- Өндіріс
- 19 Ақпан, 2015
КӨКШЕТАУ КІРПІШІ –КІРІСТІҢ КӨЗІ
Мұндағы «Енки» зауыты 30 түрлі өнім шығарады
Өңірдің индустрияландыру картасына енген бұл кәсіпорынның іске қосылғанына 5 жылға жуық уақыт өтті. О баста ел аумағына қажетті құрылыс материалдарын шығаруды қамтамасыз етіп келген «Енки» зауыты енді өзінің керамикалық кірпіш өнімдерін Ресей нарығына да еркін енгізіп, қыруар пайда тауып отыр.
Кірпіш зауытының өндірістік қуаты жоғары. Ол жылына 30 түрлі өнім шығаруды қамтамасыз етіп, өздерінде құйылған кірпіштің 58 млн. данасын жан-жаққа жөнелтеді. Бұл әрине, оңай атқарылатын шаруа емес. Зауыт әкімшілігі, инженер-техникалық қызметкерлері және өндірістің негізгі буыны – жұмысшы мамандар күш біріктіре отырып, индустрияландыру картасына енген кәсіпорынды алдыңғы қатарға шығарудың барлық мүмкіндіктерін қарастырды. Ең бастысы еңбек тәртібі мен шығарылатын өнімнің бәсекелестікке қабылетті әрі сапалы болуына айрықша назар аударылды.
Бастапқы жоба құны – 6 млрд. 178 мың теңге болып, индустрияландыру картасына енген кәсіпорында керамикалық кірпіш жасап шығарудың қазақстандық озық үлгісін қалыптастыру – ең негізгі міндет етіп қойылды. Ол үшін жаңа жобалар әзірлеу, өндірісті жаңа технологиялық жабдықтармен жарақтандыру мәселелерімен шұғыл айналысуға тура келді. Бұл бағыттағы ізденісті жұмыстар көп ұзамай-ақ өз жемісін бере бастады. Шығарылатын өнім түрлері көбейіп, олардың сапалық дәрежесі де арта түскені байқала бастады. Соның нәтижесінде бұрын кірпіш өндіруден бәсекелес болып келген украиналық әріптестерін басып озатын дәрежеге қолдары жетті. Осыны ескерген зауыттықтар енді шеттен келетін өнімді нарықтан ығыстырып шығарған еді.
Көкшетаудағы «Енки» керамикалық кірпіш зауытының бас инженері Вадим Бурыкиннің айтуынша, қазіргі таңда олар өздерінде өндірілген кірпіштерді Ресейдің Омбы және Түмен қалаларына тиеп жөнелтуде екен. Бұл жұмыс Еуразиялық экономикалық одақ аясындағы келісімшартқа қол қойылғаннан бері тіпті жандана түсіп, өзінің пай-далы әсерін молынан тигізіп жатса керек.
Алдыңғы қатарлы кәсіпорынның өндіріс ошағы қазіргі кезеңде Испанияның озық технологиясымен жабдықталынған. Оның да пайдасы көп. Зауыт өндірген сапалы, кірпіштер ыстыққа да, аязға да төзімді. Құрылысшылар оның сапасына еш мін айта алмайды. Жалпы зауыттың, дайын өнімдер цехының іштері жылы, олардағы температура қысы-жазы бірқалыпты. Өндірісте еңбек адамдарына қолайлы жағдай жасалған.
Бүгінде «Енки» кірпіш зауытында 300-ден астам адам тұрақты еңбек етуде. Негізінде кәсіпорын жылына 60 млн. дана кірпіш өндіруге қауқарлы. Ұжым алдағы уақытта осы межені бағындыруды алдарына басты мақсат еткен.
Ыбырай Емендәулет
848 рет
көрсетілді0
пікір