- Ақпарат
- 12 Қараша, 2020
Өнім қауіпсіздігі – маңызды мәселе
Мәжіліс спикері Нұрлан Нығматулиннің төрағалығымен өткен палатаның жалпы отырысында депутаттар Техникалық реттеу туралы заң жобасын бірінші оқылымда мақұлдады.
Заң жобасы Мемлекет басшысының жаңа редакциядағы техникалық реттеу туралы заңды дайындау қажеттігі туралы тапсырмасын іске асыру мақсатында әзірленді. Маңызды құжатты талқылау барысында Мәжіліс төрағасы жаңа заң жобасының салмақты тұстарына ерекше назар аударды. Ол аталмыш заң жобасының қазақстандық нарықты сапасыз тауарлардан қорғауға бағытталғанын айта келіп: «Ең бастысы, өнім қауіпсіз болу керек. Басқа мәселелерді, мысалы, өнімге маркировка жасау жағдайын кәсіпкерлердің өздері шеше алады. Ол үшін тауарды қайтаруға, немесе өткізбеуге жол бермеу керек. Себебі, бұл кәсіпкерлер үшін өте үлкен шығын», – деді.
Енді осы заң жобасына сәйкес, мемлекеттік бақылау өнімді өткізу сатысында ғана емес, оны еліміздің аумағына әкелгенге дейін жүргізілетін болады. «Жасыратыны жоқ, осыған дейін кез келген өнім елімізге кіргеннен кейін тексерілетін. Қауіпті жағдай болса, сонда ғана анықтау басталатын. Енді өнім Қазақстанға кірмей тұрып, мемлекеттік бақылаудан өтеді. Қауіптілігі анықталған тауарлар бірден қайтарылады. Бұл өте маңызды, қажетті қадам», – деді Н.Нығматулин.
Палата спикерінің пікірінше, заң жобасына енгізілген түзетулер тұтынушыларды қауіпті тауарлардан қорғауды күшейтеді. Сонымен қатар отырыс барысында депутаттар жауапты мемлекеттік органның басшысына бірқатар сұрақтарын қойды.
1999 рет
көрсетілді0
пікір