- Қаржы
- 22 Желтоқсан, 2017
Өсімде оң серпін бар
Өтіп бара жатқан жыл ел экономикасы үшін өсімді қалпына келтіру траекториясына ену жағдайымен ерекшеленді. Стратегиялық ізденістер мен белсенді іс-қимылдар жаңа экономикалық өсім жолында ептеп ілгерілеуге мүмкіндік берді. Биылғы жылдың қорытындылары әлеуметтік-экономикалық дамудың барлық салаларында біртіндеп оң өзгерістер орныға бастағанын көрсетіп отыр.
Соңғы бес жылда ішкі жалпы өнімнің 60 проценті екінші жартыжылдықта экономика белсенділігінің артуы есебінен қалыптасқан. Мәселен, 2016 жылы ішкі жалпы өнімнің 1,0 процентке өсуі кезінде бірінші жартыжылдықта өсу 0,1 процентті құраған, ал екінші жартыжылдықта экономиканың өсуі 2015 жылдың осы кезеңімен салыстырғанда 1,6 процентке дейін жеделдеген.
Сондықтан ағымдағы жылдың басынан экономика серпінін сақтау үшін маусымдық факторларды есепке ала отырып, ішкі жалпы өнімнің өсуі 3-тоқсанда 4,1 проценттен, 4-тоқсанда 4,3 проценттен төмен болмауы тиіс. Биылғы бірінші жартыжылдықты қорытындыланған шілдедегі Үкімет отырысында ұлттық экономика министрі Тимур Сүлейменов осындай тұжырым айтқан болатын. Осы ретте ол мемлекеттік органдар мен әкімдіктердің негізгі міндеті өндірістің қол жеткізген өсу қарқынын сақтау, инфляция деңгейінің нысаналы параметрлерін қамтамасыз ету, жаңа жұмыс орындарын құру және елдегі әлеуметтік тұрақтылықтың сақталуы үшін тығыз әрі үйлестірілген жұмыстарды жүргізу болып табылатынын атап айтқаны мәлім. Өйткені, бірінші жартыжылдықта сыртқы және ішкі даму ахуалының жақсаруы жағдайында Қазақстан экономикасы өзінің өсуін жалғастырды. Соған сай өнеркәсіп өндірісінің қол жеткен қарқынын ұстап тұру үшін екінші жартыжылдықта салалар неғұрлым жоғары серпінде өсуі керек-тін. Яғни, өсім қарқынының сақталуы соңғы айлардың екпінді болуына байланысты. Енді қазіргі екінші жартыжылдық белесінен қарағанда, министр болжамының негізділігін атап өту қажет. Жыл қорытындысы бойынша ІЖӨ өсімі 4 процентке жетті. Ағымдағы жылғы қаңтар-қарашада инвестициялық белсенділіктің жылдамдауы және инфляциялық процестердің тұрақтануы, сондай-ақ барлық алты базалық сала бойынша жағдайдың жақсаруының аясында экономиканың өсуі 3,9 процентті құрады. Қарашадағы Үкімет отырысында ұлттық экономика министрі экономиканың тұрақты өсім қарқыны жыл қорытындысы бойынша ІЖӨ-нің 4,0 процент деңгейінде өсуін шамалауға мүмкіндік беретінін атап өтті. Бүгінгі таңда экономика өсімін одан әрі қамтамасыз ету үшін Үкімет экономиканы жылдамдатылған технологиялық жаңғырту, шағын және орта бизнесті қолдау мен қаржыландыру, жекешелендіру арқылы мемлекеттің экономикадағы үлесін төмендету секілді басым бағыттар бойынша кешенді жұмыстарды жалғастырып келеді. Биыл елдегі макроэкономикалық тұрақтылық пен инвестициялық белсенділік, сондай-ақ сыртқы нарықтардағы қолайлы жағдайлар жыл ішінде жинақталған өсім қарқынын сақтауға ықпал етті. Мемлекеттік және салалық бағдарламалар аясында қабылданған шаралардың арқасында экономиканың барлық салаларында жағымды үрдіс сезілуде. Экономиканы әртараптандыру, агроөнеркәсіптік кешенді, кәсіпкерлікті және инфрақұрылымды дамыту, сондай-ақ жұмыспен қамтуды қамтамасыз ету бойынша бағдарламаларды іске асырудың нәтижесінде экономиканың барлық салаларында оң серпін байқалып отыр. Өнеркәсіп, құрылыс, сауда, көлік және байланыс салалары өсімнің негізгі қозғаушылары болды. Ұлттық экономика министрлігінің мәліметтеріне сәйкес, өнеркәсіпте жыл басынан бері тұрақты өсім байқалуда, бұл қаңтар-қарашада 7,3%-ті құрады. Тау-кен өндірісінде мұнай мен табиғи газ өндірудің екі еселенген ұлғаюына орай 9,6% өсім белгіленген. Өңдеу өнеркәсібінің өсімі 5,2%-ті құрады. Ішкі нарыққа бағдарланған салаларда, соның ішінде фармацевтикалық өнімдер шығару, жеңіл өнеркәсіп, азық-түлік өнімдері мен сусындар, сондай-ақ мұнай өнімдері өндірісінде елеулі өсім байқалуда. Экспортқа бағдарланған салаларда да өсімнің тұрақты қарқыны сезіліп, металлургия өндірісі едәуір арта түскен. Ауыл шаруашылығында өсу қаңтар-қыркүйектегі 1,9%-тен 11 айдың қорытындылары бойынша 2,3%-ке жылдамдады. Мал шаруашылығындағы