- Өндіріс өрісі
- 27 Тамыз, 2021
Кеніштер келешегіне сенім мол
Дәстүрлі өндіруші өнеркәсіптің тиімділігін арттыру мен Қазақстанды әлемдік барлау нарығына шығару, бесжылдық кезеңге арналған мемлекеттік барлау бағдарламасын әзірлеу – Елбасы мен Президент алға қойған межелі міндет.
Бұл саланың ел экономикасының дамуына қосар үлесі қомақты. Сол себепті де бүгінде минералды шикізатты зерттеуге және республиканың минералды-шикізаттық базасын толықтыруға нақты жағдай, кең мүмкіндік жасалуда. Бүгінде геологтардың жігерлі жұмысының арқасында экономиканың тұрақты дамуы мен мемлекеттің материалдық әл-ауқатын қамтамасыз ететін көптеген кен орындары ашылды. Олардың аясында шағын қалалар құрылып, өсе бастады.
Экология, геология және табиғи ресурстар вице-министрі Серікқали Брекешевтің атап өтуінше, еліміздің пайдалы қорының мемлекеттік балансында барлығы 8 мыңнан астам кен орны тіркелген. Оның ішінде көмірсутектерден – 317, қатты пайдалы қазбалар – 910, кең таралған пайдалы қазбалар – 3 мыңнан астам және жерасты суларының 4 мыңға жуық кен орындары бар. Қазақстан мұнайының баланстық қоры – 4,4 млрд тонна, газ – 3,8 трлн м3, конденсат – 414 млн тонна. Олардың көпшілігі Атырау мен Маңғыстау облыстарында шоғырланғаны мәлім. Бұл ретте көмірсутегі қорының 68%-ы үш ірі кен орнының үлесіне – Теңіз, Қашаған және Қарашығанаққа келеді. Сондай-ақ қатты пайдалы қазбалар қорының есебі металл пайдалы қазбалардың 37 түрі мен бейметалдардың 65 түрі бойынша жүргізіледі. Олардың басым түрлері – алтын, мыс, қорғасын және мырыш. Алтын кен орындарының негізгі қоры Шығыс Қазақстан облысында – 36%, Ақмолада – 21%, Қарағандыда – 11% шоғырланған. Мыс қорының 82%-ы елдің шығыс және орталық аймақтарынан табылады. Үш мыңнан астам қорғасын-мырыш кендері мен кеніштері – негізінен Орталық, Шығыс және Оңтүстік Қазақстанда. Республикада жерасты суының 4 мыңға жуық кен орны бар болса олардың 50% – оңтүстікте, 30% – Орталық, Солтүстік және Шығыс аймақтарда және 20%-дайы Батыста орын тепкен.
Қазіргі кезде елімізде 2021-2025 жылдарға арналған Ұлттық геологиялық барлау жобасы әзірленуде, Экология және табиғи ресурстар министрлігі ИИДМ-мен бірлесіп, сирек кездесетін металдар бойынша жол картасын жасауда, сондай-ақ Еуразия мұнай-газ жобасы, барлауға жеке инвестицияларды тарту мәселелері жан-жақты пысықталуда. Геология саласында Тәуелсіздік жылдарында елдің минералдық-шикізат кешенінің ресурстық базасын дамытудың 2003-2010 жылдарға, 2010-2014 жылдарға арналған салалық бағдарламалары іске асырылды. 2016 жылдан бастап нысаналы индикаторлар тиісті органның стратегиялық жоспарына интеграцияланды. Ал минералдық-шикізат кешені әлемдік нарық талаптарына толық бейімделді. Пайдалануға берілген мыңнан астам кен орны қазіргі уақытта мемлекетке табыс әкеліп, халықты жұмыспен қамтамасыз етіп отыр. Бүгінгі күні 1630 объект жұмыс істеп тұр. Қоршаған ортаны ластайтын апаттық мұнай ұңғымаларын жою мақсатында 2010-2021 жылдарда ел аумағында зерттеулер жүргізілді. Тексеру барысында 132 апатты мұнай ұңғымасы анықталып, оның 126-сы жойылды. Сондай-ақ республикада сирек кездесетін металдарды өндіруді және өңдеуді дамыту үшін 2021 жылы құпияландыруға жататын мәліметтердің ведомстволық тізбелері қайта бекітіліп, тізбеден литий, цезий, галлий, тантал-ниобийдің баланстық қорлары туралы мәліметтер алынып тасталды.
БОТАГӨЗ ӘБДІРЕЙҚЫЗЫ
548 рет
көрсетілді0
пікір