- Бизнес & Қоғам
- 19 Мамыр, 2021
Отандық вакцинаның тиімділігі жоғары
Еліміз коронавирустық инфекцияға қарсы өз вакцинасын әзірлеген әлемдегі алтыншы ел атанды. COVID-19-ға қарсы отандық екпе QazVac сауда маркасымен шықты. Енді елде екпеге қатысты таңдау жасауға мүмкіндік бар.
Бақыт Бөжеева
Вакцина Биологиялық қауіпсіздік проблемалары ғылыми зерттеу институтының базасында жасалған. Оның қауіпсіздігі толық дәлелденді. Мамандардың айтуынша, жаңа өнім коронавирустық инфекцияға қарсы тұрақты иммунитетті қалыптастырады.
«Бес түрлі вакцинаның арасында алғаш шыққан бұл инактивтелген, яғни өлтірілген вакцина. Бұл өлтірілген вирустан жасалған. Вакцинациядан өткен организм ауруға шалдықпайды. Оның ішінде ол өспейді. Әсер етпейді. Сондықтан да оны біз клиникалық зерттеулерден өткізген кезде жоғары иммунагенді және толық қауіпсіздік көрсеткіштерді дәлелдеп отырмыз», – деді Биологиялық қауіпсіздік проблемалары ғылыми-зерттеу институтының бас директоры Күнсұлу Закарья.
Айта кету керек, биылғы жылдың басында елімізде ресейлік «Спутник V» вакцинасы қолданысқа енгізілді. Коронавирусқа қарсы 90 пайыздан астам көрсеткішпен күресе алса да, аталмыш екпенің де кемшілігі бар екен. Жалпы, «Спутник V» тек екі дозамен бір рет егуге жарайтын вакцина. Себебі, «Спутник V»-дің құрамында тірі аденовирустар бар. Сондықтан мысалы, бір жыл өткен соң осы вакцинаны қайта ексе, одан ешқандай қорғаныш әсері болмайды.
Қазір әлемде COVID-19-ға қарсы көптеген мемлекеттер екпе салдыруда. Көрсеткіштер де жемісін беріп келеді. Мәселен, АҚШ-та коронавирусқа шалдыққандардың саны едәуір азайған. Бірақ, сонысына қарамастан кеселге толық тосқауыл қоюдың реті болмай тұр. Қазір әлемде коронавирусты жұқтырушылар бойынша алғашқы ондыққа АҚШ, Үндістан, Бразилия, Франция, Түркия, Ресей, Ұлыбритания, Италия, Испания, Германия мемлекеттері кірген. Ал аталмыш кеселден көз жұмғандар бойынша АҚШ, Бразилия, Үндістан, Мексика, Ұлыбритания, Италия, Ресей, Франция, Германия, Колумбия ондықтың қатарында орналасқан. Дүниежүзінде 165 миллион адам коронавирусты жұқтырса, қайтыс болғандардың саны 3,4 миллионнан асып түскен. Бұл тек ресми дерек. Ал, шын мәнінде бұл көрсеткіш әлдеқайда көп болуы мүмкін. Ресми дерекке сүйенсек, елімізде 363 мың адам бұл вирусты жұқтырса, 4 мыңнан астам адам көз жұмған. Сондықтан қазір өте сақ болған жөн. Тіпті, екпе алған адамның өзі бетпердені тағып жүруі қажет.
883 рет
көрсетілді0
пікір