- Мәдениет & Спорт
- 29 Қазан, 2020
Киелі мекен шетелдіктердің назарында болуы тиіс
Түркістан қаласында ішкі туризмді дамытуға жан-жақты күш салынуда. Маңызды саланың қазіргі жағдайы мен болашағының мәселелері «Түркістандағы туризм: қарқынды даму уақыты» атты шарада талқыланды.
Аталмыш шарада облыс әкімінің орынбасары Мейіржан Мырзалиев пен қала әкімінің орынбасары Т.Мұсаев, Халықаралық туризм және меймандостық университетінің ректоры М.Мурзамадиева, «Атамекен» өңірлік кәсіпкерлер палатасының басшысы Т.Нахипбеков, «Rixos Turkistan» қонақ үйінің бас-директоры И.Челик, «Әзірет Сұлтан» мемлекеттік тарихи-мәдени қорық-мұражайының өкілдері, жетекші туроператорлар, Түркістан өңірінің қолөнершілері, белгілі спортшылар мен қаланың туризм саласының дамуына үлес қосып жүрген азаматтар қатысты.
Басқосуда туристік саланы дамытудың басым бағыттары кеңінен сөз болды. Яғни, спикерлер заманауи көзқараста ойлайтын білікті жастарды жұмысқа тарту, сондай-ақ еліміздегі қалалар мен өңірлердің экономикалық даму драйвері ретінде ішкі және сыртқы туризмді ілгерілету бағытындағы өзара қарым-қатынасын реттеу жайы әңгіме арқауына айналды.
Сондай-ақ кездесуде Халықаралық туризм және меймандостық университеті мен Түркістан облысы, қала әкімдігі, «Rixos Turkistan» қонақ үйі және «Атамекен» кәсіпкерлер палатасы тарапынан Серіктестік және өзара ынтымақтастық бойынша меморандумға қол қойылды.
Туризм саласына ерекше көңіл бөлінген Түркістанда соңғы жылдары мыңдаған жұмыс орны ашылғаны белгілі. Күннен күнге қарыштап дамып жатқан шаһарды одан әрі айшықтай түсетін тың жобалар қолдау табуда. Сондай-ақ, жуық арада ашылуы жоспарланған «Tai-Kazan» этнокешенінде ұлттық нақыштағы дүниелер, тағамдар, суретке түсу мүмкіндігі және қолөнер туындылары таныстырылды.
Айбол ҚАДЫРБАЙ
200 рет
көрсетілді0
пікір