жатқан жұмыс, оның ішінде кадрлық саясат мәселелері туралы айтып берді.
Спикер атап өткендей, биыл бірінші тоқсанның нәтижесі бойынша компанияның табысы өткен жылдың есепті кезеңімен салыстырғанда 3 есеге қысқарған, ал кейбір еншілес кәсіпорындар шығынға тап болған. Осыған байланысты қаржылық жағдайды тұрақтандыру және әлемдік нарықтағы жағдайдың теріс әсерін төмендету үшін «ҚазМұнайГаз» компаниясында дағдарысқа қарсы стратегия жасақталуда. Стратегия компанияға шығындарды азайтуға және дағдарыстан кейінгі кезеңде тиімді әрекет етуіне мүмкіндік береді. Атап айтқанда, компания бизнес-үдерістерді оңтайландыруды жүргізуде және дағдарыс кезінде өзектілігін жоғалтатын көптеген жобалар мен іс-шараларды іске асыру жөніндегі жоспарларын қайта қарастыруда.
Дәулетжан Хасановтың айтуы бойынша, шығындарды оңтай­ландыру бірінші кезекте басшылық­тың жалақысынан басталды. Компанияда 12 мамырда лауазымдық жалақылардың жаңа жүйесі бекі­тілді. Ол басқарма төрағасы мен орынбасарлардың жалақысын 30%-ға қысқартуды көздейді. Сонымен қатар бас­қа­рушылық лауазымдарды қысқарту және қызметкерлерді төменгі лауазымдарға тағайын­даумен байланысты орта буын басшыларының жалақысы 20%-ға дейін төмендейді. Қатардағы қызметкерлердің жала­қысы бұрынғы деңгейде сақталады. Нәти­жесінде 2020 жылы сыйақы мен бо­нустардан бас тартуды ескергенде, ҚМГ орталық аппаратының басқа­­рушы қызметкерлерінің кірісі 50%-дан астамға азаяды. Бұған дейін хабарланғандай, дағдарысқа қарсы стратегияны іске асыру аясында ҚМГ орталық аппаратындағы қызметкерлер санын 34%-ға, яғни 729-дан 480 адамға дейін оңтайландырады.
Дәулетжан Хасановтың айтуы бойынша, босатылатын қызметкерлердің 90%-ы «ҚазМұнайГаз» жүйесінен кетеді. Еңбек нарығындағы жағдайды ескере отырып, «Самұрық-Қазына» қорының тапсырмасы бойынша қызметкерлерді әлеуметтік-жауапты босату бағдарламасы әзірленді. Ол өтемақылық төлем жиынтығын және аутплейсмент бағдарламасын қамтиды.
Өтемақылық төлем жиынтығы: 3 айлық жалақы мөлшеріндегі біржолғы төлемді; табысынан айырылғанына байланысты өтемақы ретінде 6 ай бойы қаржылық қолдауды; 2021 жылғы ақпан айына дейін компания есебінен медициналық сақтандыру қызметтерін пайдалану құқығын қамтиды.
Өз кезегінде «ҚазМұнайГаз» аутплейсмент бағдарламасы осы саладағы кеңесшілердің қатысуымен бірқатар шараны қарастырады. Кеңесшілер қызметкерлерге өздерінің мықты тұстарын, еңбек нарығындағы қазіргі сұранысты талдауға және жеке даму жоспарларын жасауға көмектеседі. Олар қызметкерлерге сұхбат кезінде өзін қалай ұстау керектігін, түйін­демені дұрыс толтыруды және т.б. үйретеді. Сондай-ақ қызметкерлердің барлығы топтық оқудан өтеді. Осының бәрі олардың болашақта жұмысқа орналасу мүмкіндігін арттырады. «Бұл әлемге таралған тәжірибе болғанымен, «ҚазМұнайГаз» – өзінің бұрынғы қызметкерлерін қолдау үшін осындай бағдарламаны енгізген алғашқы қазақстандық компания деуге болады. Жұмыс орнын қысқарту, қызметкерлерді оңтайландыру әрқашан ауыр және жағымсыз үдеріс екенін жақсы түсінеміз. Мұндай жағдайда кейбір адамдар әрмен қарай не істеу керектігін, қайда баратынын білмей, сасқалақтап қалуы мүмкін. Біздің міндетіміз – оларға көмектесу», – деді Дәулетжан Хасанов.

БЕКЕТ КӨКЕНАЙҰЛЫ


Оқи отырыңыз

Пікір қалдыру

Пікір қалдыру