- Білім & Ғылым
- 02 Желтоқсан, 2021
Еліміздің ертеңі – біз жастарға сенеміз
Әл-Фараби атындағы Қазақ ұлттық университетінде «Мен жастарға сенемін!» атты республикалық патриоттық жастар форумы өтті. Дәстүрлі түрде тоғызыншы мәрте өткізілген шара Тәуелсіздіктің 30 жылдығы мен Тұңғыш Президент күніне орай ұйымдастырылды.
Ауқымды іс-шараның басты мақсаты – инновация мен шығармашылықты ұштастыру арқылы жастар патриотизмін дамыту. Форумға Әл-Фараби атындағы ҚазҰУ-дың басқарма төрағасы – ректоры Жансейіт Түймебаев, Ұлттық киноны қолдау мемлекеттік орталығының басқарма төрағасы Есетжан Қосубаев, Алматы облысы Ақсу ауданы Қапал ауылдық округі әкімі аппаратының бас маманы Владимир Чепел, Мәдениет саласының үздігі, ақын Бақыт Жағыпарұлы және форум жеңімпаздары мен студенттер қатысты. Шараның басында сөз сөйлеген университет ректоры Ж.Түймебаев форум қатысушыларын жеңісімен құттықтап, ыстық лебізін білдірді.
Республикалық форумға ағымдағы жылы 2000-ға жуық жұмыс қабылданған. Солардың ішінен іріктелген 107 қатысушы марапат кешіне жолдама алды. Биыл форумға қатысушылар эссе жазу, инновациялық жоба, көркемсөз оқу, бейнеролик дайындау, азаматтық-патриоттық бағыттағы поэзиялық шығарма жазу, сыбайлас жемқорлыққа қарсы жоба мен сурет өнері сияқты сегіз бағыт бойынша бақ сынасты. Гала-концерт барысында әр номинация бойынша жеңіске жеткен гран-при иегерлеріне біржылдық грант сертификаты табысталды. Сонымен қатар шарада бірінші, екінші және үшінші орын иегерлері де марапатталды.
«Мен жастарға сенемін!» республикалық форумының гран-при иегерлерінің бірі – Семей мемлекеттік медицина университетінің студенті Дамир Шадибекұлы. Ол «Дәрігер – ардақты мамандық» бейнеролик байқауына өзінің туындысын ұсынып, жеңіске жетті.
«Жастардың еңбегін бағалап, мүмкіндік беретін форумның маңыздылығы өте жоғары. Осы форумды өткізуге мұрындық болған барша ұйымдастырушыларға алғысым шексіз. Жеңіске жеткеніме өте қуаныштымын», – деді Д.Шадибекұлы.
Шара соңы арнайы дайындалған концерттік бағдарламамен аяқталды.
Айжан ЖАСБАТЫРҚЫЗЫ
4726 рет
көрсетілді0
пікір