- Бизнес & Қоғам
- 03 Наурыз, 2022
Тұрақтылық пен орнықты даму жолында
Отбасы берекесінің ұйытқысы, бала өсіріп, жар күтетін әйелдер қауымы ел экономикасына өзіндік үлес қосуда да белсенділік танытып келеді. Тұрақты дамудың негізі болып табылатын шағын және орта кәсіпкерлік саласында іскерлігімен ортақ істің өркендеп, өрістеуіне мұрындық болып жүрген қыз-келіншектер аз емес.
Қоғамда белсенді әрі жеке кәсібімен айналысатын қыз-келіншектер туралы ақпарат жиі жарияланады. Бұл соңғы уақытта бизнесте де әйелдердің үлесі бар екенін айқын көрсетіп отырғаны анық. Қандай бизнес түрімен айналысу керек екенін шама-шарқына, қабілет-қарымына қарай таңдау әркімнің өз еркінде. Дегенмен бизнес және әйел дегенде жеңіл өнеркәсіп, тағам және қызмет көрсету салалары бірінші ойға оралады.
Қазақстанның мыңдаған ауылдағы нәзік жандылардың сауалнамасы бойынша еліміздегі әйелдер ауыл кәсіпкерлігінің қосымша әлеуетінің бар екенін көрсетті және сарапшылар оның 30%-дан жоғары екенін алға тартып отыр. Зерттеу нәтижесінде әйелдердің ауылда өз ісін ашуының негізгі себептерін, қорқыныш деңгейін, кәсіпкерлік қызметке деген ынтасын және дайындығын, нақты өңірлерде кәсіпкерлікпен айналысуды бастау үшін негізгі проблемалар мен кедергілерді; сондай-ақ ауыл әйелдерінің осындай жұмыс әдістері бойынша қолдау және артықшылық нысандарына қажеттілігін анықтады. Бұл зерттеу ел өңірлеріне байланысты бизнес ашу үшін қолдау алу үшін ауыл әйелдерінің қажеттіліктеріндегі айырмашылықты жариялады.
Ауылдағы әйелдер кәсіпкерлігі – экономикалық тұрақтылық пен орнықты дамуға бастайтын жол екендігі анық. Осыған орай, таяуда Нұр-Сұлтанда ауыл әйелдерінің кәсіпкерлігін қолдау мақсатында кезекті жиын өтті. Сондай-ақ конференция аясында әйелдерді кәсіпкерлік негіздеріне оқыту бойынша жыл сайынғы әлеуметтік жобаның жаңа маусымы, өз ісін дамытуға грант алу мүмкіндігімен, бизнестегі алғашқы қадамдарды бастаған әйелдердің мәселесі кеңінен талқыланды.
«Егер әйелдер жұмыс орындарын құруға қатысса және бұл процесс барлық кезеңдерде жан-жақты қолдау мен қызметті сүйемелдейтін болса, онда бұл елдің әлеуметтік экономикасы мен ЖІӨ өсуіне оң әсер етеді. Нәтижесінде біз кәсіпкерлік белсенділіктің ілгерілеуін және әйелдердің әлеуметтік көңіл – күйінің жақсаруына куә боламыз. Бірақ бұл үшін мемлекеттік ауқымда ауылда бизнесті бастау үшін бар кедергілерді азайтуға бағытталған шаралар кешені шешілуі тиіс», – деді Қазақстан ауыл әйелдері форумының ұйымдастыру комитетінің төрағасы, Парламент Мәжілісінің ІV, V, VI шақырылымының депутаты Майра Айсина.
Ауыл әйелдерінің бизнес ашуының мәні тек кірісті көбейту ғана емес, ең алдымен ешкімге кіріптар болмай өз арманына қол жеткізіп, жүзеге асыру. Әйелдер негізінен сауда, сұлулық индустриясы, қоғамдық тамақтану және қонақүй бизнесі сияқты салаларға басымырақ көңіл бөліп отыр. Әрине бұл жекелеген өңірлердің туристік әлеуетін дамытуға қызмет етуі мүмкін. Дегенмен ауылдағы әйел кәсіпкерлердің фермерлік қызметпен айналысуы төртінші орында тұр. Бұл осы бағыт әлеуетінің тиісті дәрежеде бағаланбағанын көрсетеді.
Сауалнама қорытындысы сәйкес, бизнестегі сәтсіздіктерден қорқу Қазақстан бойынша орта есеппен ауыл әйелдерінің 56%-ын құрайды. Бұл Қарағанды, Ақмола, Шығыс Қазақстан және Алматы облыстарында жиі кездеседі (66-81%). Негізгі қорқыныш қаржыландыруды іздеумен және ақшаны жоғалтудан қорқумен байланысты. Бұдан басқа психологиялық факторлар, атап айтқанда есеп беру мен тексерудің қиындықтарынан қорқу. Алайда, бұл кедергілер «Белестері» жобасының білім беру бағдарламаларында ұсынылатын психологиялық кедергілерді жеңу және бухгалтерлік есеп жүргізу бойынша практикалық сабақтардың көмегімен шешіледі, бұл осы бағдарламаларға деген жоғары сұраныстың бар екендігін дәлелдеп тұр.
