- Бизнес & Қоғам
- 28 Тамыз, 2021
Мемлекет көмегі мен субсидия мақсатқа сай жұмсалуы тиіс
Әлемнің қай елін алсаңыз да ауыл шаруашылығы мемлекет қолдауына мұқтаж салалар қатарына жатады. Құбылмалы климат жағдайларына, аумалы-төкпелі ауа райына тәуелділік, қуаңшылық жайлаған өңірлердің ұлғайып, «дамылсыз сұлу бетін жауын жуатын» өлкелер қатарының азаюы аграрлық экономика ахуалына әсер етпей қоймауда.
Бұл үрдіс жаһандық жылынудың жағымсыз салдарларынан айқын сезіле бастағаны соңғы бір-екі жылдың жүзі болды. Мұның үстіне ортақ нарыққа шығарылатын өнім бағасының әділетті қалыптасуын көздейтін Дүниежүзілік сауда ұйымы протекционизмді шектеу саясатын ұстану арқылы жекелеген мемлекеттер тарапынан тауар өндірушілерге көрсетіліп жатқан демеу шараларына оң қабақ танытып отырмағаны белгілі. Дегенмен, аграрлық саланың әлеуетін нығайту мақсатында көптеген елдер шама-шарқына қарай өз шаруа қожалықтарына қаржылық, материалдық-техникалық, ақпараттық-әдістемелік қолдау көрсетіп келеді.
Кезінде бүкіл кеңестер одағын асыраған Қазақстан диқандары мен шопандары тәуелсіздік жылдары да билік назарынан шетқақпай қалған жоқ. Орда бұзарлық отыз жыл ішінде саланы дамытып, ауыл-селоны көркейтуге бағытталған тоғыз мемлекеттік бағдарлама қабылданды.
Атап айтсақ, 1991-1995 жылдарға және 2000 жылға дейінгі кезеңге арналған «Ауыл» әлеуметтік-экономикалық даму бағдарламасы, агроөнеркәісіптік кешенді дамытудың 1993-1995 және 2000 жылға дейiнгi кезеңге арналған тұжырымдамалық бағдарламасы, ауыл шаруашылығы өндірісін дамытудың 2000-2002 жылдарға арналған бағдарламасы, 2003-2005 жылдарға арналған мемлекеттік аграрлық азық-түлік бағдарламасы.
Ауылдық аумақтарды дамытудың 2004-2010 жылдарға арналған мемлекеттік бағдарламасы, агрокешенді тұрақты дамытудың 2006-2010 жылдарға арналған тұжырымдамасы, республика агроөнеркәсіптік кешенін тұрақты дамытудың 2006-2010 жылдарға арналған тұжырымдамасын iске асыру жөнiндегi бiрiншi кезектегi шаралар бағдарламасы, саланы дамыту жөніндегі 2010-2014 жылдарға арналған бағдарлама және агрокешенді дамыту жөніндегі 2013-2020 жылдарға арналған «Агробизнес – 2020» бағдарламасы. Осынау маңызды құжаттар сапынан «Қазақстан Республикасының агроөнеркәсіптік кешенін дамытудың 2017-2021 жылдарға арналған мемлекеттік бағдарламасы» да ойып орын алуға тиісті. Төрт жылға негізделген бағдарламада ауыл шаруашылығындағы еңбек өнімділігінің 2015 жылдың деңгейіне қарағанда нақты мәнде 38 пайызға артуын, ауыл шаруашылығы жалпы өнімінің 2015 жылдың деңгейіне қарағанда нақты мәнде 30 пайызға өсуін, азық-түлік тауарлары экспорты көлемінің 600 млн АҚШ доллары сомасына өсуін, азық-түлік тауарлары импорты көлемінің 400 млн АҚШ долларына төмендеуін, азық-түлік тауарлары көтерме саудасының 2015 жылдың деңгейіне қарағанда 29 пайызға өсуін, суармалы алаңның 1 гектарына арналған суаратын су шығысының 2015 жылдың деңгейіне қарағанда 20 пайызға төмендеуін, қосымша жерүсті су ресурстарының 2015 жылдың деңгейіне қарағанда 1,9 текше шақырымға ұлғаюын қамтамасыз етуге бағытталған.
Ресми мәліметтерге сүйенсек, мемлекеттік бағдарламаны 2017-2021 жылдары іске асыруға республикалық және жергілікті бюджеттерде көзделген жалпы шығыстар барлығы 2 947,1 млрд теңгені құрайды, оның ішінде 2017 жылы барлығы – 372,7 млрд теңге; республикалық бюджеттен – 232,5 млрд теңге; жергілікті бюджеттен –140,2 млрд теңге; 2018 жылы барлығы – 454,4 млрд теңге; республикалық бюджеттен – 262 млрд теңге; жергілікті бюджеттен – 150,1 млрд теңге; басқа көздерден – 42,3 млрд теңге; 2019 жылы барлығы – 507,6 млрд теңге; республикалық бюджеттен – 2 90,6 млрд теңге; жергілікті бюджеттен – 156,7 млрд теңге; басқа көздерден– 60,2 млрд теңге; 2020 жылы барлығы – 745,6 млрд теңге; республикалық бюджеттен – 468,4 млрд теңге; жергілікті бюджеттен – 200,6 млрд теңге; басқа көздерден– 76,5 млрд теңге; 2021 жылы барлығы – 866,8 млрд теңге; республикалық бюджеттен – 576,0 млрд теңге; жергілікті бюджеттен – 202,1 млрд теңге; басқа көздерден– 88,6 млрд теңге бөлінеді. Бұл – саланы материалдық-техникалық жарақтандыруды жаңа деңгейге көтеруге, ғылым жетістіктерді жаппай өндіріске енгізуге жол ашатын орасан қаржы.
Алайда, осы орайдағы мемлекет көмегі, түрлі субсидиялар мақсатқа сай, орнымен пайдаланылды ма, деген сауал туындайды. Мәселен, статистика деректері тілге тиек етіліп отырған кезеңде, яғни 1991 жылы Қазақстанда 35 миллион бас, ал 2020 жылы 20 миллион бас қой-ешкі болғаны айғақ. Өсімтал түлік санының бақандай 15 миллионға кему себептері әлі ой елегінен өткізілген жоқ. Үкімет жәрдемі құмға сіңген судың кебін киюде. Бұл ретте Алматы, Түркістан және Павлодар облыстарында асыл тұқымды мал шаруашылығын қолдауға бөлінген 1 миллиард теңгеге жуық субсидияның ауыл шаруашылығы өнімдерін өндіруге қатысы жоқ сән салоны, фармацевтика компаниялары, жылжымайтын мүлікті жалға беру, автокөлік жөндеу кәсіпорындары сияқты 279 кәсіпкерлік субъектісіне берілгені жөнінде Сыбайлас жемқорлыққа қарсы іс-қимыл агенттігіне сілтеме жасалған Қазақпарат хабары назар аударуға тұрарлық. Бұдан «қазанға қақпақ керектігі» жөніндегі жарықтық Шерағаңның ескертуі әлі де өз маңызын жоймағанын көріп отырмыз. «Батыр бір оқтық, бай бір жұттық» дегендей, күйзелістің қыр астында екенін биылғы жаз байқатып өтті. Қаржы үйлестірушілер мен субсидия таратушылардың жауапкершілігін көтермесе, ең бастысы құқық қорғау орындарының бақылауын қатаңдатпаса, «баяғы жартас, сол жартас» күйінде қала ма деген қауіп бар.
ЖЕТПІСБАЙ БЕКБОЛАТҰЛЫ
1080 рет
көрсетілді0
пікір