- Қаржы
- 09 Желтоқсан, 2021
ТЕҢГЕНІ БИЫЛ ДЕВАЛЬВАЦИЯ КҮТІП ТҰР МА?
Немесе USD/KZT курсының келешегіне қатысты
сарапшылар талдауына шолу
USD (АҚШ доллары) мен KZT (теңге) негізіндегі теңге бағамы жыл басынан бері 420 теңгеден 437 теңгеге түсті, яғни ұлттық валюта 3,8%-ға құнсызданды.
Әлемдік саудада сапырылысқан кезкелген мемлекетке жаһандық валютаны «жеңу» мүмкін емес. Ал біздің жол іздеп, теңгені еркін айналымға жібергеніміз белгілі.
Статистикаға сүйенсек, соңғы он жылда теңгенің долларға шаққандағы өсімі 2,5 есе артқан. Бұл тарапта Ұлттық банк нақты болжам жасауға әзірге асықпайды. Десе де, экспорт пен импорт теңдігі арқасында төл валютамыз тұрақты орнын сақтап тұр, дейді. Бірақ ішкі фактордың әсерін банк өкілдері мойындайды. Расында да, мұнай қымбаттады: ал теңге болса, неге күш ала алмай отыр?
– Осы фактордың барлығы валюта нарығындағы сұраныс пен ұсыныстың тепе-теңдігіне әсер етеді. Шетел валютасына қазіргі сұраныстың артуы мұнайдың салыстырмалы түрде жоғары бағасына қарамастан теңгенің нығаюына мүмкіндік берер емес, – деп түсіндірді Ұлттық банктің басқарма басшысы Мұхтар Орман.
Қазір әлемдік қаржы және тауар нарығында мұнартқан сағым көтерілгенге ұқсайды, яғни covid-тің жаңа бір нұсқасы – омикронның төңірегіндегі алашапқынға орай қаржы нарығында жағымсыз көңіл-күй басым.
Шикізат нарығы да құбылып тұр: мұнай саудасының бағамы соңғы уақытта шамамен 2%-ға өсіп, 71 АҚШ долларынан асып түсті, бірақ «ковидтің жаңа штамы пайда болыпты» деген хабар тарасымен мұнай бағасы 11%-ға түсіп кетті. Соңғы күндері ептеп көтеріліп келеді.
Ұлттық банк жақында теңгеге түскен ауыр салмақты біршама жеңілдеткенін айтып отыр. Осынау монетарлы реттеуші ұйым биыл бірінші рет 64 млн USD сомасында интервенция жасады, бұл – KASE-дегі USD/KZT жұбының бүкіл саудасындағы айлық көлемінің шамамен 2%-ы.
Теңгенің келешектегі, мәселен, келесі жылдағы жағдайына келетін болсақ, бірінші кезекте мұнай бағасына назар аударған жөн. Сауд Арабиясының қаңтар айындағы мұнай бағасының өсуін, Ресейдің шикізат өндіруді арттыру циклін жалғастыруға келісім бергенін көріп отырмыз.
Бұл – жақын келешекте мұнай бағасы жоғары болып қала беруі мүмкін, ал омикронға қатысты жағдай соншалықты ауыр емес, ірі мұнай өндірушінің белін қайыстыра қоймайды дегенді білдіреді.
Сөйтіп,Ұлттық банк инфляция қысымы жағдайында базалық мөлшерді 9,75% деңгейінде сақтап тұр. Тұтыну бағасы өткен айлардағыдай қатты өсетін болса, онда базалық мөлшер де өсуі мүмкін. Осыған орай банк депозиті нарығындағы теңге салымының мөлшері 9%-дан жоғары болып қала береді.
Сөйтіп, USD/KZT жұбының жыл басынан бергі 3,8%-да құнсыздануының тігісін жатқызбақ. Тіпті омикрон сияқты қиғаш фактор шыға келсе де, USD/KZT жұбының өсу ықтималын да жабуға қабілетті.
Ұлыбританияның The Economist журналы өзінің «биг-мака индексінің» бір нұсқасында «Ресей рублі – долларға қатысты бағаланбай тұрған валютаның бірі» деп жазыпты. Өйткені Ресей валютасының 68%-ға құнды болуға шамасы бар көрінеді. Өкінішке қарай, бұл басылымда теңге индексі туралы айтылмаған. Дегенмен теңге үшін ішкі фактор оң тұрғыда қалыптасып отыр: Ұлттық банк дерегіне қарасақ, бірінші жартыжылдықта сауда теңгерімі профицитпен қалыптасты, тауар экспорты 3,4%-ға өсті. Ал мұнай мен газ конденсатының экспорты 10,8%-ға азайды. Бұл – ішкі фактордың теңге курсына қысымы төмендейтінін білдіреді.
Естеріңізде болса, теңгенің девальвациясы төрт-бес жылда бір бастан өтетін еді. Соңғы девальвация 2015 жылдың тамыз айында, яғни алты жыл бұрын болды. Енді жақын арада девальвация болуы мүмкін бе? Жоқ, дейді «Альтернатива» зерттеулер орталығының директоры Андрей Чеботарев. Өйткені 2015 жылдың тамыз айында Қазақстан валютасы белгіленген бағам бойынша еркін айналымға көшті. Яғни Ұлттық банк бағытты мәжбүрлі түрде белгілеуді, кезкелген бағамен ұстауды тоқтатты. Белгіленген курста, ерте ме, кеш пе, өзінің қорын жұмсамау үшін девальвация немесе револьвация қажет болады. Ал еркін бағам негізіндегі ұлттық валютаның бағасы биржада нақты сауда режимінде анықталып жатыр. 2015 жылғы тамыздан бастап теңге бағамы биржадағы сауда барысында осылайша айқындалады. Мұндай жағдайда девальвация теориялық тұрғыда болуы мүмкін емес, өйткені теңге қазір басқа координат жүйесінде тұр.
Енді USD/KZT курсының биылғы жағдайы мен келешегіне қатысты сарапшылар талдауын ұсынайық:
1) теңгенің АҚШ долларына шаққандағы бағамы соңғы кездері омикрон факторына байланысты құбылған сыртқы ықпалға тәуелді;
2) теңге бағамының негізгі факторы бойынша жақын арадағы мұнай бағасы әзірге төмен болмайды;
3) омикрон-штамының экономиканы қиратып кететін қуаты байқалмайды;
4) шетел валютасына сұраныс арта бастаса, Ұлттық банк теңге бағамына «үстеме қысымды» барынша жеңілдетуге дайын;
5) теңге депозитінің табысы ұлттық валютаның АҚШ долларына жыл басынан бері жинақталған құнсыздануынан екі есе артық;
Сарапшылар депозитті ұлттық валютада сақтауға кеңес беріп отыр.
ТӘУЕКЕЛ БАҚАШ
1592 рет
көрсетілді0
пікір