- Бизнес & Қоғам
- 13 Мамыр, 2021
Кәсіпкерлік идеяларға жарты миллионнан беріледі
Қазақстанның 20 ҮЕҰ өздерінің кәсіпкерлік идеяларын іске асыру үшін 500 мың теңгеден алады. Бұл туралы «Әлеуметтік талдау және әріптестік орталығы» қоғамдық қорының «Қазақстанның ҮЕҰ арасында әлеуметтік кәсіпкерлікті ынталандыру және танымал ету» республикалық жобасы шеңберінде әлеуметтік кәсіпкерлер арасында шағын гранттар конкурсын бастауға арналған онлайн баспасөз-конференциясы барысында жоба үйлестірушісі, Алма Қонарова айтты.
Салтанат ҚАЖЫКЕН
Жобаны іске асыру барысында еліміздегі әлеуметтік кәсіпкерліктің жай-күйі бойынша қолданбалы зерттеулер жүргізу, сәтті кейстер жинау және ҚР-дағы әлеуметтік кәсіпорындардың деректер базасын құру, ҮЕҰ-конкурсқа қатысушылар үшін оқыту вебинарларын өткізу, сондай-ақ гранттық конкурс пен жобаны көпшілік таныстырылымдар, БАҚ және әлеуметтік желілер арқылы ақпараттық сүйемелдеу жоспарланған. «Жыл қорытындысы бойынша қолдау тапқан жобалардың кем дегенде 30%-ы өзін-өзі қаржыландыру немесе жергілікті деңгейде қолдау арқылы, сондай-ақ осы жобаларды іске асыру аясында тұрақты жалғасатын болады деп жоспарлануда», – деді Алма Қонарова.
Азаматтық қоғам істері комитеті төрағасының орынбасары Гүлбара Сұлтанова өзінің құттықтау сөзінде мемлекеттің әлеуметтік кәсіпкерлікті дамытуға және оны заңнамалық деңгейде қолдауға мүдделілігін атап өтті. «Азаматтық бастамаларды қолдау орталығы» КЕАҚ басқарма төрағасы Лима Диас шағын гранттар конкурсына қатысушыларды қолдау туралы өз ойын ортаға салды. «Green TAL» әлеуметтік шеберханасының негізін қалаушы Эмин Әскеров жобаның барлық қатысушыларына консультациялық көмек көрсетуге дайын екенін білдіріп, әлеуметтік кәсіпкерлік саласындағы өз тәжірибесі туралы айтты.
Баспасөз конференциясы барысында өтінім беру тәртібі бойынша сұрақтар қойылып, кураторлар толық жауап берді. Шара соңында жоба кураторлары шағын гранттар конкурсының әлеуетті қатысушылары үшін алғашқы вебинарды өткізу жөніндегі хаттарды қабылдау күндерін атап өтті.
Жобаны Азаматтық бастамаларды қолдау орталығының жетекшілігімен «Әлеуметтік талдау және әріптестік орталығы» қоғамдық қоры жүзеге асыруда.
597 рет
көрсетілді0
пікір