- Аймақ тынысы
- 29 Шілде, 2021
Үкімет басшысы жұмыс сапарымен Ақтөбеде болды
Премьер-министр Асқар Мамин Ақтөбе облысына жұмыс сапарымен келіп, өңірдің әлеуметтік-экономикалық дамуымен танысты.
Үкімет басшысы алдымен «Ақтөбе» индустриялық аймағында орналасқан «Зерде Керамика Ақтөбе» ЖШС зауытын аралады. Кәсіпорын жылына 5 млн шаршы метр керамогранит пен керамикалық плитка шығарады екен. Ал, жобаға салынған инвестиция көлемі – 9,2 млрд теңге. Кәсіпорында 200-ден астам жұмыс орны құрылған.
Асқар Мамин өндірістік қуаты жылына 122 рентген аппараты мен кешен болатын «Ақтөберентген» АҚ зауытының жұмысымен танысты. Өнімнің бір бөлігі Ресейге, Өзбекстанға, Тәжікстанға және Қырғызстанға экспортталады.
Өңірде шағын және орта бизнестің қарқынды дамуына айтарлықтай көңіл бөлінеді. Биыл мемлекеттік қолдауға облыстың 3,3 мыңнан астам шағын және орта бизнес нысаны ие болады. Үкімет басшысы «ПО Глобал-Спецодежда» ЖШС тігін фабрикасының жұмысымен де танысты. Мұнда 200-ге жуық адам жұмыс істейді. Кәсіпорын жыл сайын 1,2 миллионға дейін арнайы киімдер мен қорғаныш құралдарын шығарады.
Премьер-министр өңірдің энергетикалық әлеуетінің дамуын тексерді. Асқар Мамин «Ақтөбе ЖЭО» АҚ барды, онда қазіргі уақытта кәдеге жаратушы қазандығы бар, қуаты 57 МВт газ турбиналық қондырғысының құрылысы жүріп жатыр. Жобаны іске асыру станцияның қуатын 175 МВт-қа дейін арттыруға мүмкіндік береді екен. Жұмыстарды 2021 жылғы желтоқсан айында аяқтау жоспарланған.
Бұдан кейін Қарғалы ауданының Бадамша ауылында Асқар Мамин «Arm Wind» ЖШС жел электр станциясының жұмысымен танысты. Қазіргі уақытта жел электр станциясының екінші кезеңінің құрылысы жүргізілуде. Станция жыл сайын сағатына 100 МВт электр энергиясын өндіреді. Инвестиция көлемі 85 млн долларды құрайды, аяқтау мерзімі – биылғы жылдың қыркүйек айы.
Облыста жол құрылысы мәселесі, басқа да өңірлердегідей, аса өткір екендігін, оны мемлекет басшысының өзі сынға алғаны да аян. Осы ретте бұл маңызды мәселені назардан тыс қалдырмай, үкімет басшысы «Ақтөбе – Атырау – Астрахан» республикалық автожолын реконструкциялау барысын тексерді. Биыл Ақтөбе – Қандыағаш учаскесінде жол қозғалысы ашылады, Қандыағаш – Мақат автожолының учаскесі осы жылдың соңына дейін пайдалануға беріледі. Премьер-министр тасжолды қайта жаңарту жұмыстарын сапалы әрі белгіленген мерзімде аяқтауды тапсырды.
Премьер-министр Ақтөбе қаласындағы Батыс-2 шағын ауданының салыну барысымен танысты, оның құрылысы 2025 жылы аяқтау жоспарланып отыр. Шағын ауданның жалпы аумағы – 535 гектар. Биыл өңірде 1 млн шаршы метрден астам тұрғын үйді пайдалануға беру көзделіп отыр.
Мәртөк ауданында Асқар Мамин «Мilker» ЖШС жемшөп түйіршіктерін өндіру зауытын аралады. Инвестициялық жобаның құны – 700 млн теңге. Кәсіпорынның өндірістік қуаты – жылына жоңышқа пішенінен 12 мың тонна түйіршіктелген құрама жем. Дайын өнім Қазақстанда да, одан тыс жерлерде де, атап айтқанда, Қытайда, Ресейде, Иранда және Біріккен Араб Әмірліктерінде зор сұранысқа ие.
Сондай-ақ жұмыс сапары аясында премьер-министрге облыстың балық саласын дамытудың 2030 жылға дейінгі өңірлік бағдарламасы таныстырылды. 10 жыл ішінде салаға 37 млрд теңге жеке инвестиция тарту, 400-ден астам жаңа жұмыс орнын құра отырып, шаруашылықтар санын 72 субъектіге дейін арттыру жоспарланған.
«Green Capital Kazakhstan» ЖШС жылыжай кешенін аралау кезінде үкімет басшысына жылыжай өнімдерін өндіру бойынша қазіргі жағдай және осы саланы одан әрі дамыту перспективасы таныстырылды. Соңғы үш жылда облыста 8 жылыжай іске қосылыпты.
2025 жылға дейін жалпы мөлшері 17 млрд теңге болатын тағы екі ірі жобаны іске асыру көзделген. Бұл жылыжай өнімдерін 40%-ға арттырады.
Биылғы жылдың 6 айының қорытындысы бойынша облыста өнеркәсіп өндірісінің көлемі 2020 жылмен салыстырғанда 8,2%-ға (997,2 млрд теңге) өскен.
Ауыл шаруашылығының жалпы өнім көлемі 116,9 млрд теңгені (+2,6%), құрылыс жұмыстарының көлемі 76,9 млрд теңгені (+5,4%) құрады, 366,5 мың шаршы метр тұрғын үй (+4,1%) пайдалануға берілді.
Негізгі капиталға салынған инвестициялар өсімі – 11,9%, яғни 292,8 млрд теңге тартылды. Үстіміздегі жылдың соңына дейін 125,7 млрд теңгеге 31 инвестициялық жобаны іске асыру жоспарлануда.
Иса ҚАМБАР
575 рет
көрсетілді1
пікір