Сауалнама аясында Алматы, Түркістан және Ақмола облыстарындағы әйелдер арасындағы себеп-салдар, қауіптерге және қолдау түрлеріне терең талдау жүргізілді. Бұл өңірлердің тұрғындарының негізгі проблемалары жұмыссыздық, өмір сүру деңгейінің төмендігі, жолдардың, көлік пен байланыстың жай-күйі немесе болмауы. Сондай-ақ Түркістан және Алматы облыстары үшін үй-жайларды жалға алу немесе сатып алу құнының жоғары болуы. Ал Ақмола облысы үшін су және электр желілеріне қосылу қиындығының болуы аса өзекті. Әлеуметтік мәселелердің ішінде Алматы облысында бала-бақшалардың тапшылығы, Ақмола облысында медициналық қызмет көрсету деңгейінің төмендігі, Түркістан облысында отбасылық жанжалдар бар. Түркістан облысында әйелдер арасында бизнеспен айналысуға деген ниет айтарлықтай жоғары болса, ал 36%-ы неден бастау керектігін білмейді. 43%-дан астам алматылық та осы сияқты, бірақ бұл ретте респонденттердің өтініш беру деңгейі айтарлықтай төмен. Ақмола облысында ауыл тұрғындары «озық» және іс жүргізу, салық салу және өнімді өткізу мүмкіндіктері туралы өз білімдерінің жетіспеушілігінен кедергілерге тап болатынын айтады.
«Біздің оқу бағдарламаларымызға деген сұраныс соңғы жылдары айтарлықтай өсті. Ауыл әйелдері экономикалық қиындықтарға, инфрақұрылымның жетіспеушілігіне, әлеуметтік-психологиялық кедергілерге және басқа да кедергілерге қарамастан жұмысқа орналасу мен табысты арттыру мәселелерін шешуді белсенді түрде іздейді. Біз ісін жаңа бастаған кәсіпкерлерге, сенімді болуға көмектесеміз, біріншіден, бизнесті оқыту үшін онлайн-ресурстарды дамытуға, екіншіден, мотивациялық қолдау көрсетуге, «Белестері» жобасына қатысушылардың табысты тәжірибесінің мысалдарын таратуға ұмтыламыз», – деді «Әлеуметтік динамика» қоғамдық қорының директоры Елена Ожго.
«2022 жыл «Белестері» жобасы үшін ерекше, мерейтойлық жыл екенін қуана хабарлаймыз. 1-ші наурыздан бастап жобаның 10-шы маусымы басталды, ол екі бағыт бойынша оқытуды ұсынады. «Жаңадан бастаушыларға арналған бизнес негіздері» және «Жеке қосалқы шаруашылықтар». Оқыту онлайн режимінде қолжетімді. Жобаға бірыңғай кіру ccb.kz сайты арқылы жүзеге асырылады. Сондай-ақ онда әйелдер арасындағы үздік бизнес-идеялар байқауына өтінімдер қабылдау басталады. Биыл «Coca-Cola Белестері» байқауының жеңімпаздарын 20 грант күтіп тұр, олар ауыл әйелдерінің мерейтойлық 5-форумында табысталады, – деп мәлімдеді «Жасыл экономика және G-Global дамыту Коалициясы» ЗТБ атқарушы директоры Асхат Сүлейменов.
«Coca-Cola Белестері» жобасы 2012 жылы «Әлеуметтік динамика» қоғамдық қорының бастамасымен және The Coca-Cola Foundation халықаралық қайырымдылық қорының қолдауымен басталды. 2013 жылдан бастап жобаға серіктес – «Жасыл экономиканы қолдау және G-Global-ды дамыту Коалициясы» ЗТБ қосылды. Тараптардың күш-жігерін біріктіре отырып, жоба Қазақстанның барлық өңірлерінен жұмыспен қамтылмаған әйелдерді кәсіпкерлікке оқыту бағдарламаларына тарта отырып жұмыс істейді.
Былтырғы жылдың қорытындысы бойынша 50 мыңнан астам әйел оқытылды, конкурсқа қатысуға мыңдаған өтінім берілді, 97 әйел өзінің алғашқы бизнесін ашуға грант алды.
Жалпы статистика бойынша елімізде 4 миллионға жуық әйел ауылда тұрады екен. Елді-мекендердегі әрбір оныншы отбасы қарттардың зейнетақысына және балаларының жәрдемақысына күн көреді. Сол үшін жыл сайын әйелдер арасындағы кәсіпкерлікті дамытуға басымдық берілу мәселесі көтеріліп отырылуы орынды.
Салтанат ҚАЖЫКЕН
2100 рет
көрсетілді0
пікір