- Қаржы
- 19 Сәуір, 2018
Ресейге қарсы жаңа санкциялар Қазақстанға әсері қандай?
Шектеуге ұшырағандар санатында – «Газпром» басқармасының төрағасы Алексей Миллер, іскер-бизнесмен Игорь Ротенберг, «РУСАЛ» және En+ Group компанияларының иесі Олег Дерипаска, сондай-ақ ішкі істер министрі Владимир Колокольцев, Росгвардияның басшысы Виктор Золотов пен Тула облысының губернаторы Алексей Дюмин. Санкциялық тізімге ілінген аталмыш компаниялар мен жеке тұлғалардың Құрама Штаттар аумағындағы барлық активтері бұғақталады. Мұның үстіне, америкалық азаматтардың осы тізімге енгендермен, қандай да болмасын, бизнес жүргізуіне тыйым салынған. Әуел баста санкциялар көңіл аударарлықтай қабылдана қойған жоқ, бірақ дүйсенбіде, 9 сәуірде, әлемдегі аса ірі алюминий өндірушілердің бірі – «РУСАЛ» біріккен компаниясы Гонконг биржасында кредиттік міндеттемелері бойынша санкцияларға қатысты техникалық дефолт мүмкіндігі туралы хабарламасын жария етті. Сол хабарламада өзінің ағымдағы міндеттерін орындауға ниетті екендігі жайында айтылған, алайда, нарық бұған «РУСАЛ» акциялары бағасының тез төмендеуімен ықпалын білдірді. Сол кезде Forbes.ru хабарлағанындай, Гонконгтағы да, Мәскеу биржасында да акциялар құны шамамен 50%-ға құлап кеткен. Жеке санкциялар әлемдік экономикаға әсерін тигізді. Мысалы, алюминийге бағалар, компанияның негізгі иесі Олег Дерипаскаға қарсы енгізілген санкциялар салдарынан нарыққа металды жеткізу қарқыны бұзылады деген қауіппен өсе бастады. 9 сәуірде күндіз алюминийге фьючерстер Лондон металдар биржасында 2,5%-ға, тоннасы 2 092 долларға дейін өсті. «РУСАЛ» біріккен компаниясы бастапқы алюминий мен алюминий тотығын өндіруші әлемдегі аса ірі компаниялардың бірі болып табылады.
Оның өнімдерін өткізетін нарықтары – Еуропа, Ресей мен ТМД елдері, Солтүстік Америка, Оңтүстік-Шығыс Азия, Жапония мен Корея. Айтпақшы, өнімнің 20%-дайы Құрама Штаттарға өткізіледі.Ресей қандай күй кешуде?
«РИА Новости» агенттігінің хабарлауынша, «РУСАЛ» компанияға қарсы шектеулер енгізілгеннен кейін өз клиенттеріне төлемдерін тоқтата тұруларын сұрапты. Бұл өтініштерін олар санкциялар зардаптарын бағалау қажеттілігімен түсіндіреді. Жағдайды күрделендіріп жіберуі ықтимал қауіп – Дерипасканың «РУСАЛ» компаниясы тарапынан 7,6 млрд доллар және En+ Group жағынан 12,1 млрд үлкен қарызы бар. Қор биржасының құлдырауы салдарынан жалпы алғанда ресейлік бизнесмендер ең аз дегенде 12 млрд долларларын жоғалтқан. Бәрінен көп Олег Дерипаска мен Владимир Потаниннің байлығы азайған – екеуінің де дәулеті 1,3 млрд-қа ортайыпты, Виктор Вексельбергтікі – 1 млрд-қа, ал Сулейман Керимовта – 840 млн-ға азайыпты. Ресей үкіметі сол кезде-ақ АҚШ-тың санкцияларына ұшыраған компанияларға көмек көрсетуге дайын екенін мәлімдеді. Қор және валюталық нарықтар жаңа антирекордтар орнатып жатты. ТАСС былай деп хбарлады, 9 сәуірдің қорытындысы бойынша Мәскеу банкаралық валюталық биржасы (ММВБ) индексі 8,34%-ға түсіп кеткен, Ресей сауда жүйесі (РТС) индексі – 11,44%-ға төмендеген. 10 сәуірде күннің соңына ММВБ 3,96%-ын қайтарыпты, әйтсе де сол мезгілге РТС индексі одан әрі – тағы 0,38 пайыздық пунктке төмендей түскен. 11 сәуірдегі рубльдің долларға бағамы, Астана уақытымен 02:49-ға, бірлігі үшін 63,02 рубльге дейін түсіп кеткен, евро – 77,85 рубльге түскен. 9 сәуірде бұл көрсеткіштер, тиісінше 60,15 және 74,08 рубль болған.
