- Қаржы
- 15 Желтоқсан, 2021
ҚАРЖЫ РЫНОГЫНДАҒЫ ТУРБУЛЕНЦИЯДАН НЕ КҮТУГЕ БОЛАДЫ?
Инфляцияны межелі 7,5 пайыз деңгейінде ұстап қалуға болады, дейді сарапшылар
Соңғы кезде ұлттық валютамыздың ғұмырындағы кезекті дағдарыстың, кейбіреудің болжамынша, көпшіліктің ішкенін – ірің, жегенін – желім еткен, ықтималды девальвацияның басы қылтиып көріне бастағандай көрінді.
Кереметі сонда, бұл жолы қаржы рыногында бұрын-соңды сезіле қоймаған тағы да бір ыңғайсыз тенденцияның байқалғанын да жасыруға болмайды. Ол – айырбас пункттеріндегі доллардың тапшылығы. Ұлттық экономика министрлігін бір кезде Қайрат Келімбетов басқарған уақытта ұлттық валютаның жарты-ақ күнде отыз пайызға дейін құнсызданғанын ұмыта қоймағандар үшін бұл – әлбетте, алаңдатарлық жағдай.
Дегенмен желтоқсанның басынан теңге тағы да еңсе тіктеп, бір, бір жарым пунктке нығайған. Алайда күтпеген девальвациядан зәресі ұшып қалған жұрттың көңілін ол да тыныштандыра алар емес. Себебі, мұнан соңғы екі-үш күннен соң АҚШ валютасы теңгені қайтадан тұқырта бастады. «Девальвациядан қауіптену синдромы» кезекті рет көрініс берді.
Бүгінгі доллар бағамы 436-437 теңге шамасында. Бұл да – өрекпіген көңілді тыныштандыра қоймайтын фактор.
2008 жылғы әлемдк қаржы дағдарысынан кейін Ұлттық банктің сол кездегі төрағасы Григорий Марченконың «егер ұлттық валюта 200 теңгеге дейін құнсызданса, еліміздің экономикасы үмітсіз жағдайда әлсірейді» деген «болжамы» осындайда еріксіз еске оралады. Ұлттық валютамыз әлсіресе де, экономикамыз шайқалған жоқ.
Сонда қарапайым халық, банк салымшылары соңғы кездегі қаржы рыногындағы өзгерістерден не күтуі керек? Бүгіннің ең өзекті әлеуметтік-тұрмыстық тұрғыдағы басты алаңының бірі де – осы!
Сонымен таяудағы болашақта елдегі қаржы рыногында, соған сәйкес, халықты не күтіп тұр?
Жалпы, қаржы рыногындағы болжамдар АФК қаржы орталығында кәсіби қатысушылар әрекеті арқылы жасалатыны белгілі. Ал қарапайым халықтың білетіні – банктер мен валюта айырбастау пункттерінің көрсеткіш кестесіндегі цифрлар ғана.
Қаржы нарығын зерттеуде кәсіби қатысушылардың, банк, сақтандыру, брокерлік ұйымдар өкілдерінің, талдау және қазынашылық бөлімшелері өкілдерінің пікірлері есептеледі. Оған Бренд маркалы мұнайдың, АҚШ долларының ресей рубліне байланысты бағамын, сондай-ақ теңгеге байланысты бағамын, инфляцияны, ІЖӨ-ні, Ұлттық банктің базалық ставкасын қоссақ, аталмыш шараның қаншалықты ыждаһаттылықпен жүргізілетініне көзіміз жетеді.
Жаңа жылдың басына қарай ұлттық валюта 438,1 теңгеге, ал тұтас жыл барысында 446 теңгеге әлсірейді деп күтіліп тұр. Әлбетте, Қазақстан үшін мұнай нарқының бағамы маңызды. Желтоқсан айының басында мұнай нарқы 18,6 пайызға арзандады. Соның нәтижесінде қараша айында 82,1 болған бір баррель мұнайдың құны 75,4 долларға түсті.
Мұндайда Қазақстан банктерінің етегіне сүрініп әбіржитіні айтпаса да, белгілі. Ұлттық банк желтоқсанның басында базалық ставканы 9,75 пайыз көлемінде сақтап қалуға шешім қабылдады. Дегенмен соның алдында ғана кейбір қаржы сарапшылары базалық ставка 10 пайызға дейін көтеріледі деп болжаған болатын. Ал соңғы деректер бойынша келер жылы бұл көрсеткіш 9,5 пайызға дейін төмендейді деп отыр.
Бұл жерде сарапшылар елдегі инфляция деңгейін басты назарда ұстайды. Қараша айында 8,9 пайыз болған инфляция көлемі желтоқсанда екі пайызға төмендеді. Ол да – үміттендіретін жағдай. Соған сәйкес сарапшылар алдағы уақытта инфляцияны межелі 7,5 пайыз деңгейінде ұстап қалуға болады дейді.
Біздің ойымызша, соңғы кездегі валюта бағамының турбуленциясын жеңудің мүмкіндіктері әлі де бар. Қандай жағдайда да, үмітсіз – шайтан ғана, ауызды қу шөппен сүртудің реті жоқ. Елдегі қаржылық экономикалық жағдайда, сондай-ақ баға нарқында болашақтан үміт үздірмейтін тенденциялар да байқалып отыр.
Атап айтқанда, еліміздің үш аймағында – Нұр-Сұлтан қаласында, Батыс Қазақстан және Қызылорда облыстарында өткен аптада кейбір азық-түлік түрлерінің бағасы арзандаған. Бұл туралы премьер-министрдің бірінші орынбасары Әлихан Смайылов әлеуметтік маңызы бар азық-түлік тауарларының бағасын реттеу мәселелері жөніндегі жиында ресми түрде мәлімдеді. Бұл да болса, дәтке қуат етерлік жағдай.
Рас, соңғы кезде ұлттық валютаның біршама әлсірегені өтірік емес. Дегенмен елдегі жалпы қаржы-экономикалық жағдайда, ішінара болса да, оң өзгерістер бар.
ӨМІРЗАҚ МҰҚАЙ
1746 рет
көрсетілді2
пікір