- Өндіріс өрісі
- 05 Қараша, 2020
Қалдықсыз өндіріске көшкен «Кублей» тері илейді
Ақ Жайық өңірінде 29 жасқа дейінгі жас кәсіпкерлерді қолдауға арналған гранттық қаржы беру конкурсы басталды. Бұл туралы өңірлік коммуникациялар қызметі алаңында өткен онлайн брифингте облыстық кәсіпкерлік және индустриялық-инновациялық даму басқармасы басшысының орынбасары Мақсат Құланбаев мәлімдеді.
Қазіргі экономикалық қиындықтарға қарамастан тұрақты өсуді, еңбек өнімділігін арттыруды ойлайтын оралдық серіктестік жаңа цехты іске қосуға қам жасап отыр. Бүгінде тері-терсек өңдеу цехына итальяндық құрал-жабдықтар қойылған. Мұндағы мал терісін жұмсартатын үлкен сыйымдылықтар да көзге бірден түседі. Олар африкалық қызыл ағаштан жасалыпты. Оның біреуінің сыйымдылығы 30 текше метр шамасында, бұл жабдықтарды пайдалану мерзімі – 30 жыл. Цехта теріні жұмсартатын, жуып-сығатын және дайын терінің көлемін өлшейтін жабдықтар бар. Олардың көмегімен малдың тері-терсегі итальяндық технология бойынша өңделмек. Қазір зауытта тері өңдеу жұмыстарына бас-көз болатын тері өңдеу технолог маманы жұмысқа қабылданған. Жалпы жаңа өндіріс орнында хромдалған WET-BLUE жартылай дайын өнім – тері өндіріледі. Жартылай дайын өнімнен, яғни қалың тері материалынан арнайы жұмыс аяқ киімінің үстіңгі және астыңғы бөліктері дайындалады. Ондай аяқ киім кен орындарында еңбек ететін жұмысшыларға арналып тігілмек.
Аталмыш серіктестіктің өндіріс жөніндегі меңгерушісі Гүлнұр Дошмұханованың айтуына қарағанда, жаңа цех іске қосылуға толықтай дайын. Еліміздегі тиісті орындары итальяндық мамандардың «Кублей» кәсіпорнына келіп, жобаны іске қосуына рұқсат берген.
Өз мемлекеттерінен рұқсат алған соң, итальяндық мамандар Оралға келіп, өндіріс ошағының «отын» жағып, құрал-жабдықты пайдалануға тапсырмақ.
Үлкен бөшкелерде терілер түрлі химикаттардың көмегімен жібітілмек. Ондай заттар Италиядан технологияға сәйкес тасымалданады. Оның үстіне елімізде тері өңдеуге жарамды химиялық заттардың өндірілмейтіні бесенеден белгілі. Тері өңдейтін жабдықтар аусымына 600 теріні өңдеуге қауқарлы. Бұл цехтың басты артықшылығы – өндірісте қалдықтың қалмайтындығында. Кәсіпорында тоңазытылған, мұздатылған ет және жартылай дайын ет өнімдерін өңдейтін кешен жұмыс істейді. Онда ірі қара, уақ жандық, жылқы соятын қасапхана бар. Одан басқа қалбыр зауыты да 100-ден астам өнім түрін өндіреді.
– 2017 жылы ашылған цехымызға бәсекеге қабілетті болу үшін қалдықсыз өндіріс үрдісін енгіздік. Мұнда малдың сүйегі, мүйізі, шеміршегі, сіңірі, яғни азық-түліктік емес қалдығының барлығы өңделіп, етсүйек ұны және мал майы өндіріледі. Оның құрамында 50 пайыздан астам күрделі белоктар – протеиндер бар. Цехтағы заманауи еуропалық жабдықтар толықтай аутоматтандырылған, компьютермен басқарылады. Күн сайын цехта 18-20 тонна қалдық өңделіп, 9-10 тонна етсүйек ұны мен мал майы алынады. Өнімдерімізге сұраныс күшті. Оларды Түркістан, Қостанай және өзіміздің өңірдегі құс фабрикаларына өткіземіз. Мал майын сабын өндірісімен айналысатын кәсіпорындар алады. Кәсіпорындағы өндіріс тізбегі тұйықталған, яғни малды союдан бастап оның қалдығын өңдеп кәдеге жаратамыз. Қалдықсыз өндіріс барысында табиғатқа зиянды қалдықтар шығарылмайды, сондықтан ол қоғамға экологиялық жағынан қауіпсіз, – деді Гүлнұр Дошмұханова.
Оның айтуынша, етсүйек ұны құс фабрикаларында бройлердің, бордақылау алаңдарындағы малдың азықтық жеміне қосылатын таптырмас қоспа. Сондай-ақ ауыл шаруашылығы саласында тыңайтқыш ретінде пайдаланылады. Ал мал майы сабын өндірісінде қолданылады.
«Кублей» ЖШС-ның өндірген сапалы өнімдері тек елімізде ғана емес, таяу және алыс шетелдерге танылған. Отандық өнім Иран, Қытай, Қырғызстан, Түркіменстан, Ресей елдеріне шығарылады. Оның вакуумдық орамадағы сиыр еті, қалбырдағы өнімдері Атырау, Ақтау және Оралдағы ірі сауда орындарында өз тұтынушыларын тапқан.
Орал қаласы
ГҮЛБАРШЫН ӘЖІГЕРЕЕВА
395 рет
көрсетілді0
пікір