• Бизнес & Қоғам
• 18 Қазан, 2021

Бір ауданда қос зауыт ашылды

Алматы облысының Қарасай ауданында инвестициялық көлемі 2,5 млрд теңгені құрайтын  екі жаңа кәсіпорын ашылды. Бірі, тұрмыстық электр және газ плиталарын шығаратын – «АТТЗ» ЖШС кәсіпорны, жылына 200 мыңға жуық плита шығарып, 200 жаңа жұмыс орнымен қамтамасыз етуде. Ал екіншісі – «Якар» ЖШС кондитерлік өнімдер фабрикасы. Мұнда жылына 6 мың тонна тәттілер шығару жоспарланған, оның 2,4 тоннасы – шоколад, 3,6 – тоннасы карамелдер мен мұз кәмпиттер.

Қос өнеркәсіп орнының ашылу салтанатына Сыртқы істер министрінің орынбасары Алмас Айдаров, Қазақстанның Түркиядағы елшісі Абзал Сапарбекұлы, Алматы облысы әкімінің орынбасары Серік Тұрдалиев, «KAZAKH INVEST»ҰК» АҚ төрағасы Мейіржан Юсупов қатысты. Газ және электр плиталарын өндіретін зауыттың жобасын Түркиядағы озық компаниялардың бірі «Femas Metal Sanayi ve Ticaret A.S», «Almaty Turmystyq Tehnika Zavody» ЖШС-мен бірлесіп жү­зеге асыруда. Ас үйге арналған жабдық­тар Түркия нарығында 40 жылдан аса қолданыста. Қазір компания 6 құрлық, 130 елде өз өнімдерін шығарып, өткізуде. Соның ішінде кіріктіріл­ген және жеке тұратын (газ және электр) пештер, үстел үсті плиталар мен асүй сорғылары бар. Зауыттың іске қосылуы нәтижесінде өңірдегі импорттық алмасуларды азайтуға бағытталған.

«АТТЗ» ЖШС бас директоры Абдулқасым Сойыркасан, жаңа кәсіпорындағы газ және электр плиталары мен пешке ар­налған құрылғыларды шығару­ға маманданған. «Technodom», «Sulpak», «Mechta», «Fora» және басқа да ірі сауда үйлері компа­нияның дистрибьютор серіктестері ретінде жұмыс істеуде. 5 фирмалық сауда орны тағы бар. Аталған жаңа зауыт Жармұхамбет ауылында орналасқан.

«Якар» ЖШС құрылтайшысы Якар Женгиз о баста жұмыс жалға алынған ғимаратта басталғанын айтты. Бұдан кейін ғимараттың жаңа іргетасы қаланып фабрика сонда көшірілді. Қазіргі кезде мұнда 50 адам еңбек етеді. Алдағы уақытта жұмыс орындарының саны 90-ға жеткізілмек.

Еске салсақ, «Якар» ЖШС – елі­мізде және Орта Азия елдеріндегі кондитерлік өнімдерімен танымал ірі компаниялардың бірі. Кәсіпорында тәттілердің көптеген түрі – карамель мұз кәмпиттері, шоколадты кәмпиттер, батондар, драже (арахис) т.б. өндіріледі.

Осы ретте облыс әкімдігінің қол­дауымен «Бизнестің жол картасы – 2025» мемлекеттік бағдарламасы аясында кешенді газ және электр құрылғыларымен жабдықталуына  қолдау көрсетілген.

Өткен жылдың басында облыс әкімі Амандық Баталов асүйге арналған газ және электр плиталарын өндіретін зауыттың құрылысы туралы мәселені түрік инвесторларымен бірлесе отырып талқыланған болатын. Сол кездесудің нәтижесінде жаңа кәсіпорын іске қосылып, инвестиция тартылды. Бүгінде әлемдік даңқы бар сапалы өнім өндіретін компания жергілікті тұрғындарды  тұрақты жұмыс орнымен қамтамасыз етуде. Түркиялық серіктестерге экономикалық маңызы бар аталған жобаларды жүзеге асыруға Алматы облысының әкімдігі, СІМ, Қазақстанның Түркиядағы елшілігі және «KAZAKH INVEST» ҰК» АҚ мен жергілікті атқарушы органдары барынша қолдау көрсетіп келеді.

Нұрлан ҚҰМАР