- Білім & Ғылым
- 12 Қараша, 2020
Балалар қауіпсіздігі – басты назарда
Нұр-Сұлтанда БҰҰ Балалар қоры (ЮНИСЕФ) БҰҰ-ның білім, ғылым және мәдениет жөніндегі ұйымымен (ЮНЕСКО), Дүниежүзілік денсаулық сақтау ұйымымен (ДДСҰ), Дүниежүзілік банкпен және жергілікті серіктестермен бірлесіп, мектептердің жабылуы мен ашылуы аясында әр баланың білім, денсаулық және қауіпсіздік құқықтарын ілгерілету мен қорғау бойынша вебинарлар сериясын іске қосты.
Вебинарлар білім беру саласының мамандарының COVID-19 жағдайында мектеппен байланысты денсаулық сақтау шараларын жүзеге асырудағы потенциалын арттыруға, оқу шығындарын азайтуға және балаға бағытталған инклюзивті, цифрлық және аралас оқытуды ұйымдастыруға мүмкіндік беруге бағытталған. Вебинарлар сериясы 2020 жылдың төртінші тоқсанында айына бір вебинар өткізіледі. Ай сайын білім және денсаулық сақтау департаменттері, мектеп басшылығы мен мұғалімдер Мектептерді қауіпсіз және жүйелі түрде біртіндеп іске қосу, Жетілдірілген және шокқа тұрақтырақ мектеп жүйелерін қалыптастыру, Аралас оқу жағдайында инклюзивті оқуды қамтамасыз ету деген тақырыптарға арналған пікірталасқа қатыса алады.
COVID-19 пандемиясы бүкіл әлемдегі білім беру жүйесіне қатты әсер етті. Көптеген елдер басқа кең таралған шектеулермен қатар COVID-19 таралуының өсуіне байланысты жедел жауап ретінде мектептерді жауып тастады. Мектептердің жабылуы балалардың денсаулығына, біліміне және дамуына, отбасының кірісі мен жалпы экономикаға теріс әсер етуде.
2020-2021 оқу жылының бірінші тоқсанында Қазақстан бастауыш мектептерде офлайн оқытуды қайта бастай отырып, аралас тәсілді қолданды. ЮНИСЕФ, ЮНЕСКО, ДДСҰ және Дүниежүзілік банк бірнеше маңызды факторларды ескере отырып, мектептерді жабу немесе қайта ашу туралы шешімді анықтайтын қауіпті бағалауға негізделген тәсілді қолдайды. Мәселен, жергілікті деңгейдегі COVID-19 эпидемиологиясы, білім беру мекемелерінің өз жүйесін қауіпсіз жұмыс үшін жоспарлау және бейімдеу мүмкіндігі және вирустың таралуын азайту, мектептердің жабылуының білім берудегі шығындарға әсері, әділеттілік, балалардың жалпы денсаулығы мен әл-ауқаты, сондай-ақ мектептен тыс жүзеге асырылатын бірқатар басқа денсаулық сақтау шаралары қарастырылған.
«Мектептердің жабылуы бүкіл әлемдегі балалардың оқу процесін бұзды, бұның шұғыл және ұзақ мерзімді салдарлары болды. Тиісті сападағы жалпыға қолжетімді қашықтықтан оқыту болмаған кезде білім берудегі теңсіздік күшейеді. Қазір барлық балалар үшін сапалы оқытуды қайта бастау және оқу шығындарын өтеу өте маңызды. Қауіпсіз жерде мектептер қайта ашылуы қажет. Сонымен қатар, білім беру жүйесін қайта қарастыру, көптеген оқыту жолдарын ұсынатын және денсаулық сақтау мәселелеріне де, басқа да күйзелістерге төзімді,оқушыларға бағытталған инклюзивті білім беретін жүйені құру үшін шұғыл инвестициялар қажет», – деді Қазақстандағы ЮНИСЕФ-тің өкілі Артур ван Дизен.
Кез-келген қажеттіліктері бар барлық балалар үшін қол жетімді инклюзивті білім жүйесін құру білім беру жүйесін жоспарлаудың негізінде тұруы қажет. Қазақстанда онлайн-оқыту үшін оннан астам онлайн-оқыту платформасы құрылды, бірақ оқу материалдары ерекше білім беру қажеттіліктері бар балаларға бейімдеуді қажет етеді. Сандық оқу мазмұнын жасаудан гөрі, оны жеке оқушылардың нақты қажеттіліктеріне бейімдеудің шұғыл қажеттілігі бар.
«Мектептердің ашылуы қазіргі кезде әлемнің көптеген елдерінде, соның ішінде Қазақстанда сапалы білім берудің маңызды мәселелерінің бірі болып табылады. Көптеген адамдар үшін пандемияның жаңа толқындарына немесе қазірдің өзінде пайда болған жағдайлар санының артуына байланысты мұны қалай шешу керектігі әлі түсініксіз. Бірақ бүкіл әлемдегі көптеген балалар үшін оқушыларға бағытталған аралас оқыту мүмкіндіктері сапалы білім алудың бірден-бір кепілі болып табылады. Бұл вебинарлар мүдделі тараптарға бүкіл әлем бойынша осыған байланысты негізделген шешімдер қабылдау үшін негізгі ұсыныстар мен сабақтарды зерттеуге көмектеседі деп үміттенеміз», – деді, ЮНЕСКО-ның Қазақстан, Қырғызстан және Тәжікстандағы өкілі Криста Пиккат.
Вебинарлар барысында ұйымдастырушылар балаға бағытталған аралас оқыту тұжырымдамасын және оқу платформалары мен құрылғыларын балалардың қажеттіліктеріне бейімдеудің қолданыстағы шешімдерін ұсынады.
«Мектептердің жабылуының нәтижесінде әлем базалық білім беруге мемлекеттік инвестициялардың 16%-на дейін жоғалтуы мүмкін. Түзету шараларынсыз біз 2030 жылға қарай нашар оқитындардың үлесін 50%-ға қысқарту жөніндегі мақсатқа қол жеткізуде едәуір сәтсіздікке ұшыраймыз. Осылайша, «вируспен өмір сүру» ойлау тәсілін қабылдау, саясатты өзгеріп жатқан жағдайларға сәйкес түзету және мектептердің жұмысын біртіндеп қайта бастауға арналған құралдардың бір бөлігі ретінде қашықтықтан оқыту сапасын жақсартуды жалғастыру өте маңызды», – деді Қазақстандағы Дүниежүзілік банктің Орталық Азиядағы адами даму бағдарламаларының жетекшісі Сусанна Хайрапетян.
Салтанат ҚАЖЫКЕН
1557 рет
көрсетілді0
пікір