- Мәдениет & Спорт
- 12 Қараша, 2020
Спорт пен ойын-сауық қызметтері табыс әкелуде
Соңғы жылдары әділ сынға алынып жүрген берекесіз шоу бағдарламалар мен телеарналарды жаулап алған арзан сайқымазақ күлкіге негізделген «әртіссымақтар» өнерін карантин сап тыйғаны аян. Дегенмен, сол карантиннің жайсыз әсеріне қарамастан, спорт пен ойын-сауық қызметтері былтырға қарағанда ақшалай түрінде 27%, нақты алғанда – 21%-ға өсіпті. Бұл туралы finprom.kz өз сайтында жазады.
2020 жылдың қаңтар-маусымында спорт, демалыстарды ұйымдастыру мен ойын-сауықтар саласында көрсетілген қызметтердің көлемі 124,3 млрд теңгеге жеткен, сөйтіп бір жыл бұрынғыдан бірден 27,4%-ға артқан. Нақты көлем индексі (НКИ) 21,3% құраған.
Экономиканың, бақыланбайтын секторындағы қызметтерді есепке алмағандағы, қызметтер көлемі бір жылда 26,6%-ға өсіп, 123,5 млрд теңгеге жеткен. Бұл ретте осыншама соманың еліміз бойынша қызметтердің барлық көлемінің тек 14,6%-ы ғана ауылдық жерлер еншісіне бұйырған.
Бұдан бір жыл бұрын осындай кезеңдегі көрсеткіш соның алдындағы жылға қарағанда азғантай ғана – 0,9%-ға артып, 97,6 мың теңгені құрапты (1-инфографика).
Аймақтарға бөлгенде қызметтердің неғұрлым көп көлемі астанамыз еншісінде екен: мұнда 47,3 млрд теңгеге, яғни ақшаға шаққанда бір жыл бұрынғыдан үш есе көп қызмет көрсетіліпті. Үздік аймақтар үштігіне сондай-ақ Алматы (9,7 млрд теңге, минус 45,8%) және Қарағанды (8,9 млрд теңге, плюс 8,9%) облыстары енген. Қызметтердің мейлінше аз көлемі Түркістан облысында көрсетілген: бар-жоғы 2,6 млрд теңгеге – жылға шаққанда плюс 20,5%.
Мәдениет және спорт министрлігі алдына халықты, бірінші кезекте балаларды, дене шынықтырумен айналысуға белсенді түрде тарту, сондай-ақ спорт секцияларын және балалар үйірмелерін ашу бойынша міндеттер қойылды, деп хабарлады премьер-министрдің ресми ресурсы (2-инфографика).
Өз кезегінде, Мәдениет және спорт министрлігі ойын түріндегі (футбол, хоккей, гандбол, волейбол, баскетбол, регби, көгалдағы хоккей, т.б.) республикалық федерациялар басшыларымен жиналыс өткізді. Алқалы жиын барысында клубтардың қаржы-қаражаттарын қайта бөлуге бірыңғай талап қарастырылды. Федерациялардан клубтарда төлеуге бюджеттің 50%-ына дейін жұмсалатын спортшылардың жалақыларын реттеу бойынша ұсыныстар түсті.
Айта кету керек, бірінші жартыжылдықтың қорытындысы бойынша спорттық клубтар іс-қимылы саласына қызмет түрлерінің неғұрлым көп көлемі көрсетілген: 13,2 млрд теңге – бір жыл бұрынғыдан 15,3%-ға артық. Қызметтердің тағы 7,5%-ы спорттық ғимараттарды пайдалануға көрсетілген: бір жылда плюс 3%, яғни 9,3 млрд теңгеге дейін. Фитнес-клубтар қызметінің көлемі екі есеге, 3,7 млрд теңгеге дейін құлдырап кеткен (таблица).
Исатай ҚАМБАРОВ
163 рет
көрсетілді0
пікір