- Спорт
- 25 Ақпан, 2021
Нағыз талант тасада қалмайды
Ауылдық жерлерден жиналған талантты балалардың жас алмасу кезеңінде қиындыққа душар болатыны бар. Осы кезде шынайы спортшының бағыты қалыптасады. Қаншама қиындықтарға шыдай алатын дара спортшы өзін әлемдік аренада көрсетіп үлгерері анық.
Жеңіл атлетика «Спорт падишасы» деп тегіннен-тегін айтылмаса керек. Бұл спорт түрін жақсы меңгерген адам басқа да сайыста өз қабілетін көрсете алатыны дәлелденген. Бір қуанарлығы, елімізде Әмин Тұяқов пен Ғұсман Қосанов сынды аты аңызға айналған спортшылардың ізін жалғастырып келе жатқан жастардың қарасы көбейіп келеді.
Елордадағы жаңа жеңіл атлетикалық «Qazaqstan» кешенінде жасөспірімдер арасында биылғы жылдың алғашқы ірі жарысы өтті. Екі күнге созылған біріншілікке Ақмола, Солтүстік Қазақстан, Қостанай облыстарынан, сондай-ақ Қарағанды, Нұр-Сұлтан қаласынан 175 спортшы қатысты. 2004-2005 және 2006-2007 жылғы жасөспірімдер жеңіл атлетиканың бес түрінен, яғни ядро лақтырудан, жүгіруден, эстафетадан, ұзындыққа секіруден және жеңіл атлетикалық жүрістен сынға түскен болатын.
Жарыс қорытындысы бойынша жалпы командалық есепте 1-орынды 13 алтын, 8 күміс, 7 қола жүлдемен Қарағанды қаласы жеңіп алды. Екінші орында – Нұр-Сұлтан қаласы. Елордалық жеңіл атлеттер еншісінде 12 алтын, 11 күміс, 11 қола жүлде бар. Үздік үштікті 8 алтын, 14 күміс, 10 қола жүлдемен Солтүстік Қазақстан облысы қорытындылады.
Салтанат Қажыкен
392 рет
көрсетілді0
пікір