Сарапшылар сан саққа жүгіртеді
Техникалық дефолт, бизнесте ақша бар, бірақ техникалық жағдайларға байланысты ақша ағыны тоқтап қалады, деп түсіндіреді қазақстандық экономист Алмас Чукин. «Басқа жағынан алғанда, Олег Дерипаска банкрот болуы мүмкін. Қалыпты жағдайда оның табысты бизнесі бар, бірақ кез-келген қарапайым бизнес сияқты, дамуға және басқа да мақсаттарға оның қарыздары 12 млрд доллар құрап отыр. Оның ішінде 5 миллиарды – бұл евробондтар, қарыздың қатаң түрі», – дейді Чукин Informburo.kz журналисімен әңгімесінде. Евробондтар арқылы ақша алғанда «ковенанттар» – қарызды қайтаруға мүмкіндік беретін қамтамасыз етуші шаралар – бекітіледі. Өзіне міндеттемелерді акционерлік компания алғаннан кейін, деп атап көрсетеді экономист, акциялар шарасыз формальды емес қарыздың бір бөлігіне айналады. Олег Дерипасканың компаниясының қарыздарын сатып алған адамдар, егер оның бизнесі өзіне қабылдаған міндеттемелері бойынша есептесе алмаса, онда бизнесменнің меншігін, акцияларын ала бастауға болатынын түсінеді. Бұл инвесторды сабырлылыққа шақыратын елеулі фактор, құнды қағаздар артында нақты зауыттар мен активтер тұр. Ал мұндағы жағдайда, табан астында акциялар құны нөлге айналды. Шын мәнінде келісім-шарттың маңызы қалмады, өйткені ол ештеңеге сүйене алмайды. Егерде осыған ұқсас жайт туындай қалса, қарыздық міндеттемелерді ұстаушы шұғыл түрде өз қарызын өтеуін талап етуге құқылы. Бірақ бірде-бір бизнес қарыздарын бір сәтте жаба салуға жағдайы жоқ – бәрі де қарызды жабудың тізбегі бойынша жоспар құрады», – дейді А. Чукин. Оның айтуынша, қазір «РУСАЛ» айналасындағы жағдай екі жолмен өрбуі мүмкін. Біріншісі – «жұмсақ» нұсқа, бұл ретте Ресей үкіметі Олег Дерипаскаға елдің тұрғындары есебінен ақша береді, сөйтіп оны құтқарады. Қиынырақ нұсқасы – мемлекет меншігіне айналдыру. «Егерде қарыз көлемі ауқымды болса, мемлекет бәлкім, ақша беріп қана қоймайды, компанияның қомақты пакетін алып қояды. (...) Инвесторлар – қорқақтау жаратылыстан болып келеді. Дәл қазір Олег Дерипасканың компанияларына қатынастары болмаса да, бірақ басқа ресейлік компаниялар акцияларын ұстаушылар болғанымен, – бәрібір қашып жатыр. Өйткені, ештеңе айырып болар емес, келесі жолы кімге қарсы тосқауылдар енгізілмек», – деп қорытты ойын Алмас Чукин.
Қазақстанға әсері қандай?
Ресей Қазақстанның ірі сауда әріптесі және солай болып қалады да. ҚР Ұлттық экономика министрлігі Статистика жөніндегі комитетінің мәліметтері бойынша 2017 жылы екі ел арасындағы сауда айналымы 16 миллиард долларды құраған. Оның үстіне Ресейден Қазақстанға инвестициялар айтарлықтай ынталы түсіп жатыр деп айта алмаймыз. 2017 жылдың тоғыз айында мұндай салымдар көлемі 870,5 млн долларды құрап, жалпы шетелдік күрделі қаржы көлемінің 5,5%-ына ғана тең келген. «РУСАЛ» компаниясының Қазақстандағы өндіруші компанияларда айтарлықтай үлесі бар. О.Дерипасканың компаниясы Павлодар облысындағы Богатырь кенішінде көмір өндіретін «Богатырь» ЖШС-нің 50%-ына иелік етеді. Кәсіпорын үлесінің екінші жартысы – «Самұрық-Энерго» АҚ-ның еншісінде. Көмір, негізінен қазақстандық және ресейлік электр стансаларына жөнелтілгенімен, өнімнің 75%-дайы өз еліміздің сатып алушыларына жеткізіледі екен. Санкциялық тізімде біздің елімізбен бизнестері мүдделі басқа да іскерлер бар екен. Мәселен, Андрей Костин – мемлекеттің қатысуымен танылған ірі банк – ВТБ қаржы институтының президенті, басқарма төрағасы. Бұл жүйенің Қазақстанда еншілес құрылымы – «ВТБ банкі» АҚ-ның ЕБ (еншілес бірлестігі) бар. Ұлттық банк мәліметтеріне сәйкес, бұл қаржы институты қазақстандық банктер арасында активтерінің көлемі бойынша 21 орында тұр. Тізімдегі тағы екі «нарқасқа» мұнай-газ саласының өкілдері, бұлар – «Газпром» басқармасының төрағасы Алексей Миллер және «Газпром нефть» компаниясы директорлар кеңесінің мүшесі Сергей Фурсенко. Қазақстанда «Газпром нефть – Қазақстан» еншілес кәсіпорны жұмыс жасайды, ол Омск мұнай өңдеу зауытынан мұнай өнімдерін сатумен айналысады. Бұл компанияның басқаруында бүкіл еліміз бойынша 70 автожанармай құю стансасы бар. 10 сәуірдегі үкімет отырысынан кейін ұлттық экономика министрі Тимур Сүлейменов «РУСАЛ» акцияларының құлдырап құлауына қатысты өз ойын «бұл нарықтың жүйке талмасының салдары» деп білдірді. Санкциялардың Қазақстан экономикасына әсерін бағалау үшін, министр пікірінше, Ресейдегі болып жатқан жайттарды жіті қадағалау қажет.
