• Атамекен
• 02 Қыркүйек, 2020

Алатауда тау туризмі дамыса...

Алматыдағы Шымбұлақ тау курортында туризм саласындағы қоғамдық және мемлекеттік ұйымдар басшыларының кездесуі өтті. Кездесуді ҚР мәдениет және спорт вице-министрі Өркен Бисақаев ашып, қазіргі күрделі жағдайда нарықты нығайта отырып, бизнес пен мемлекет арасында сындарлы диалог құру қажеттілігін алға тартты.

Талқылаудың басты тақы­рыбы таудағы 2020-2021 жылғы қысқы маусымға дайын­дық және ұлттық парктерде эко­туризмді дамыту мәселелері болды.
Шымбұлақ жыл бойынғы тау курортының тұсаукесері барысында компанияның бас директоры Ринат Әбдірах­ма­нов туроператорлармен бірге пакеттік ұсыныстарды қалып­тас­тыруға ерекше назар аударып, туристік қауымдастықтар бас­шыларымен курортты одан әрі дамытуды талқылады.
«Тау шаңғысы демалысын ұйымдастыру – Қазақстанда өте перспективалы бизнес. Өйткені шетелдік туристердің біздің тауларымызға деген қызығушылығы үлкен және біздің туристеріміздің Еуро­паның немесе Орталық Азия елдерінің тау шаңғы курорт­тарына деген сұранысы бар», – деді Turan Asia LLP директоры Гүлғайша Қасен­ханқызы.
Айта кету керек, статистикаға сәйкес, тау шаңғысы турисі демалыс үшін күніне орташа есеппен 250 доллар жұмсайды, ал салыстырмалы түрде жаға­жайға баратын турист тек 50 доллар жұмсайды екен.
Кездесудің екінші бөлімі толы­ғымен экотуризм және турис­тердің экологиялық сауат­тылығын арттыру мәселелеріне арналды.
«Тамыр» табиғат аясы мекте­бінің идеялық жетекшісі Әсел Исанова туристерді қоршаған ортаға ұқыпты қарауға үйрету жоспарлары туралы айтып берді. «Біз жұртшылыққа тау­дағы жүріс-тұрыс ереже­лерін қоғамдық дәрістер, ақпа­раттық турлар, білім беру және шабыттандыратын медиа контент арқылы таныс­тыра­тын боламыз. Біздің басты мақ­сатымыз – адамның таби­ғатта қауіпсіз болуын, сондай-ақ табиғатты адамның зиянды әсерінен қорғауды қамтамасыз ету», – деді Әсел Исанова.
Әрі қарай спикер мектеп жанынан эко-волонтерлік қоз­ғалыс құрылатынын, оған аз уақыт ішінде 600-ден астам адам тіркелгенін хабарлады. Қозғалысқа қатысушылар арасында мектеп оқушылары мен студенттерден басқа, кәсіби еріктілер, шығармашылық адамдары, экологтар, биологтар, ақпараттық технологиялар саласындағы мамандар және басқа да мамандандырылған тұлғалар бар. «Бірлескен іс-әрекеттердің арқасында біз парктің ластануы, флора мен фаунаның жойылуы, туристік ағындарды реттеу және тағы басқа маңызды мәселелерді шешуге үлкен үлес қоса алаты­нымызға сенімдімін», – деп қорытындылады Әсел Исанова.
Айта кету керек, бұл кездесу алғаш рет теңіз деңгейінен 3200 метр биіктікте өтті.
Жалпы «Kazakh Tourism» ұлттық компаниясы» акцио­нерлік қоғамы Қазақстан Республикасы үкіметінің 2017 жылғы шілдедегі қаулысымен құрылды. Компанияның негізгі міндеттері елдің туристік әлеуе­тін шетелде ілгерілету, MICE іс-шараларын тарту, сондай-ақ Қазақстанның туристік саласына инвести­циялар тарту болып табылады.
Еліміздегі саяси жағдайдың тұрақтылығы, қазақ халқының қонақжайлығы, тұрақты нарық­тық бәсекелестік, мемле­кеттік қолдау өз кезегінде туризм индустриясының гүлденуіне қолайлы кеңістік қалыптасты­рып үлгерді. Десек те, туризм саласында әлі де шешілмеген көптеген мәселелер бар. Алматы облысындағы тау шаңғы ку­рорттарына келе­тін туристер үшін жағымсыз жаңалықтардың бірі – қа­зіргі заманғы халық­аралық стандарттарға сәйкес келетін туризм және қонақ­жайлылық индустриясы нысан­дарының жетіспеушілігі. Бүгінде туризм әлемдегі ең пайдалы бизнестердің бірі екені анық. Сондықтан Алатауда тау туризмін уақыт талабына сай дамытсақ, ел экономикасына мол қаржы әкелері ақиқат.

Нұрлан ҚҰМАР