- Қаржы
- 01 Ақпан, 2018
AIFC мен Waves блокчейн-платформасы меморандумға қол қойды
Швейцарияның Давос қаласында өткен дәстүрлі Дүниежүзілік экономикалық форум аясында «Астана» халықаралық қаржы орталығы мен Waves блокчейн-платформасы ынтымақтастық және стратегиялық серіктестік туралы меморандумға қол қойды.
Серіктестік мақсаты – жаңа блокчейн-платформаны қолдана отырып, қаржылық технологияларға арналған озық экожүйені қалыптастыру, деп хабарлайды АХҚО баспасөз қызметі. Қаржылық қызметтерді көрсететін халықаралық деңгейдегі жетекші орталық қалыптастыру мақсатында құрылған АХҚО-ның басты міндеттері – қаржылық қызметтер саласында инвестициялау үшін тартымды орта құру арқылы ел экономикасына инвестициялар тартуға жәрдемдесу, еліміздің бағалы қағаздар нарығын дамыту, оның халықаралық капитал нарықтарымен ықпалдасуын қамтамасыз ету, сондай-ақ сақтандыру, банк қызметтері мен исламдық қаржыландыру нарығын дамыту. – «Астана» халықаралық қаржы орталығы Waves платформасымен жұмыс жасай отырып, қазақстандық стартаптарға өз жобаларын жаңа технологиялық деңгейде дамытуға мүмкіндік береді. Осылайша бұл бастама елімізде блокчейн-технологиялардың танымалдығын арттыруға үлес қоспақ. Саладағы жедел дамып отырған көшбасшы компаниялармен серіктестік орнату АХҚО үшін блокчейн технологиясы элементтерін пайдаланып, қаржылық қызметтер индустриясы үшін жаңа, тың шешімдер әзірлеуде құзыреттілік пен кәсіби мамандар даярлауда зор басымдықтар береді, – деп атап өтті АХҚО-ның цифрлық технологиялар жөніндегі директоры Әсел Жиенбаева. «Біз өзара серіктестігіміз Қазақстанға блокчейн-технологиялар саласындағы ең озық тәжірибені енгізуге мүмкін беріп, АХҚО-ны әлемдегі аталмыш индустрияның алдыңғы қатарлы инновациялық орталықтарының біріне айналдырарына сенімдіміз. Сондай-ақ біз серіктестігіміз аясында жинақталған тәжірибенің арқасында үздік шешімдерді, білім мен технологияны кеңінен тарата аламыз. Бұл ТМД кеңістігінде бүкіл блокчейн-экожүйені дамытуға оң әсерін тигізбек», – дейді Waves Platform негізін қалаушы Александр Иванов. Сонымен қатар тараптар қаржылық және блокчейн технологиялары саласындағы стартап-компанияларға қолдау көрсету және олардың Waves блокчейн-шешімдерін пайдалануына жол ашуға, сондай-ақ АҚХО-ның акселерациялық бағдарламасы алаңына шетелдік стартаптарды тартуға және оқытып-үйрету іс-шараларын өткізуге ниетті екендіктерін білдірді. Айта кетейік, Waves Platform – бизнеске, ұйымдар мен инвесторларға арналған инновациялық шешімдерді ұсынатын халықаралық блокчейн-платформа. Waves блокчейнде эмиссияны, сауда жүргізу және активтерді/өз токендерін айырбастауды жүзеге асырады. Жобаның басты ерекшелігінің бірі – қолдану жеңілдігі мен жаппай енгізуге баса көңіл бөлу. Бәтуаластық алгоритмі ретінде Proof-Of-Stake-ні қолдану ұсынылады. Былтыр маусымда Waves ICO-ны (монеталарды жария сату) сәтті аяқтап, нәтижесінде 16 миллионнан аса доллар (30 000 ВТС) жинады.
Рымтай Сағынбекова
942 рет
көрсетілді0
пікір