• Бизнес & Қоғам
• 02 Желтоқсан, 2021

Азаматтық қоғам құру – негізгі басымдық

Алматыда «Қоғам мен мемлекеттің тұрақты дамуы мүддесіндегі әріптестіктің 30 жылы» атты Қазақстанның 10-шы Азаматтық форумы өтті. Форум жұмысына тұңғыш рет еліміздің ЕҚЫҰ, БҰҰДБ, ЮНИСЕФ, Фридрих Эберт қоры, ЮНЕСКО, ЮСАИД сияқты халықаралық серіктестері қатысты.

Форумды ақпарат және қо­ғамдық даму министрі Аида Балаева мен Қазақстанның Аза­маттық альянсының пре­зиденті Бану Нұрғазиева ашты. Министр өз сөзінде X Аза­маттық форумның жұмысы Қазақстан Тәуелсіздігінің 30 жылдығының қорытын­дыларына арналған маңыз­ды оқиға екенін атап өтті. Тәуелсіздік таңында Қазақ­станның азаматтық секторы ондаған ҮЕҰ-дан бастал­ғанын еске салған Аида Балаева, бүгін­де еліміздің бұл саласы Орталық Азиядағы ең дамы­ған қоғамдық институтқа айнал­ғанын айтты. Мәселен, жыл сайын қазақ­стандық «үшінші сектордың» қатары орта есеппен 150 жаңа қатысушыға артып келеді. «Биылғы жылдың тарихи мәні де, саяси мазмұны да біз үшін ерекше. Егеменді ел үшін де 30 жылдың мерейлі межесін табысты бағындырып отырмыз. Ол біз үшін өткенге есеп беріп, бүгінімізді таразылап, ертеңімізді бағамдайтын кезең. Ал, ел тәуелсіздігінің жетістігін азаматтық секторсыз елестету мүмкін емес. Азаматтық форум – бұл кейбіреулер дәйексіз айтатындай «ҮЕҰ өкілдерінің декларативті-хаттамалық жиыны» емес, қолданбалы идеялар мен бастамалар туындайтын, министрлер мен әкімдер азаматтық белсенділермен тең дәрежеде бірлескен іс-қимыл жоспарларын жасайтын, жекелеген әлеуметтік проблемаларды шешуге мемлекет ҮЕҰ-ларды тартатын нақты жұмыс процесі», – деді А.Балаева.

Форум қатысушы­ларына президент Қасым-Жомарт Тоқаевтың құт­тықтауы жолданды. Мемлекет басшысы­ның құттықтауын Президент Әкімшілігі бас­шысының бі­рінші орынбасары Дәурен Абаев оқып берді. «Азаматтық қоғам құру – біз үшін негізгі басымдықтың бірі. Елбасының бастамасымен 2003 жылдан бері тұрақты өткізіліп келе жатқан форум осының айқын дәлелі. Диалогтың осы үлгісі көптеген мәселені талқылап ұсыныс әзірлейтін тиімді пікір­талас алаңына айналды. Форум азаматтық бастамаларды қолдау үшін жүйелі шаралар қабылдауға септігін тигізуде. Сондай-ақ стратегиялық және заңнамалық құжаттар дайындауға ықпал етуде. Былтыр менің жар­лығы­ммен «Азаматтық қоғам­ды дамыту тұжырымдамасы» бекітілді. Бұл құжат билік органдары мен қоғамдық ұйымдардың серіктестігін күшейтуді көздейді. Оған қоса тұрғындардың елдік істерге еркін араласуына мүмкіндік береді», – делінген Президенттің құт­тықтау хатында.

Азаматтық форумда Қа­зақстан Тәуелсіздігінің 30 жылдығы аясында бүгінгі күннің ең өзекті тақырыптары талқыланды. Форум азамат­тық қоғамның 100-ден астам жетекші өкілдері қатысқан гибридті іс-шаралар арқылы 20 мыңға жуық адамды қамтыды.

Форумның пленарлық отырысында ауылдағы аза­маттық бастамаларды дамыту, адам құқықтары мен бостандықтарын қорғау, ха­лықаралық ынтымақтастық, азаматтық қоғам, экология және инклюзия мәселелері талқыланды.

Біріккен Ұлттар Ұйымы Бас хатшысының кеңесшісі Мирьяна Сполярич Эггердің форум делегаттарына арнал­ған бейне-құттықтау сөзі де маңызды болды. Халықаралық дипломат қатысушыларды құттықтап, Қазақстанның Азаматтық форумына қолдау білдірді. Ауылдағы азаматтық белсенділікті дамыту туралы «Қатонқарағай ауда­нының тұрақты дамуы» қоғамдық қорының директоры Серік Жүнісов айтып берді. «ЭКО Маң­ғыстау» басшысы Кирилл Осин өз сөзінде қоршаған ортаны қорғау мен экологияның маңызды мәселелерін көтерді. «Сана-Сезім» әйелдер баста­малары құқықтық орталығының жетекшісі Шахноз Хасанова адам құқықтарын қамтама­сыз ету бойынша шараларды ілгерілету туралы өз пікірімен бөлісті. Азаматтық қоғамды дамыту қауымдастығының атқарушы директоры Жәмила Асанова халықаралық миссия­лардың азаматтық бас­тамаларды дамытуға қосқан үлесі туралы айтып берді.

Пленарлық отырыс­тан кейін дәстүрлі «ҮЕҰ сыйлығы» тапсырылды. Бұл – Үкіметтік емес ұйымдарды 15 маңызды бағыт бойынша республикалық, сала­лық және өңірлік деңгейдегі әлеу­меттік мәселелерді шешуге қосқан үлесі үшін ынталандыруға бағытталған дәстүрлі шара. Сонымен қатар, ҮЕҰ арасында «Таңдау» байқауының жеңімпаздары марапаталды. Байқаудың негізгі идеясы – Қазақстанның әлеуметтік және қоғамдық өміріне, тәуелсіздіктің орнығуы мен азаматтық қоғам­ның қалыптасуына үлес қосқан қазақ­стандық ҮЕҰ қызметінің жетістіктерін көпшілік алдында тану.

САЛТАНАТ ҚАЖЫКЕН