- Мәдениет & Спорт
- 23 Қыркүйек, 2021
Жас суретшілер тартуы
Мемлекеттік орталық музейде Алматы қаласы күні және Ел Тәуелсіздігінің 30 жылдығын мерекелеуге арналған «Алматы менің жүрегімде» атты балалар шығармашылығының көрмесі өз жұмысын бастады.
Аталмыш мұражай жыл сайын республикамыздың мәдени астанасы болып табылатын Алматы қаласының тарихы мен қазіргі дамуының түрлі аспектілерін көрсететін балалар суретінің көрмелерін өткізіп келеді. Балалар шығармашылығының көрмесі жас жеткіншектерге өз тарихын, қаламыздың бүгіні мен болашағы туралы ойларын, қоршаған әлемге деген көзқарастарын, суреттер арқылы өздерінің эмоциялары мен көңіл-күйлерін жеткізуге мүмкіндік береді.
Көрмеге Алматы қаласының бейнелеу студияларының, көркемөнер мектептерінің, білім беру және дамыту орталықтарының әр түрлі жастағы талантты жас суретшілері қатысуда. Олардың ішінде «АртУм» балаларды дамыту орталығы, «Рембрандт» арт-студиясы, «Умка» балалар білім беру орталығы, «Genus» балалар орталығы, Т.Жүргенов атындағы ҚазҰӨА мектеп-интернаты, «Солнышко Арт-студиясы», «Творим вместе» «Ты художник» шеберханасы, «ArtMixstudio» шығармашылық студиясы, №68 мектеп-гимназиясы, «Подснежник» көркем білім беру студиясы, «Тұран» мектеп-лицейінің «Шабыт» студиясы және «Бөбек» ҰО «Самопознание» гимназиялары бар.
Түрлі техникалар мен жанрларда балалар қаламыздың көрікті жерлерін, мәдениеті мен тарихи ескерткіштерін, саябақтарды, скверлерді, жылдың төрт мезгіліндегі табиғат сұлулығын, түрлі-түсті натюрморттарды, қаланың, еліміздің рәміздерін және тағы басқаларды бейнелеген. Көрме экспозициясында балалар қолымен көркемделген әр түрлі және бірегей жұмыстары келушілердің назарын аудартып, ерекше қызығушылығын тудыратыны сөзсіз.
Нұрлан ҚҰМАР
213 рет
көрсетілді0
пікір