- Спорт
- 21 Қаңтар, 2022
Жұптық сында ешкімге дес бермеді
Теннисші қызымыз Анна Данилина Австралияның Сидней қаласында өткен WTA 500 турнирінің жұптық сынында жеңімпаз атанды.
Жасыл құрлықтағы додада отандасымыз бразилиялық Беатрис Хаддад Майямен бірге жарыстың үшінші ракеткаларын жеңіп, турнирдің сенсациясын тіркеді. Қазақстандық-бразилиялық жұп 1 сағат 5 минутқа созылған бәсекеде канадалық Габриэла Дабровски мен мексикалық Джулиана Олмосты 6:4, 6:2 есебімен ұтты. Анна мен Беатрис жартылай финалға шығу үшін ресейліктер Екатерина Александрова және Натела Дзаламидземен шеберлік байқасты. Нәтижесінде жерлесіміз басымдық танытып келесі кезеңге жолдама алды.
А.Данилина бразилиялық Беатрис Хаддад Майямен бірге жартылай финалда жарыстың 2-ракеткалары, жапониялықтар Сюко Аяома – Ена Шибахарамен шеберлік байқасты. Бірінші партияның жетінші геймінде Анна мен Беатрис брейк жасап, сол басымдылықты сақтап қалды – 6:4. Екінші сетте тай-брейкте жапониялықтар айласын асырды. Есеп 7:6 (7:2). Супер тай-брейкте қазақстандық-бразилиялық жұп 5:2 есебімен алда тұрғанымен, қарсыластарының таразы басын теңестіруіне жол берді. Дегенмен сосын екі мини-брейк жасап, жеңісті жұлып алды – 10:6.
Осылайша жартылай финалда жапон аруларынан айласын асырған Анна мен Беатрис финалға шықты. Ақтық сында оларға германиялық Вивиан Хайзен мен венгриялық Панна Удварди қарсылас атанды. Ойынның бірінші партиясында германиялық-мажарстандық жұп басымдылық көрсетті. Таблода есеп – 6:4. Екінші сетте Анна мен Беатрис брейкпен алға шықты – 2:0. Матч барысында олар сол басымдылығын сақтап қалды. Есеп 7:5-ке жетті. Супер тай-брейкте де олар 4:0 есебімен алға шықты. Ойын соңында біраз мүмкіндікті пайдалана алмағанымен, алайда алдыңға партиялардағы басымдықтың салдарынан жалпы жеңіспен ойынды тәмамдады. Шиеленісті ойынның соңғы кезеңінде 10:8 есебімен басым түсті.
Финалдағы тартысты матч 1 сағат 36 минутқа созылды. Бұл кездесуде қарсыластар қос-қостан брейк жасады. Анна Данилина жұптық сында спорттық жолында алғаш рет WTA 500 жарысының чемпионы атанды. Жерлесіміз халықаралық аренада жеке сайыстан гөрі жұптық бәсекеде анағұрлым жақсы өнер көрсетіп жүргені жасырын емес. Бұған дәлел, жуырда Үндістанның Пуна қаласында ITF W25 сериясы бойынша өткен турнирінің жеңімпазы атанды. Сол байрақты бәсекеде А.Данилина украиналық Валерия Страховамен бірге финалда жапониялықтар Фуна Козаки – Мисаки Мацудамен бас жүлдені сарапқа салды. Қазақстандық-украиналық жұп тартысты матчта 6:0, 2:6, 10:5 есебімен жеңіске жетті. Анна Данилина осылайша жұптық сында ITF World Tennis Tour додаларында спорттық жолындағы 23-інші, 2021 жылдың 9-шы титулына қол жеткізді. Ол сондай-ақ былтыр Польшада WTA 250 жарысында алғаш рет чемпиондық атақты жеңіп алды. Енді ол таяуда дәстүрлі жылда өтетін Австралия ашық чемпионатына қатысуды ұйғарып отыр. Айта кетерлігі, аруымыз қазіргі кезде жұптық сында әлемдік рейтингіде 75-ші орында тұр.
Сидней төрінде өткен дүбірлі додада өкінішке қарай басқа жерлестеріміз жасындай жарқырай алмады. Жекелей бәсекеде тәуір өнер көрсетіп келе жатқан еліміздің бірінші, әлемнің 12-ші ракеткашы Елена Рыбакина жарақатына байланысты жарысты жалғастырудан бас тартты. Ол екінші айналымда франциялық Каролин Гарсиямен кездесуге тиіс болатын.
Ерлер арасындағы осы жарыста Андрей Голубев пен хорватиялық Франко Скугор корт иелері, австралиялықтар Мэтт Рид – Алексей Попыринге 3:6, 1:6 есебімен есе жіберді. Тағы бір жерлесіміз Александр Недовесов пәкістандық Айсам Курешимен бірге жартылай финалға шығу үшін австралиялық Джон Пирс – словакиялық Филип Полашекпен сынға түсіп, келесі кезеңге шыға алмады.
Жақында әйелдер теннисі қауымдастығының (WTA) жаңартылған рейтингі жарияланды. Отандық теннисші қызымыз Елена Рыбакина әлемдік рейтингте ресми түрде 12-ші орынға көтерілді. Ол 13-ші орында тұрған американдық Совия Кенинді небәрі үш ұпайға басып озған. Жаңартылған рейтінгте 11-ші орынға 2968 ұпай жинаған ресейлік Анастасия Павлюченкова жайғасса, тунистік Онс Жабер 3500 ұпаймен үздік ондықты түйіндеп тұр.
Қазақстан теннисі тарихында бұрын-соңды ешқандай спортшы 12-ші орынға дейін көтерілмеген. Ел намысын қорғайтын тағы бір отандасымыз Юлия Путинцева да рейтингте бір саты жоғарылады. Қазір Ю.Путинцева 1400 ұпаймен 42-ші орында келеді. Сонымен қатар, төрт саты жоғарылаған Зарина Диас 732 баллмен 104-ші орынға көтерілген.
НҰРЛАН ҚҰМАР
343 рет
көрсетілді0
пікір