- Ақпарат
- 16 Наурыз, 2018
ІЗГІЛІК ПЕН МЕЙІРІМ МЕРЕКЕСІ
Жыл басы – Наурыздың тағылым, өнегесі мол
Әз Наурыз мол шуағын төге төрімізге енді. Наурыз – Шығыс елдерінің ерте заманнан бері тойланып келе жатқан ең қасиетті, ең киелі мерекесі. Оны ертеден қазақ қауымы көршілес өзбек, қырғыз, тәжік, ауған, парсы елдерімен бірдей думанды мерекеге айналдырған.
Тек кешегі КСРО дәуірінде осы тарихи құндылықтан айырылып қала жаздағанымыз болмаса. Шүкір, бұл олқылықты да тарих өзі түзеді. Қазақстанда Наурыз мейрамы 1989 жылдан бастап ресми тойлау мәртебесіне ие болды. Содан бері Наурыз мерекесі біздің елімізде Жыл басы, Ізгілік пен Мейірім мерекесі ретінде сән-салтанаты, өнеге-тәлімі, тағылымы мол қасиетті мереке ретінде тойланып келеді. Көне ғұрып, дәстүрден асатын не бар?! Соны көре алмаған кешегі солақай саясат қанша ұрандап, тұншықтырмақ болғанымен де, сол құндылықты мүлдем құртып-жойып жібере алмады. Соның бір мысалы, біздер бала кезімізде анамыз пісірген «Наурыз көжеге» көрші-қолаңдарды шақырып келіп, өзіміз де наурыз көжені құмарта ішіп, бауырсақ, құрт, ірімшік жеп, бір жырғап қалушы едік. Ал, анау қыр басында көкпар тартып, бәйгеге атқосқан ауыл адамдары, бала-шаға, бәрі ерекше қуанышқа бөленетін. Сол дәстүрдің енді мына еркін заманда жаңаша сипат алып, ұлттық салт-дәстүрлерге сай онан сайын жаңғырып жатқандығы көңілге қуаныш нұрын ұялатады. Негізінде Жыл басы – Наурыз табиғат пен адамның өзара тығыз байланысын аңғартады. Көктемнің осы аса ғажап әрі қасиетті шағында бір үлкен құбылыс – дәп 22 наурызда түннің қысқарып, күннің ұзару тоғысы жүреді екен. Мұны ерте замандағы адамдар: «Жыл басы – Наурыз келді!», – деп есептеген. Және де бұл – бар жылылық пен мейірім, шуақты өзімен бірге ала келген Көктем мерекесі ретінде де халық жүрегінен терең орын алатын мереке. Күн мен түннің теңелген күні – Жыл басы наурызды тек адамзат баласы емес, бүкіл тіршілік иесі, жан-жануарлар әлемі, сондай-ақ, табиғат, өсімдіктер дүниесі де асыға күтетіні хақ. Наурыз сөзі парсы тілінде «нау» – «жаңа», «руз» – «күн» деген ұғымды білдіреді. Халық содан да Жыл басы – Наурыз мерекесіне алдын-ала дайындалады. Дәстүр бойынша үйге қос шырақ жағылады, ыдыстар мейлінше ағарғанмен – әсіресе, айранмен, сүтпен меймілдете толтырылады. Бұл үшін бұлақ суын да пайдалануға болады. Мұның бәрі – молшылық белгісі. Осы күні бұлақтар, арықтар тазартылып, ағаштар отырғызылған. «Бұлақ көрсең, көзін аш!», «Бір тал ексең, он тал ек!» деген сөз осыдан қалған. Ата-анаға, туыс, бауырларға, дос-жарандарға деген құрмет сезім әрдайым жоғары болған. Наурыз – достық, еңбек, бейбітшілік мерекесі ретінде халық өмірінен терең орын алып келген, әлі де ала бермек. Ұлыстың ұлы күні адамдар бір-біріне деген бұрынғы реніш-өкпелерін ұмытып, бір-біріне терең ілтипат, қошемет көрсетеді. Мұны кеше ғана өткен Көрісу күні де растайды. Дастархан басында жастар үлкендерден бата алғысы кеп тұрады. Ақсақал кісілер қол жайып: «Ұлыс оң болсын, ақ мол болсын!» – деп ақ баталарын беріп отырған. Наурыздың бұрыннан қалыптасқан дәстүрлері көп. Оның бәрін айтып тауысу мүмкін де емес. Ауылдық жерлерде бұрынғы атжарыс, көкпар, теңге алу, т.б. ұлттық дәстүрлер өз мәнін жойған жоқ. Әрине, жаңа дәстүрлермен де байытылатын тұстар аз емес. Әйтеуір, аста-төк шашылудан абай болсақ екен. Бұл жөнінде кейінгі кездері көп айтылып та жүр. Олар да орынды шығар. Бірақ, халқымыздың о бастан маңдайына жазылып қойылған меймандостығы мен бауырмалдық қасиетін жоғалтып алудан сақ болайық, ағайын! Наурыз – Ізгілік пен Мейірімділіктің, Достықтың мерекесі. Елбасы айтқандай, «Болашақ – бірлікте». Оған имандай сенеміз де. Мәңгілік ел болуымыз үшін рухани жандүниеміз бай, соған білім, ақыл-ойымыз да сай болуы керек. Рухани жаңғыру кезеңінде рухымызды асқақтатын мерекелердің сән-салтанаты көбейе түссе нұр үстіне нұр емес пе?! Ұлыстың ұлы мейрамы құтты болсын!
Ибрагим Бекмаханұлы
1759 рет
көрсетілді0
пікір