- Бизнес & Қоғам
- 26 Тамыз, 2021
Этношеберхана іске қосылды
Алматы облысында жүн өңдейтін және ұлттық көрпелер шығаратын этношеберхана іске қосылды. Шеберхана «Тамшыбұлақ» қорының жетекшісі Жанат Есімбековтің бастамасымен Қапал ауылында ашылды.
Ауылдағы кәсіпкерлікті дамытып, жастарды кәсіпке үйретуге бағытталған әлеуметтік маңызы бар жоба «Азаматтық бастамаларды қолдау орталығы» ҚЕАҚ-ның арнайы конкурсы шеңберінде берілген грант есебінен жүзеге асты.
– Қазіргі уақытта өз кәсібіңді ашып, еңбек ету керек. Сондықтан біз уақыт ағымына қарай өз кәсібімізді бастауға бел будық. Бағдарлама жеңімпазы атанып, қайтарымсыз несиеге қол жеткіздік. Ендігі кезекте ұлттық өнердің жаңғырып, дамуына өз үлесімізді қосқымыз келеді, – деді «Тамшыбұлақ» қорының жетекшісі Жанат Есімбеков.
Жобаның жалпы құны – 500 мың теңге. Бүгінгі күні 2 жұмыс орны құрылып, 10 адам ұлттық өнердің қыр-сырын оқып-меңгеруде. Басты мақсат – ұлттық өнерді әдемі көрпелерге кестелей отырып, дәстүрді жаңғырту, жалғастыру.
Сондай-ақ Қапшағай қаласында көпбалалы ана Жанат Медетқызы да «құрақ көрпе» құрақ бұйымдарын жасаудың ескі технологиясын ойдағыдай дамытуда. 15 жылдан астам тәжірибесі бар қолөнер майталманы қапшағайлық бойжеткендерге өз білгенін үйретуде. Сондай-ақ тапсырысты Қазақстанның барлық қалаларына жеткізеді. Ж.Медетқызының айтуынша, бір күнде цех тігіншілері 40-50 қалыңдыққа арналған жасау жүктерін тіге алады. Әрбір өнімге тігіншілер білек сыбана кірісіп, тапсырыстың сапалы шығуына барын салады. Тігіншінің ойынша, құрақ тігісі, көп уақыт кетсе де, көркемдік талғамды қажет ететін өте қызықты іс. Өйткені, түстер мен пішіндерді бір-бірімен үйлестіріп, үйлесімді үлгіге айналдыру керек. Құрақ жастықтар, көрпелер, жапқыш өзінің қанық түсті, сан түрлі оюларымен көптің таңдайын қақтырады. Цехта барлығы 20-дан астам өнім түрлері шығарылады.
Нұрлан ҚҰМАР
625 рет
көрсетілді0
пікір