- Бизнес & Қоғам
- 22 Сәуір, 2021
Жергілікті өзін-өзі басқаруды дамыту орталықтары құрылмақ
Заманауи әлемде мемлекеттің әл-ауқаты жалпы ұлт әлеуетін және жекелей алғанда азаматтардың мүмкіндіктерін тиімді пайдаланумен айқындалады. Сондықтан көптеген дамыған елдер жергілікті өзін-өзі басқару үлгісін жетілдіруге ұмтылады.
Биліктің осы деңгейі халыққа барынша жақын, негізінен оны халық қалыптастырады, оның бақылауында болады және халықтың негізгі өмірлік қажеттілігін қамтамасыз ету мәселесін шешеді. Жергілікті өзін-өзі басқару ұтымды құрылса, тек жергілікті ресурстардың жұмсауы оңтайланып қана қоймай, сонымен қатар, халықтың билікке деген сенімі едәуір артады.
Жергілікті өзін-өзі басқаруды дамытуға жәрдемдесу және шешім қабылдау процесіне халықтың қатысуын жандандыру мақсатында төрт өңірде (Атырау, Ақтөбе, Жамбыл және Шығыс Қазақстан облыстары) пилоттық Сommunity орталықтары құрылатын болады.
Орталықтардың қызметі жергілікті қоғамдастықты дамыту моделін құруға бағытталады. Олардың базасында жергілікті жерлердегі сарапшылар (оффлайн және онлайн) жергілікті өзін-өзі басқару (ЖӨБ) бойынша консультациялар береді. Яғни, жергілікті халықтың шешім қабылдау процесіне қатысу мәселелері бойынша кеңес алу мүмкіндігі болады: жиналыстарды, жергілікті қоғамдастық жиындарын ұйымдастыру, жергілікті қоғамдастық мүшелігіне кіру, ЖӨБ бойынша НҚА түсіндіру және басқа да мәселелер.
Орталықтар Ақпарат және қоғамдық даму министрлігі мен Азаматтық бастамаларды қолдау орталығымен «Жергілікті өзін-өзі басқаруды дамытуға бағытталған іс-шаралар кешенін ұйымдастыру» гранттық жобасы шеңберінде «Маңғыстау облысының Азаматтық альянсы» ЗТБ күшімен іске қосылады.
Айта кету керек, бұл жоба Қазақстанның 8 облысында (Атырау, Ақтөбе, Жамбыл, Шығыс Қазақстан, Ақмола, Павлодар, Қарағанды және Қостанай облыстары) жүзеге асырылады. Жоба барысында ұйымдастырушылар жергілікті маңызды мәселелерді шешу үшін жалпы құны 8 млн.теңгені құрайтын (әр өңірге 1 млн. теңге) шағын гранттар конкурсын өткізеді.
САЛТАНАТ ҚАЖЫКЕН
939 рет
көрсетілді0
пікір