- Спорт
- 18 Наурыз, 2021
Ел қоржынында – 3 жүлде
Спорттың фристайл-могул және фристайл-акробатика түрлері бойынша өткен әлем біріншілігінде спортшыларымыз үш жүлде жеңіп алды.
2018 жылы Оңтүстік Кореяның Пхенчхан қаласында өткен Қысқы олимпиаданың қола жүлдегері Юлия Галышева күміс жүлдегер атанса, Павел Колмаков қолаға қол созды. Ал 15 жастағы Анастасия Городко параллельді могул бойынша сайыста үздік үштіктің қатарынан көрінді. Бұл әлем біріншілігі Алматыдағы «Шымбұлақ» тау-шаңғы курортында ұйымдастырылған болатын.
Ұжымдық сайыста ел құрамасының спортшылары жүлдеге іліге алмады. Үш секірудің қорытындысы бойынша спортшыларымыз 211,62 ұпайменен соңғы орынға орналасты. Шаңғы акробатикасы бойынша жарыс жолына шыққан Жанбота Алдабергенова мен Ақмаржан Қалмұрзаева елімізде өткен әлем чемпионатында білгендерінен жаңылды. Ерлер командасы алғашқы іріктеу кезеңінен әріге аса алған жоқ. Шерзод Хаширбаевтың іріктеуді 18-ші, Нұрлан Батырбаев 25-ші, Роман Иванов 27-ші орынмен аяқтады.
Алматыдағы әлем чемпионаты мәресіне жеткен соң одақтас мемлекеттердің Ұлттық шаңғы қауымдастықтары басшылары мен өкілдерінің конференциясы өтті. Жиынға қатысқан Қазақстан Ұлттық Олимпиадалық комитетінің бас хатшысы Андрей Крюков әлем чемпионатын ұйымдастыру еліміздің халықаралық аренадағы имиджін жақсартатынын, әлем додасын өткізу арқылы аталған спорт түрінің елімізде қарқынды дамуына жол ашылып, төрешілер мен бапкерлер құрамының біліктілігін арттыруға көңіл бөлінетінін айтты.
Бұған дейін елімізде өткен Әлем кубогының кезеңдері Қазақстандағы фристайлдың дамуына айтарлықтай серпін берді. Могул да, шаңғы акробатикасы да қарқынды түрде дамып келеді.
Айбол КӘДІРБАЙ
203 рет
көрсетілді0
пікір