''Еркіндіктегі ұлттық валюта бағамы ішкі және сыртқы факторларға байланысты. Олардың оң серпіні ішкі валюта нарығындағы теңгерімді қамтамасыз етеді. Теңге бағамы іргелі факторлар арасындағы ара-қатынасты толығымен көрсетеді. Валюталық реттеу және валюталық бақылау туралы заң жобасы мақұлданған Мәжілістің жалпы отырысынан кейін журналистер сұрақтарына жауап бере келіп, теңге бағамының ауытқуына қатысты Ұлттық банк төрағасы Данияр Ақышев: «Ресей рублінің әлсіреуі аптаның басынан бастап шамамен 10% болды. Ресей – Қазақстанның негізгі сауда әріптесі. Екі ел ЕАЭО қатысушылары болып табылады. Бұл екі елдегі үдерістердің өзара тәуелділігін білдіреді. Нәтижесінде теңге екі күн ішінде (9 және 10 сәуір) 1,8%-ке әлсіреді», – деді. ҰБ төрағасы екі елдің ұлттық валюталарының әлсіреу қарқынындағы айырма, біріншіден, Қазақстанға АҚШ санкциялары қолданылмайтынына байланысты екендігін, екіншіден, Ресей рублі теңгеге әсер ететін маңызды, бірақ жалғыз фактор еместігін атап өтті. «Қазақстанның макроэкономикалық көрсеткіштері тұрақты. Мұнайға баға бір баррель үшін 70 АҚШ долларын құрайды. Экономикалық өсу қарқыны жоғары. Төлем балансындағы ахуал жақсаруда. Инфляция нысаналы дәліз шегінде. Әлемдік шикізат нарықтарында тұрақтылық болған жағдайда, Қазақстан экономикасы үшін тәуекелдер шамалы деп бағаланады». Үшіншіден, Қазақстан қор нарығының Ресей нарығымен салыстырғанда өтімділігі жоғары емес. Оның жаһандық қаржы нарықтарына ықпалдасуы аз. Яғни Қазақстан мен Ресейдегі ахуал әр түрлі. Сондай-ақ АҚШ-тың немесе басқа елдердің РФ-ге қатысты ықтимал әрекеттерінен ресей қаржы нарығындағы жағдай жалғасуы мүмкін. Бұл қысқа мерзімді болашақта теңгенің құбылмалылығы сақталуына әкеледі. «Қазақстанның барынша жақсы макроэкономикалық көрсеткіштерін ескере отырып, теңге бағамының құбылуы әлсіреу, иә нығаю жағына қарай орын алуы мүмкін. Бағамның ағымдағы құбылмалылығының нарықтық және психологиялық сипаты бар. Айтарлықтай ауытқу кезеңінде активтерді шұғыл ауыстыру кейіннен едәуір шығындарға апаруы мүмкін», – деп қорытындылады Данияр Ақышев.
Теңге бағамы «қобалжуы» мәселесіне қайта оралсақ. «Қазақстанға қазіргі жағдайда не күтуге болады? Осының алдындағы жүзеге асырылған девальвация қор жинақтауға мұрша берді. Егер бұған дейін теңгенің рубльге қатысты бағамы әдетте 1:5 болса, ол соңғы кездерге дейін 1:5,5 аумағында немесе аздап арзандау болып келді. Яғни рубльдің әлдебір шекке дейін құлауын біз күйзеліссіз еңсере аламыз. Егерде бұл шектен асып кету орын алса, теңгенің девальвацияға ұшырауы уақыт еншісіне ғана тәуелді боп қалады», – дейді тағы бір саясаттанушы-экономист Талғат Қалиев. Сарапшы санкциялық тізімдегі кәсіпорындардың Қазақстанға қандай қатысы барлығын түсінуіміз маңызды, деп атап көрсетеді. «Басқаша айтқанда, Қазақстанның Ресейдегі санкцияға ілінген кәсіпорындармен байланысы бар ма? Біздің Ұлттық қорымыз қаражатының қайсыбір бөлігі қазір қор нарығында құндары құлдырап жатқан компаниялардың құнды қағаздары мен акцияларына салынбаған ба? Егер салынған болса, елеулі шығыстарға ұшырарымыз хақ», – деп қорытады Т.Қалиев.
Исатай ҚАМБАРОВ
1490 рет
көрсетілді0
пікір