- Мәдениет & Спорт
- 18 Қазан, 2021
Көлік қызметі кемелдене береді
Қазақстанның алға қойған межесі – дамыған 30 елдің қатарына қосылу. Әрине, оған жету үшін елімізге озық технология, экономикалық соны серпін қажет. Осы ретте ел экономикасына айрықша серпін беретін көліктік-транзиттік инфрақұрылымды дамыту мәселесіне Тұңғыш Президентіміз, Елбасы Нұрсұлтан Назарбаев «Қазақстан – 2050» стратегиялық бағдарламасында баса назар аударғаны белгілі. Онда 2050 жылға қарай Қазақстан арқылы өтетін транзиттік тасымал көлемі 10 есеге өсуі ықтимал екендігі айтылды.
Осыған орай, таяуда Алматыда дәстүрлі TransLogistica Kazakhstan-2021 халықаралық көрмесі өтті. Аталмыш көрмені индустрия және инфрақұрылымдық даму вице-министрі Берік Камалиев ресми түрде ашты.
Көрмеге Әзірбайжан, Беларусь, Грузия, Қазақстан, Латвия, Литва, Ресей, Украина және Эстонияның 80-нен астам компаниясы қатысты. Шараның ашылу рәсімінде Берік Камалиев TransLogistica Kazakhstan-2021 қатысушылары мен қонақтарына премьер-министр Асқар Маминнің құттықтау сөзін жеткізді. «Еуразия құрлығының маңызды көлік желілерінің ортасында орналасқан Қазақстан – Азия мен Еуропа арасындағы транзиттік көпір және сенімді серіктес. Мұны көрме мен конференцияға қатысушылардың халықаралық құрамы дәлелдейді. «Translogistica Kazakhstan – 2021» халықаралық көрмесі транзиттік-көлік әлеуетін дамытуға, ұзақ мерзімді және өзара тиімді серіктестік қатынастарды одан әрі нығайтуға үлес қосатынына сенімдімін». Сонымен қатар Үкімет басшысы іс-шараға қатысушылар мен қонақтарға пайдалы кездесулер, жемісті жұмыс және жоспарларының табысты орындалуын тіледі.
«TransLogistica Kazakhstan – 2021» көрмесі Орталық Азия өңірінде бизнесті бастау немесе кеңейту, жаңа өнімдер мен қызметтерді іске қосу үшін зор мүмкіндіктер ашатыны сөзсіз.
Пандемия кезеңі көлік дәліздерінің әлеуметтік қажеттілігі мен экономикалық тиімділігін тағы бір мәрте дәлелдеді. Бұл еліміздің инвестициялық тартымдылығын арттыра түсті.
Қазақстан көлік саласын және көлік дәліздерінің транзиттік әлеуетін дамыту үшін зор күш-жігер жұмсауда. Үкімет пен ИИДМ бірқатар салалық бағдарламаларды іске асырды. Саланың құқықтық негізі қалыптасты.Көлік қызметтерін көрсетуге қолайлы бәсекелестік орта құрылды. Соңғы 15 жылда елімізде көлік саласына шамамен 35 млрд. АҚШ доллары көлемінде қаржы салынды.
Транзиттік жүктердің кедергісіз өтуі үшін көлік дәліздерін жаңғыртуға ерекше көңіл бөлінеді. Бүгінде Қазақстан арқылы 11 халықаралық транзиттік дәліз (5 теміржол және 6 авто) өтеді. Республикалық, облыстық және аудандық маңызы бар автомобиль жолдарының жалпы ұзындығы шамамен 100 мың шақырымды құрайды.
Қазақстанда 20 әуежай бар, олардың 18-і ИКАО талаптарына сәйкес келеді. Таяуда ғана өткізілген ICVM шеңберінде ИКАО ұшу қауіпсіздігінің халықаралық стандарттарына сәйкестік деңгейі (84%-ға дейін) арттырылды. ИКАО-ның объективті бағасы ҚР ИИДМ жүргізетін реформалар оң әсер еткенін көрсетеді.
Нұрлан ҚҰМАР
224 рет
көрсетілді0
пікір