• Аймақ тынысы
  • 21 Қаңтар, 2022

Бірлесіп атқарған іс берекелі

Түркістан облысы Сайрам ауданында «Парасат» пікірталас клубы жұмыс істейді. Аудан әкімінің қолдауымен құрылған клубта жергілікті басшылар мен халық тұрақты түрде кездесіп, ең өзекті мәселелерді талқылап, шешімін табады. Облыс әкімі Өмірзақ Шөкеев Сайрам ауданына барған жұмыс сапарында осы тәжірибені барлық аудан, қалада жүзеге асыруды тапсырды.

Қарабұлақ ауылында Сайрам ауданының зиялы қауым өкілдерімен және тұрғындарымен кездесуде өңір басшысы сайрамдықтардың ұсыныстары мен тілектерін тыңда­ды. Ел Президенті Қасым-Жомарт Тоқаевтың тапсырмасымен батыс және оңтүстік облыстарды дамыту жоспары әзірленетінін, бұл бастама ел әлеуетін көтеруге оң серпін беретінін атап өтті. Сонымен бірге төтенше жағдай кезінде бірлігі мен тыныштығын сақтаған Түркістан жұртшылығының отаншылдығына ризашылығын білдіріп, бұның бәрі жергілікті әкімдіктер мен қоғам мү­шелерінің, халықтың арасындағы байланыстың жақсы дәрежеде болға­нының белгісі екендігін жеткізді.

«Өңір тұрғындарының ауызбір­шілігі мен тәртіп сақшыла­рының, әкімдіктердің, қоғам белсенділері мен зиялы қауым және ерікті жастардың бірлесе атқарған жұмысы нәтижесінде облысымызда бұзақылық оқиғалары тіркелген жоқ. Бейбіт митингтер болды, бәріне жедел түсіндіру жұмысы жүргізіліп, диалог орнатылды. Нәти­жесінде облысымыздан төтенше жағдай режимі алынып тасталды. Кабинетте отыра берсең, халықпен кездесіп тұрмасаң, қоғамдағы кейбір мәселелерді білмей қалуың мүмкін. Сондықтан пандемия қолды байласа да, аудан, қалаларға сапарымда міндетті түрде ардагерлермен, зиялы қауыммен кездесемін. Кездесуге кәсіпкерлерді, жастарды, қоғам белсенділерін, жалпы айтары бар тұрғындарды да қосып отырмыз. Сөйлесейік, бір-бірімізді тыңдайық, елдің мәселесін бірлесе шешейік деген ой. Еркін пікір алмасып, сұрақ­тарыңызға жауап беруге дайынмын», – деген әкім сайрамдықтардың игі істерін жоғары бағалады.

Кездесуде ардагерлер мен зиялы қауым, жастар, жергілікті тұрғын­дар қоғамдағы түрлі мәселені қаузап, ұсы­ныстарын жеткізді. Облыстық Ардагерлер кеңесінің төрағасы Жеңісбек Мәуленқұлов пен ел ағалары да келелі ой қозғады. Елдің бірлігінен асқан құндылық жоқ екенін айтып, Пре­зи­денттің бастамаларын қолдай­тындарын айтты.

«Тұрғындары тығыз орналасқан Сайрамда әркім өз тірлігімен айналысып жатыр. Қолы бос жүрген адам жоқ. Өзінің ауылында, қорасында, бақшасында жұмыс істеп жүр. Бірлігін сақтап, тәртіпсіздіктерге қатыспады. Өйткені жұмысы бар. Екіншіден, Сайрам ауданында «Парасат» пікірталас клубы жұмыс істейді. Клубтың көш­пелі отырыстары әр ауылда өтіп, келелі мәселелер талқыланады. Біразы сол мезетте шешіліп жатады. Ең бас­тысы, билік пен халық арасындағы диалог алаңы бар. Сайрам ауданының тәжірибесін барлық аудан, қалада қолдануымыз керек. Кәсіпкерлік­ті дамытуда да үлгі тұтар істері мол. Жо­ғарыда айт­қанымдай, бізде халық пен билік арасында байланыс жақсы. Бірақ әлі де тереңдете түсуіміз керек. Әр әкім өзі басқаратын аумақтың проблемасын, жай-күйін жақсы білетін болса, өз жұмысын дүрыс атқарса, тұрғындармен ашық диалог орната алады. Мемлекет басшысы Қасым-Жомарт Тоқаев үкіметке, әкімдіктерге елдің әлеуетін көтеруге бағытталған тапсырмалар берді. Қымбатшылықты тоқтатып, бағаны тұрақтандыру, жұмыссыздықпен күрес, қоғаммен байланысты нығайту және өзге де салаларда жақсы бетұрыстар болады және осы бағытта жұмысты кү­шейтеміз. Сіздердің ұсыныстарыңыз бен пікірлеріңіз назарға алынады», – деді Ө.Шөкеев.

Облыс әкімі жұмыс сапарында Сайрам аудандық «Жастар ресурстық орталығы» жанынан құралған Ерік­тілер мектебі өкілдерімен кездесті. Мұнда 80-ге жуық волонтер тұрақты түрде қайырымдылық іс-шараларымен айналысады. Жастардың бастамасын оң бағалаған әкім олардың жұмысына сәттілік тіледі.

Жұмыс сапарында Өмірзақ Шөкеев Қасымбек  елді мекеніндегі «MEDICAL PARK-E» медициналық орталығының жұмысымен танысты. 2020 жылы ашылған орталықта білікті дәрігерлер елге медицналық көмек көрсетуде. Сонымен бірге өңір басшысы аграрлық техникалық колледждің шеберханасын аралап көрді. Мұнда ауыл шаруашылығы саласының мамандары даярланып, елге қызмет етіп келеді.

САЛТАНАТ ҚАЖЫКЕН

395 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

TENGE MONITOR №15

15 Сәуір, 2021

Жүктеу (PDF)

Редактор блогы

Рымтай сағынбекова

“TENGE MONITOR” газетінің Бас редактордың міндетін атқарушы