өнім шығарылымының өсуі өсімдік шаруашылығындағы өсуден 2,6 есеге озық болды. Құрылыс саласының 2016 жылғы жоғары өсуінің аясында ағымдағы жылдың басынан бері әркелкі өсу байқалып отыр, ол биылғы қаңтар-қарашада 0,3%-ті құрады. Экономиканың нақты секторындағы жоғары өсім қызмет көрсету саласының тұрақты өсім жолына біртіндеп шығуымен сүйемелденеді. Биылдың 11 айында көлік қызметтері 4,8%-ке, байланыс 3,2%-ке, сауда 2,8%-ке, сондай-ақ жылжымайтын мүлік операциялары 2,5%-ке өсті. Экономика дамуына оң әсерін беріп жатқан инвестициялар өсімінің динамикасы жақсарды, негізгі капиталға салынған инвестициялар көлемі 5,7%-ке артып, 7,5 трлн теңгеге жетті. Сауда мен құрылыста инвестициялардың ең көп өсімі байқалуда. Сонымен қатар жылумен және сумен қамту желілерінде жүргізілген жаңғырту жұмыстарының нәтижесінде өнеркәсіпте де инвестициялар өсімі байқалып тұр. Инвестиция белсенділігінің өсуіне «Нұрлы жол», «Нұрлы жер» мемлекеттік бағдарламалары шеңберіндегі индустриялық-инновациялық және инфрақұрылымдық жобаларды іске асыру, сонымен қатар, АӨК және кәсіпкерлікті дамыту бағдарламалары мүмкіндік туғызды. Тұрақты макроэкономикалық жағдай тұрғысынан тікелей шетелдік инвестициялардың жалпы түсімі 2017 жылдың І жартыжылдығында 8,6%-ке өсіп, 10,5 млрд АҚШ долларына жетті. Жыл басынан бері алтын-валюта резервтері 6,6%-ке өсіп, 1 қарашадағы жағдай бойынша 31,5 млрд АҚШ долларын құрады. Елдің халықаралық резервтері 87,9 млрд. АҚШ долларын құрайды. Әлемдік нарықтардағы қолайлы баға конъюнктурасы және экспорттың импорттан басым болуы сауда теңгерімінде жоғары көрсеткіштерге қол жеткізуге септігін тигізді. Сыртқы сұраныстың қайта жаңғыруы және мұнай мен металдардың әлемдік бағаларының өсуі сыртқы сектордың көрсеткіштерінің жақсаруына әсерін тигізді. Биылғы 10 айда импорттың өсуінен экспорттың өсуінің екі есе көп таралуы нәтижесінде сауда теңгерімінің сальдосы 71,7%-ке өскен. Сондай-ақ сауда теңгерімі өңделген өнімдерді экспорттауды арттыру есебінен да жақсарды. Тұтастай алғанда, елдің сыртқы сауда айналымы 25,6%-ке артып, 62,1 млрд долларды құрады. Қаржы саласын мемлекеттік қолдаудың нәтижесінде экономиканы кредиттеу бірте-бірте қайта жаңғыруда. Мемлекеттік қаржылық қолдау бойынша қабылданған шаралар шағын кәсіпкерлік субъектілеріне кредиттеудің 3,1 трлн теңгені құрап, 2016 жылғы ұқсас кезеңмен салыстырғанда 7,7%-ке өсуіне мүмкіндік туғызды. Жыл басынан бері жылдық инфляцияның деңгейі бекітілген аралықта (6-8%) болып, қарашаның қорытындысы бойынша 7,3%-ті құрады. Инфляция өсіміне жол бермеу бойынша негізгі шаралардың бірі – бәсекелестікті дамыту болса, бұл ретте әділ бағаны қалыпты адал бәсекелестік жағдайында ғана ұстап тұруға болатыны түсінікті. Сондықтан Ұлттық экономика министрлігінде екі бағыт: баға келісімдерін бұлтартпау үшін тауар нарықтарына талдау жүргізу және кәсіпкерлерге жағдай жасау бойынша жұмыстар атқарылуда. Министрліктің бағалауы бойынша, Қашағанда, Теңізде және Қарашығанақта кен өндіру жоспарының асыра орындалуы есебінен мұнай өндіру көлемінің ұлғаюы мен өнеркәсіптің өсімі күтіледі. Осы орайда айта кетерлігі, Каспий құбыр желісі консорциумы жүйесінің өткізу қуаттылығы да жылына 28 млн тоннадан 67 млн тонна мұнайға артты. Бұл Атырау облысында жаңа мұнай айдау станциясы іске қосылғаннан кейін мүмкін болды. Жобаның жалпы құны 5 миллиард доллардан асады. Сонымен бірге Каспий құбыр желісі консорциумы бойынша 5 миллион қашаған мұнайының экспортқа жөнелтілгенін атап өту қажет. Бүгінде үшінші жаңғырудың міндеттерін шешу үшін кешенді шараларды қолға алу, экономикалық өсімнің жаңа моделін қалыптастыру қажет екендігі белгілі. Осы ретте жуырда Үкімет бекіткен стратегиялық жоспарда алдағы жеті жылда сапалы әрі табысты экономика өсімін қамтамасыз ету мақсатындағы іс-шаралар айқындалып отыр. Жобаға сәйкес, жылына кем дегенде 4,5-5% деңгейінде экономика өсіміне қол жеткізу жоспарланған, бұл Қазақстанға жан басына шаққандағы ІЖӨ өсім деңгейін 2025 жылға қарай 46 100 $ (СҚТ бойынша) дейін қамтамасыз етуге мүмкіндік береді.
БОТАГӨЗ ӘБДІРЕЙҚЫЗЫ
1543 рет
көрсетілді0
пікір