- Спорт
- 15 Сәуір, 2021
Үш жолдаманы қанағат тұттық
Көп ұзамай 3 айдан кейін Жапонияның бас қаласы Токио шаһарында кезекті ХХХІІ Жазғы Олимпиада ойындары басталады. Беделді доданы осымен екінші рет өткізгелі отырған Токио қаласындағы Олимпиадаға 205 мемлекеттің сайыпқырандары қатысады деп күтілуде. Төрткүл дүниенің кіл мықтылары бақ сынайтын дүбірлі жарысқа әлем халқы назар аударатыны анық. Бүгінде Токио аламанына берілер жолдама жолындағы жарыстар қыза түсуде.
Осыған орай, Алматыдағы Балуан Шолақ спорт кешенінде Азия құрлығының 24 мемлекетінен 200-ден астам балуаны 3 күн бойы 18 Олимпиадалық салмақ бойынша іріктеу жарысынан өткізді.
Жарыстың алғашқы күнінде грек-рим күресінің балуандары жолдаманы иелену үшін боз кілемде белдесті. Төрт балуанымыз жарыс жолына шыққан еді. 87 келі салмақта сынға түскен Нұрсұлтан Тұрсыновтың ғана бағы жанып, Олимпиада лицензиязын еншіледі. Ширек финалда ол жапониялық Масато Сумимен белдесті. Белдесудің бірінші кезеңінде 0:3 есебімен ұтылып жатқан балуанымыз екінші кезеңде белсендік танытып әдіс-тісілдерді сәтті қолданды. Жартылай финалда ол тәжірибелі үндістандық Сушил Құмармен жолы түйісті. Бірінші кезеңнің нәтижесінде С.Құмар жерлесімізден үш ұпай озып тұрды. Екінші кезеңде үндістандық спортшының осал жерін тапты. Осылайша финалға шыққан ол Токиоға баратындардың тізіміне қосылды. Финалда қытайлық Фей Пенг боз кілемге шығудан бас тартты. Олимпиада жолдамасымен қоса, алтын жүлдені еншілеген Н.Тұрсынов ел мерейін асырды.
Алайда басқа «классиктеріміз» ел сенімін ақтай алмады. Мейіржан Шермаханбет (67 келі) қырғызстандық Марлен Асикеевтен, Олжас Сырлыбаев (97 келі) Оңтүстік Корея өкілі Сейол Лиден ұтылды. Ал Георгий Цурцумия қатарынан екі белдесуде қарсыластарына есе жіберді. Сөйтіп, Қазақстанның грек-рим күресі шеберлері Алматыдағы турнирде бір жолдамаға ғана қол жеткізе алды.
Әйелдер арасында еркін күрес бойынша жарыстар қызықты да тартысты өтті. Ел намысын қорғауға 4 балуан аруымыз сынға түсті. Екі спортшымыз жарыс жолын ерте аяқтады. Екі белдесуде қатарынан ұтылған Эмма Тисина (57 келі) мен Жамиля Бақбергенова (68 келі) жарыс жолынан шығып қалды. 53 келі салмақта сынға түскен Татьяна Ахметова бозкілемде атой салды. Ол алғашқы кездесуінде тәжікстандық Ватансұлтан Шакаршоеваны айқын басымдықпен ұтты. Моңғолиялық Болотуя Бат Очирмен болған кездесу күтпеген нәтижемен есте қалды. Басында қателікке бой ұрындырып 0:8 есебімен ұтылып жатқан аруымыз жасымады. Екінші кезеңде ретін шығарып қарсыласын үш рет жамбасқа салып лақтырғаны үшін төрешілер тарапы еңбегін жоғары бағалады. Ақырында 12:8 есебімен алға шықты. Жартылай финалда ол оңтүстік кореялық мықты балуан Ким Хен Джуның жынын қағып алды. Осылайша ол финалға жолдама еншілеп, Олимпиадаға берілетін лицензияны қалтасына басты. Бірақ қатты жарақат алуына байланысты ол ақтық сайысқа қатыспады. 35 жастағы Т.Ахметова күміс жүлдеге қанағат тұтты.
Орта салмақ, яғни 62 келі салмақ дәрежесіндегі Аяулым Қасымованың сәл жолы болмады. Алғашында оңтүстік кореялық Ханбит Лиді ұтса, келесі белдесуде моңғолиялық Цереншимедке жеңілді. Жартылай финалда үндістандық Сонам Сонамға есе жіберді.
Ерлер арасында еркін күрестен екі балуанымыз бозкілемде сынға түсті. Олар: Азамат Дәулетбеков (86 келі) және аса ауыр салмақтағы Юсуп Батырмурзаев (125 келі). Қос спортшымыздың жолы болмады. Әсіресе, А.Дәулетбековтің Олимпиадаға баратын мүмкіндігі бар болатын. Ол жартылай финалда бар білгенінен жаңылды.
Күрес түрлерінен Олимпиадаға соңғы іріктеу турнирі келесі айда Болгарияның астанасы София қаласында өтеді. Бұл турнирде жолдаманы еншілеу қиынға соқпақ. Себебі аталмыш жарысқа бұған дейін жолы болмаған әр құрлықтың мықты балуандары сынға түседі.
Әртүрлі спорт түрлері бойынша Қазақстан командасындағы жалпы лицензиялар саны 48-ге жетті.
Нұрлан ҚҰМАР
373 рет
көрсетілді0
пікір