- Мәдениет & Спорт
- 25 Ақпан, 2021
Болашақ чемпиондарға тарту
Биылғы жылы Алматы қаласында 10 спорт кешені салынып, 52 орта мектептің стадиондарын жаңарту жоспарда бар.
Бұл туралы қала әкімі Бақытжан Сағынтаевтың халыққа есеп беру кездесуінде мәлімдеген еді. «Біз қазір кешенді бағдарлама жасадық, яғни бұл – спорт кешендерін салу. Биылдың өзінде бюджеттің есебінен алты спорт кешені салынады. Бұдан бөлек жеке кәсіпкерлер де кешен соғып жатыр. Екіншіден, ашық алаңдар жасалынуда. Біз осы ашық алаңда балаларды спортпен шұғылдандыру үшін тәжірибелі жаттықтырушыларды шақырып жатырмыз», – деді қала басшысы.
Жалпы биыл 10 спорт нысанының құрылысы жоспарлануда, оның алтауы жергілікті бюджет есебінен. Бұл 5 дене шынықтыру-сауықтыру кешенінің құрылысы, оның ішінде қала шетінде Жетісу ауданының «Айнабұлақ-2» шағын ауданында, Медеу ауданының «Алатау» шағын ауданында, Түрксіб ауданындағы «Жас Қанат», Жетісу ауданындағы «Кемел» және «Құлагер» шағын аудандарында орналаспақ. Сондай-ақ, Алатау ауданында жабық және ашық корттары бар теннис орталығының құрылысы жоспарланған. Құрылыс жұмыстары басталды, үстіміздегі жылы аяқталады деп күтілуде.
Балаларды тегін спорт секцияларымен қамтуды арттыру үшін мектеп спорты федерациясымен бірлесіп қала мектептерінде спорт клубтарын ашу жұмыстары жүргізілуде. «Сұңқар» халықаралық шаңғы трамплині кешенінің 2-ші кезектегі құрылыс-монтаждау және «Жаңа Алматы» бағдарламасына сәйкес спорт секцияларын кеңейту жұмыстары жүргізілуде, оның басымдықтары Наурызбай, Алатау, Түрксіб және Жетісу аудандарының тұрғындары үшін спорттың қолжетімділігі болып табылады.
Айжан Жасбатырқызы
407 рет
көрсетілді0
пікір