- Ақпарат
- 11 Ақпан, 2022
Ана мен бала денсаулығы – ұлт болашағы
Қазақстандықтар ел экономикасының өсуімен қатар, денсаулық сақтау жүйесінің нығаюын, ал медициналық қызметтердің мейлінше қолжетімді әрі сапалы болуын қалайтыны табиғи жәйт. Бұл ретте біз де қоғам болып, мемлекет болып осы міндетті шешу бағытында жұмыс істеуге тиіспіз.
Өйткені, халықтың денсаулығы – еліміздің басты байлығы. Ал, осы байлықтың жақсаруы, ең алдымен, әр адамның өз басына байланысты. Кезінде Тұңғыш Президентіміз Н.Ә.Назарбаев саналы ұрпақ тәрбиелеу, салауатты өмір салтын қалыптастыру, аурудың алдын алу шаралары жөнінде дәрігерлер мен биліктің алдына міндет қойды. Елімізде ең көп реформа жүргізіліп, жаңа технологиялар енгізіліп жататын салалардың бірі – денсаулық сақтау саласы. Денсаулық сақтау ұйымдарын қазіргі заманғы медициналық құрал-жабдықтармен қамтамасыз етуге, дәрігер мамандарды қайта даярлауға айтарлықтай қаржы бөлінуде. «Қазақстан – 2030» стратегиялық бағдарламасына отбасын жоспарлау мәселесінің енгізілуі жайдан-жай емес екендігі анық. Ендеше, отбасы мәселесі, оны жоспарлау дегеніміз – әйелдердің өсімталдық, яғни өсіп-өну үрдісін қадағалау арқылы денсаулығын сақтау және жақсарту болып табылады.
Қандай елдің болсын демографиялық, экономикалық, еңбек және әлеуметтік әлеуетін арттыру халықтың және ең алдымен ана мен баланың денсаулығына тікелей байланысты болады. Міне, сол себепті, Қазақстан Республикасында да ана мен баланы қорғау – елдегі денсаулық сақтау жүйесін дамытудың басым бағыттарының бірі болып отыр. Сондықтан да, ана өлімімен күрес бүгінде денсаулық сақтау ісіндегі ең өзекті міндет, ардақты борыш саналады.
Бала денсаулығы мемлекеттің ең басты мәселесі болуға тиіс. Себебі, болашақ жастар қоғамға зор үлес қосатыны белгілі. Қазіргі таңда елімізде балалар арасында небір түрлі әлеуметтік мәселелер жеткілікті.
ЮНИСЕФ-тің зерттеуіне сәйкес, Қазақстандағы және әлемдегі балалардың өлімі мен емдеуге жатқызудың басты себептерінің бірі – жарақат болып табылады. Қазақстан ТМД елдерінің ішінде алғаш рет АИТВ-мен өмір сүріп жатқан балалар мен жасөспірімдер үшін психологиялық-әлеуметтік қолдау көрсететін стандарттарды әзірлеп, оларды қызмет көрсетушілердің тұрақты тәжірибесіне енгізді. Денсаулық сақтау министрлігі мен ЮНИСЕФ-тің бірлескен жұмысының арқасында, АИТВ және басқа созылмалы аурулары бар жасөспірімдердің психологиялық-әлеуметтік игілікке ие болу құқықтарын іске асыратын қызмет көрсету стандарттары алғаш рет пайда болды. Стандарттардың ішінде психологиялық, когнитивтік, әлеуметтік және эмоционалдық қажеттіліктерді қанағаттандыруға арналған дербес қызметтер топтамасы бар және мәртебені ашып көрсетуге, емделу тәртібін ұстануды қолдауға, жасөспірімдер үшін АИТВ-ге тестілеу қолжетімділігін жеңілдетуге, интеграцияландырылған көмек көрсетуге, сонымен қатар АИТВ-сы бар жасөспірімдермен тең дәрежеде қарым-қатынас орнатуды қолдайтын диалогты құруға баса назар аударылады. Сонымен қатар мамандар баланы емшек сүтімен емізуді дұрыс деп санайды. 2006 жылдан бастап, Қазақстанда 6 айға дейін балаларды тек емшек сүтімен емізудің көрсеткіштері 16,8 %-дан 2015 жылы 37,8 %-ға дейін өсті. Қазір бұл көрсеткіш 40 пайыздан асып түсті.
Ана мен бала денсаулығын қорғау әрбір адамға қатысты. Ана денсаулығы деп жүктілік, босану және босанғаннан кейінгі кезіндегі әйелдер денсаулығын айтамыз. Жаңа туылған нәрестелер денсаулығы – олардың өмір сүруіндегі алғашқы айдағы денсаулығы. Әлемнің кейбір аймақтарындағы медико-санитарлық көмек алудағы әділетсіздік – жоғары ана өлімін және бай мен кедей арасындағы айырмашылықты көрсетеді. Жалпы ана өлімі оқиғалары (99%) дамушы елдерде болып жатады.
Қазақстанда 6 айға дейінгі сәбилерді емшек сүтімен емізу ауылдық жерлерге қарағанда қалалық жерлерде кеңінен таралған (сәйкесінше 34,4 % және 29,2 %). Ерте емізудің болмауы тыныс алу органдарының аурулары, гипотермия, диарея және жұқпалы аурулардың пайда болуының себебі болып табылады.
Салтанат ҚАЖЫКЕН
8969 рет
көрсетілді0
пікір