- Қаржы
- 18 Наурыз, 2021
Қаржы тақырыбына арналған кітап
Тұңғыш Президент – Елбасы Нұрсұлтан Назарбаевтың «Болашаққа бағдар: Рухани жаңғыру» атты бағдарламалық мақаласында қоғамдық және гуманитарлық ғылымдарды дамыту бойынша «Жаңа гуманитарлық білім. Қазақ тіліндегі 100 жаңа оқулық» жобасы елімізде сәтті іске асырылып жатыр.
Осыған орай, таяуда Алматыдағы «Дәуір» баспасынан Жеке қаражатты басқаруға арналған алғашқы қазақтілді кітап жарық көрді. Ұлттық аударма бюросы тәржімалаған Томас Гарман мен Форг Рэймондтың «Жеке қаражат» оқулығы – экономикада қаржы, несие, бағалы қағаздар, инвестициялау, сақтандыру, салық жүйесі, менеджмент тақырыптарын топтастырып жүйелеу арқылы жеке қаражатты өз алдына дербес білім курсына бөліп шығарған түбегейлі еңбек. Қаржыны тиімді жұмсаудың амалдары сипатталып, жүйеленген бұл оқулық үнемдеу мен инвестициялауға, несиені басқаруға, салықты жоспарлауға, несие картасы бойынша борышыңызды азайтуға септігін тигізіп, қаржылай тұрақты болашағыңызды қалыптастыруға көмектеседі. Сан түрлі қаржы мәселелерін қамтыған кейстер мен кәсіби мамандар кеңесі тақырыпты жан-жақты түсіндіріп, дұрыс шешім қабылдауға мүмкіндік береді. Оқулықтың мақсаты – кіріс пен отбасылық бюджетті басқару, несие, инвестициялау, сақтандыру, зейнетақы жинағы мен салық төлемдерін жоспарлау арқылы қаржылық қауіпсіздікке жетуді үйрету. Қазақ тіліне оқулықтың 13-басылымы аударылып, Қазақстанға бейімделіп аударылды. Әр тарау елімізге қатысты тиісті ақпаратпен, заңдармен және кейстермен толықтырылған.
Кітап экономика, қаржы, менеджмент, маркетинг, есеп және аудит мамандықтарында оқитын студенттерге, оқытушыларға және қаржысын тиімді басқаруға ниетті барлық оқырманға арналған. 17 тараудан тұратын кітаптың әр бөлімінің соңында тақырыпты қорытындылауға арналған талқылау сұрақтары, тапсырмалар, есептер бар. Кейбір тарауларға еліміздегі жағдайға байланысты тақырыпшалар қосылса, өзгелерінде арнайы «Қазақстанда» деген айдар бар. Кітапты мемлекетімізге бейімдеуге отандық білікті ғалымдар мен тәжірибелі мамандар атсалысты.
САЛТАНАТ ҚАЖЫКЕН
926 рет
көрсетілді0
пікір