- Аймақ
- 28 Мамыр, 2020
Әркім өз денсаулығына деген жауапкершілікті сезінуі тиіс
Қазір әлемде коронавирус індеті өршіп тұр. Әсіресе, Еуропа мен Солтүстік Америка құрлығында бұл ауру күшіне енді. Оңтүстік Америка құрлығында да жағдай мәз емес. Бұған дәлел, Бразилия мен Перу мемлекеттерінде жұқтырушылардың саны сағат сайын көбею үстінде.
Қазір әлемде коронавирус кең тараған мемлекеттердің көшін АҚШ бастап тұр. Екі миллионға жуық америкалықтар бұл кеселді бойларына жұқтырып алған. Бразилия мен Ресей екінші және үшінші орындарда келеді. Бұл мемлекеттерде жұқтырғандар саны 300 мыңнан асып түсті. Осы ретте алғашқы 12 мемлекеттің қатарында Испания, Ұлыбритания, Италия, Франция, Германия, Түркия, Үндістан, Иран, Перу орналасқан. Құдайға шүкір, елімізде жағдай аса шиеленісті емес. Қазақстанда коронавирусты жұқтырғандар саны 9 мыңға жуықтап қалды. Оның ішінде 35 адам қайғылы оқиғаға тап болса, 4 352 адам құлан таза айығып кеткен. Ал 4 144 адам әлі күнге дейін хал үстінде. Елімізде бұл кеселден адам өлімі дүниежүзілік көрсеткіштен анағұрлым аз. Бұған себеп, Қазақстанда коронавирустың жеңіл түрі таралған. Ал АҚШ, Ұлыбритания, Италия, Испания, Франция мемлекеттерінде күрделі түрі тарап кеткендіктен, адам өлімі жоғары болуда. Кез келген медалдың екі жағы бар демекші, елімізде бұл індеттен жазылып шыққандардың да саны күннен-күнге көбейіп келе жатыр. Коронавирустан жазылып шыққан адамның бойында қандай өзгерістер болуы ықтимал, өзін қалай сезінеді, басқаларға қандай ақыл-кеңес береді деген сұрақтар туындайтыны ақиқат. Осыған орай аталған дерттен емделіп шыққан қарағандылық отыз жастағы Дәуреннің (аты өзгертілген) пікірін келтіре кетпекпін. Жоғары температура мен құрғақ жөтел, ентігу бойынша ауруханаға түскен ол екі аптаға жуық емделіп, жақында ғана құлан таза айығып шықты. Бірақ қуануға әлі ерте. Ол әлі екі апта бойы үй карантинінде бақылауда болады. «Менің әріптесім коронавирусқа шалдыққаннан кейін, онымен бірге байланыста болған адамдарды да тексеріске алды. Мені тексергенде коронавирустың оң нәтижесін көрсетті. Өзім де түсінбедім. Ауруханада бізді күніне 3 рет тамақтандырып, жиі-жиі қадағалады. Дәрігерлерге алғысымды білдіремін. Дегенмен мен өзімнің туыстарыма алаңдаймын. Достарыммен, жақындарымен интернет арқылы сөйлесемін. Ең негізгі айтайын дегенім, бұл ауруға көптеген адамдар скептиктік көзқараспен қарайды. Бұл вирус шынымен де бар. Кез келген мекемеге кіргенде міндетті түрде маска киіп, қолды антисептикпен жуу қажет. Барлық адам саламатты өмір салтын ұстану қажет», – деп атап өтті ол. Иә, сақтансаң сақтаймын деген сөз бүгінгі күннің басты қағидасына айналғандай. Денсаулығымызға немқұрайлы қарамай, жауапкершілікті сезіне білсек, ауру-сырқауға ұшырамай, сапалы өмір сүруге мүмкіндігіміз мол болмақ.
Айнұр БАҚДӘУЛЕТҚЫЗЫ
418 рет
көрсетілді0
пікір