- Бизнес & Қоғам
- 18 Қыркүйек, 2021
Құқықтық және медициналық көмек қолжетімді бола түспек
Осы күзде еліміздің ауылдары мен шалғай елді мекендеріндегі тұрғылықты халыққа денсаулық сақтау, құқықтық және психологиялық қолдау көрсетуге бағытталған «Демеу» әлеуметтік жобасы жүзеге асырылады. Жоба шеңберінде барлық өңірдегі ауыл-аймақтардың тұрғындары терапевт, психолог және заңгерлерден тегін консультациялар алуларына мүмкіндіктері бар.
Бұл орайда, Ақпарат және қоғамдық даму министрлігі және Азаматтық бастамаларды қолдау орталығының жетекшілігімен еліміздің ауылдарына заңгер, терапевт және психолог мамандары тегін консультация жүргізуге ҮЕҰ мен бастамашыл топтарға арналған 60 шағын грантқа конкурс жарияланды.
«Демеу» жобасының үйлестірушісі Арсен Базылов атап өткендей, соңғы жылдардағы демографиялық көрсеткіштер бүгінгі таңда қоғам үшін ең өзекті мәселелердің бірі. Аталған жаңа жоба – ауыл тұрғындарының назарынан тыс қалмай, нақты мәселелерге көңіл бөлумен қатар, олардың құқықтық сауаттылығын арттыруға мүмкіндік бермек. «Статистикалық көрсеткіштер бойынша, 2020 жылдың басында Қазақстан халқының саны 18 миллионнан астам адамды құрады. Оның ішінде 58,16% – қала тұрғындары, 41,84% – ауыл тұрғындары. Егер 2017-2019 жылдар аралығындағы мәліметке сүйенсек, ауыл халқы арасында бала туу көрсеткіші қала халқымен салыстырғанда 4,4%-ға төмен болса, ал сәби өлімі көрсеткіші 3,8%-ға жоғары. Сонымен қатар бүгінде ауылдарда барлық дәрігердің 17%-ы ғана жұмыс істейтінін атап өткен жөн. Әкімдіктердің ақпарына сәйкес, өткен жылдың соңына қарай ауылдарда клиникалық мамандықтар кадрларына қажеттілік 900 бірлікті құраған. Біз «Демеу» жобасының арқасында еліміздің 17 өңірін аралап, ауылдық аймақта тұратын жандарға құқықтық және медициналық көмекке қолжетімділік деңгейін арттырғымыз келеді», – деді үйлестіруші.
АЙЖАН ЖАСБАТЫРҚЫЗЫ
754 рет
көрсетілді0
пікір