• Өндіріс
  • 04 Ақпан, 2015

Өнімдерімен әмбеге танылмақ

Орал қаласында өткен жылғы 25 желтоқсанда жалпыұлттық теле­көпір барысында Орал трансформатор зауытының бірінші кезеңі іске қосылды. Кәсіпорында үш фазалық күштік трансформаторлар өн­дірісі жолға қойылмақ. 

  «Аlageum Electric» машина жасау кәсіпорындарының холдингтік ком­паниясының бас директоры Серғазы Күнтуаровтың айтуынша, қазіргі уа­қытта зауытта өндірістік технологиялық желілерді орнату аяқталып қалған. Алдағы наурыз айынан бастап  мұнда трансформаторлық құрал-жабдықтар үздіксіз шығарыла бастайды. Өндіріс орнының қуаты электротехникалық өнім түрлерін, соның ішінде электр машиналарын шығаруға мүмкіндік береді. Зауыттың  жобалық қуаты – жылына 10 000 дана. Жоба құны – 3,1 млрд. теңге болса, оның ішінде өз қаржылары – 500 млн. теңге, қалғаны инвестициялар.

Жоба «БЖК-2020» бағдарламасы ауқымында 2,6 млрд. теңге несиенің пайыздық мөлшерлемесін субсидиялау бойынша мемлекеттік қолдауға ие болды, 17,3 млн. теңгеге газбен жабдықтау жұмыста­ры жүргізілді. Трансформаторлардың әле­ует­ті тұты­нушылары – мұнай-газ са­ла­сының ірі компаниялары, энер­ге­ти­калық кешен және темір жол кәсіп­орындары.
Жаңа кәсіпорын байырғы «Омега» зауытының бос тұрған цехтарына орын тепкен. Қаңырап тұрған ғимарат жөндеу жұмыстарынан кейін жаңа түрге енген. Бас директордың айтуынша, трансформаторларды өткізу қиынға түспейді, өйткені Ресейде компанияның ірі дилерлік желісі жұмыс істейді. Кәсіпорын 2016-2017 жылы өзінің толық қуатына шық­қан кезде өндіріс көлемі 100 млн. долларға жетеді деп жлоспарланған. Кентау қаласындағы холдингтік ком­панияның иелігіндегі осындай зауыттан шығатын өнімдер еліміздің батыс өңірін қамтуға жарап-ақ тұр. Бірақ Оралдағы зауыт жұмысы қалыпқа түсісімен батыс өңір нарығын, сонымен қатар Украинаны, Ауғанстанды, Түрікменстанды, Қырғызстанды, Әзірбайжанды орал­дық зауыт өнімімен қамтиды.  «Зауытта 650 адамға жұмыс орны ашылады. Өнім өткізетін нарық бар, ресейлік зауыттармен бәсекелесетін бизнес-жоспар құрдық», – деді сеніммен сөйлеген С. Күнтуаров.
Кәсіпорын басшылары кадр мәселесіне де жіті қарауда. Оралдық 10 адам білім-біліктілігін шыңдау үшін Кентаудағы зауытқа жолданған. Компания келешекте мамандар даярлау мәселесі бойынша Оралдағы ЖОО-лармен, колледждермен меморандум жасаған.
Жақында зауыт басшылығы Оралға іссапармен келген индустрия және даму министрі Әсет Исекешовке «Омега» зауытының бірнеше цехтарына ие екендерін, енді кәсіпорынның қалған бөлігіне, яғни 100 пайыз акциясына ие болғысы келетіндерін білдірді.  Сондай-ақ трансформатор өндіретін қытайлық ірі компанияның нарыққа енгісі келетіні, оларды нарыққа кіргізудің жөнсіздігі жайында да сөз қозғалды. Зауыт басшысы қосалқы стансалардың құрылысына, реконструкциясына қажетті құрал-жаб­дық­тың 90 пайызын шығаратын отандық компанияға конкурстар барысында басымдық беруді сұрады.  «Қытай­лықтарды нарыққа кіргізбеңіздер дейсіздер ме?» -деді әзілдей сөйлеген Министр айтылған өтініш-тілектердің аяқасты қалмайтынына сендірген-ді. Сонда өңір басшысы Нұрлан Ноғаев «Алагеум электрик» холдингтік компаниясына «Омега» зауытының қалған бөлігін «Қазақстан инжиниринг» ұлттық компаниясынан сатып алу мүмкін болса, оның облысқа оң әсері болатынын білдіріп еді. Холдингтік компанияның зауытың қалған бөлігіне қолы жетіп жатса, жаңа өнім түрлерін шығарып, жаңа жұмыс орындарын ашу жөнінде бизнес-жоспар дайын.
Компания басшылығы өз өнімдерінің сапалы болатынына сендіреді. Оған бар жағдай жасалған. Жаңа кәсіпорын еуропалық елдердің әлемге танымал өндірісшілерінің заманауи құрал-жабдығымен және автоматты желілерімен жарақтандырылған.

Гүлбар ДЫБЫСҚАЛИҚЫЗЫ,
Орал қаласы

485 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

TENGE MONITOR №15

15 Сәуір, 2021

Жүктеу (PDF)

Редактор блогы

Рымтай сағынбекова

“TENGE MONITOR” газетінің Бас редактордың міндетін атқарушы