- Бизнес & Қоғам
- 13 Мамыр, 2021
Білімді ұрпақ, білікті маман – мемлекеттің басты капиталы
Әлемдік ғылым-білім саласында университеттердің орны ерек. Себебі университет – жоғары білім беру ордасы ғана емес, ғылым мен инновацияның лабораториясы, өндірістің алғашқы баспалдағы. Бұлай дейтініміз, кешенді зерттеулер, тың идеялар, жаңа ізденістер көбіне университет қабырғасында жасалады.
Талантты жастар, білімді ұрпақ – мемлекеттің басты капиталы екенін есте ұстауымыз керек. Халқымыздың сапалық құрамы өзгенің емес, осы елдің мүддесіне қызмет етуі керек емес пе? Бұл орайда, бакалавриат, магистратура мен докторантура бағдарламалары бойынша білікті мамандарды Қазақстанның жоғары оқу орындарынан өсіріп шығуға талпынуымыз қажет. Университет рейтингтерін жасауда оны бітіріп шыққан түлектердің білім деңгейі мен одан кейінгі жетістіктері ғана емес, ондағы ғылыми зерттеулердің сапасы қоса ескеріледі.
2014 жылдан бері QS компаниясы Дамушы Еуропа мен Орталық Азия мемлекеттеріндегі университеттердің бөлек рейтингісін жасақтауды қолға алған болатын. Содан бері британдық Quacquarelli Symonds (QS) компаниясы әлемдік озық жоғары оқу орындарының рейтингісін жыл сайын жариялап келеді. Әл-Фараби атындағы Қазақ ұлттық университеті – Quacquarelli Symonds (QS) агенттігінің жаhандық рейтингінде әлемдегі үздік 200 университеттің қатарына кірген еліміздегі бірегей оқу орны.
2021 жылдың 28-30 сәуірі аралығында әл-Фараби атындағы Қазақ ұлттық университеті, химия және химиялық технология факультеті (физикалық химия, катализ және мұнай-химия кафедрасы) мен Новосібір мемлекеттік техникалық университеті (Ресей) бірлесіп ұйымдастырған «Функционалды материалдардың химиялық технологиялары» атты VII халықаралық ғылыми-практикалық конференция өтті.
Бұл 2014 жылдан бері екі университет арасындағы катализ, материалдарды синтездеу, экологиялық, химиялық технология cаласындағы мәселелерді талқылап, шешу үшін шетелдік және қазақстандық ғалымдардың күш-жігерін біріктіруге бағытталған ірі халықаралық ғылыми іс-шара болып табылады. Аталмыш конференция дәстүрлі түрде екі унверситет тарапынан жыл сайын Ресей мен Қазақстанда кезектесіп өткізіледі.
Конференция аясында «Функционалды материалдарды синтездеу, модификациялау және өндіру процестерін болжаудың ғылыми негіздері», «Функционалды материалдарды алудың экологиялық аспектілері», «Химиялық технологиялардың процестері мен құрылғылары» және «Физикалық-химиялық зерттеулер мұнай-химиясы және мұнай өңдеудің каталитикалық процестері мен катализаторлары» тақырыптарында баяндамалар жасалды.
Конференцияға қатысушылардың жалпы саны 395 адамды құрады, оның ішінде шетелден 253 адам және ҚазҰУ студенттері мен жас ғалымдарынан 142 адам қатысты. Жалпы 132 баяндама тыңдалды, оның ішінде 80 баяндама ауызша және 52 баяндама постер презентация түрінде қорғалды. Конференция нәтижелері бойынша физикалық химия, катализ және мұнай химиясы кафедрасының Phd докторанттары Ж.Құбашева, А.Рахым, А.Баршабаева, М.Булыбаев жүлделі I орындарға, ал Zhang Xuliang III орынға ие болды. Пандемияға қарамастан онлайн форматта ұйымдастырылған конференция әлемде болып жатқан ғылыми жетістіктермен, ғылыми-зерттеу жұмыстарындағы озық тәжірибелермен бөлісу арқылы біліміңді толықтырып, ғылыми-зерттеуде жаңа идеяларды, бағыттарды қалыптастыруға мүмкіншіліктің бар екенін айқындап бергендей болды.
Сондай-ақ кафедраның оқытушылары алыс және жақын шетелдерде болатын халықаралық конференцияларға қатысып, баяндамалар жасау арқылы өзінің біліктілігін арттырып келеді. Кафедрада халықаралық гранттар мен мемлекеттік бағдарламалар арқылы жүзеге асатын жаңа ғылыми бағыттағы зерттеулер қалыптасқан. Сол арқылы жас ғалымдардың ғылымға деген құлшынысы оянып, «ғылыми мектептер» пайда болуда.
Конференция нәтижелері бойынша РҒДИ деректер базасында индекстелетін, көлемі 309 бет ғылыми-зерттеу еңбектерінің жинағы шығарылды. Web of Science деректер базасында индекстелетін ATEC Web of Conferences журналының редакциясымен журналдың арнайы шығарылымында мақалаларды жариялау туралы келісімге қол жеткізілді.
Ермек ӘУБӘКІРОВ,
Әл-Фараби атындағы ҚазҰУ
кафедра меңгерушісі,
химия ғылымдарының докторы
Назым СМАҒҰЛОВА,
химия ғылымдарының кандидаты, доцент
787 рет
көрсетілді0
пікір