- Өндірістік әлеует
- 24 Желтоқсан, 2021
Өрлеу үрдісіне оң ықпал
Қарашығанақ кен орнында 4-ші газды қайта қысымдайтын компрессорды іске қосу рәсімі өтті. Жалпы құны 500 млн доллардан асатын іргелі жобаның аяқталуы Қазақстан Тәуелсіздігінің 30 жылдық мерейтойына орайластырылып отыр.
Шараға Батыс-Қазақстан облысының әкімі Ғали Есқалиев, Karachaganak PetroleumOperating BV басшылығы мен жоба серіктестері – ENI, Royal Dutch Shell, Chevron, ЛУКОЙЛ, ҚазМұнайГаз компаниялары және Самұрық-Қазына қорының өкілдері қатысты. «Самұрық-Қазына» АҚ басқарма төрағасы Алмасадам Сәтқалиев Қарашығанақ кеніші республикамыздың экономикалық тұрақты дамуы үшін стратегиялық маңызға ие екенін тілге тиек етті.
– Жоба іске қосылғалы мұнай мен газ саудасынан салықтар мен әлеуметтік төлемдер ретінде еліміздің бюджетіне 39,4 млрд доллар түсті. Кен орны жұмысы өңірдің әлеуметтік-экономикалық өрлеуіне оң ықпалын тигізді. Жаңа жұмыс орындары құрылып, жаңа технологиялар енді, инфрақұрылым дамыды, – деді Алмасадам Сәтқалиев.
4-ші компрессор жобасын жүзеге асыру газды қайта қысымдап, жер астына жіберу көлемін арттыруға, соның есебінен мұнай өндіру көлемін сақтап қалуға септігін тигізеді. Сөйтіп, 2038 жылға дейін мұнай өндіру көлемі 7 млн тоннаға дейін жетуі мүмкін.
Қарашығанақ газ конденсаты кен орны әлемдегі ең ірілердің бірі саналады. Оның балансындағы қор – 9 млрд баррель конденсат пен 48 триллион текше фут газ. Жалпы бағаланған қоры 2,4 миллиард баррель конденсат пен 16 триллион текше метр газ.
923 рет
көрсетілді2
пікір