- Атамекен
- 16 Қаңтар, 2020
Рекордтық көлемде қаражат жинады
Тұрғын үй құрылыс жинақ банкіндегі («Бәйтерек» холдингінің еншілес ұйымы) несие мөлшерлемесінің тиімділігіне байланысты ондағы жинақтау шоттарына деген сұраныс жоғары. Банк клиенттері тұрғын үйдің бастапқы жарнасына қажетті қаражатты жинақтай отырып, болашақ баспаналарын жылдық 2-8,5% мөлшерлемемен несиеге ала алады.
Осы мүмкіндікті 48 414 қазақстандық отбасы пайдаланды. Күн сайын банктің көмегімен кемінде 160 салымшы қоныс тойын атап өтуде. Бұл туралы Тұрғын үй құрылыс жинақ банкінің басқарма төрайымы Ләззат Ибрагимова қорытынды баспасөз-конференциясы барысында мәлімдеді. Оның айтуынша, былтырғы жылдың қорытындысы бойынша Тұрғын үй құрылыс жинақ банкінің несиелік портфелі 1 триллион теңге болған. Бұған қоса, банк салымшылары депозиттеріне тұрақты түрде қаражат жинақтауда. Бұған төменгі деңгейдегі, яғни 0,18%-ға тең NPL дәлел (90 күннен асқан мерзімі өткен займдар) 8%-дық орташа банктік деңгеймен салыстырғанда өте жақсы көрсеткіш. «Тұрғын үй құрылыс жинақ банкі өнімдері қолжетімді болғандықтан, сондай-ақ, халықтың банкке деген үлкен сенімділігінің нәтижесінде осы өнімдерге сұраныс өте жоғары. Біз алға қойған мақсаттарымызды толықтай орындап шықтық деп санаймыз. Дәлірек айтсақ, биыл аса маңызды мемлекеттік міндеттердің бірі – табысы төмен отбасыларға арналған «Бақытты отбасы» бағдарламасын дайындап, іске қостық. Қазіргі сәтте 4 053 отбасы қоныс тойын атап өтті. Бұдан бөлек тағы 736 отбасы өтінімдері бойынша оң шешім алып, қазір өздеріне лайықты үйлерді іздестіру үстінде. Яғни, енді мыңдаған кішкентай бүлдіршін жалдамалы пәтерде емес, өз үйінде тұратын болады», – деп атап өтті Ләззат Ибрагимова. Ал, «Бақытты отбасы» бағдарламасының талаптарына сәйкес келмеген отбасылар «Нұрлы жер» бағдарламасына қатысуға мүмкіндік алды. Әрбір алтыншы несиені банк осы бағдарлама шеңберінде берді. Жалпы, аталған бағыт бойынша 2019 жылы 8000 отбасы баспаналы болып, оларға пәтер кілті табысталды. Мұнымен қоса, банк 2019 жылы «Әскери баспана» тұрғын үй бағдарламасының жаңартылған шарттары бойынша әскери қызметкерлерге арнап 3 811 займ берді. Бұл – Тұрғын үй құрылыс жинақ банкінің өз жобасы. Оған бюджеттен еш қаражат бөлінбеді. Банк шамамен 100 млрд. теңге көлемінде өзінің жеке және нарықтан түскен қаражатын пайдаланды. Осылайша, екі жылдың ішінде 6 592 әскери қызметкер баспаналы болды. Қазіргі кезде банкте болашақ баспаналары үшін 1,5 млн қазақстандық қаражат жинақтауда. Олардың 384 242-і биыл ашылған депозит. Салымшылардың баспаналы болуына мемлекет тарапынан да көмек көрсетілуде. Яғни, жыл сайын Тұрғын үй құрылыс жинақ банкінің салымшыларына 20% көлемінде сыйлықақы беріледі. Ол 200 айлық есептік көрсеткіштен (505 000 теңге) аспайтын сомаға төленеді. 2019 жылдың қорытындысы бойынша ең жоғары мемлекет сыйлықақысы – 101 000 теңге. Бүгінде Тұрғын үй құрылыс жинақ банкі салымшыларына сапалы қызмет көрсету мақсатында бизнес-процестерді оңтайландыру үшін үздіксіз жұмыс істеп, 2023 жылға қарай олардың 70%-ын онлайн-режимде ұсынуға барынша жағдай жасауда. Осы орайда, биыл енгізілген жаңа жобалардың бірі – алдын ала банктік біліктілікті іске қосу және банк кеңесшілері арқылы қашықтан несиелік өтінімдерді қабылдау. Енді Тұрғын үй құрылыс жинақ банкінің клиенттеріне несие бойынша өз мүмкіндіктерін алдын ала бағалау үшін банк бөлімшесіне барудың қажеті жоқ. Олар өзіне ыңғайлы уақытта кез келген жерге банк кеңесшісін шақыртуына болады. Олар қашықтан депозит ашумен қатар, салымшының төлем қабілетін шамалап есептеп, алдын ала мақұлданған несие сомасы көрсетілген арнайы сертификатты береді. Бұл сертификат 3 айға дейін жарамды. Осы уақыт ішінде салымшы мүмкіндіктерін біле отырып, өзіне лайықты баспананы іздеп, займ алу үшін банкке хабарласа алады. Аталған жоба клиенттердің банк бөлімшесіне баруын екі есеге қысқартуға мүмкіндік берді. «Қазақстанның тұрғын үй құрылыс жинақ банкі» АҚ – Тұрғын үй құрылыс жинақ жүйесін жүзеге асыратын еліміздегі жалғыз банк. Банк құрылыс жинақ кассаларының Еуропалық Федерациясында (ЕФССК) және халықаралық тұрғын үйді қаржыландыру одағына кіреді. Тұрғын үй құрылыс жинақ банкінің жалғыз акционері – «Бәйтерек» Ұлттық басқарушы холдингі АҚ.
Нұрлан ҚҰМАР
483 рет
көрсетілді0
пікір