- Бизнес & Қоғам
- 20 Наурыз, 2022
Елімізде эпидемиологиялық ахуал тұрақтанып келеді
Әлем жұртшылығының назары ауған үрейлі де қауіпті індет біразға дейін тірі жанның жадында сақталары сөзсіз. Қазіргі уақытта елдегі эпидемиологиялық ахуал тұрақтанып, қойылған шектеу шаралары біртіндеп алынып жатыр. Олай дейтінімізге де негіз жоқ емес. Оған дәлел, биылғы жылы наурыз айының 14 күні Үкімет жанынан құрылған Қазақстанда коронавирустың таралуына жол бермеу жөніндегі ведомствоаралық комиссиясы жариялаған елдегі эпидемиологиялық жағдайды бағалау матрицасында айқындалып көрсетілген. Ал Денсаулық сақтау министрлігі аталған инфекцияның пайда болған кезеңінен бастап, осы екі жыл аралығында атқарған істері төңірегінде қорытындылаған ақпаратпен жұртшылықты құлақтандырды.
Берілген мәліметтерге сәйкес, дүниежүзі сияқты Қазақстан да коронавирус инфекциясын алдын алудағы белгіленген іс-шаралар кешенінің белсенділікпен жүргізілгеніне тоқталған. Ел есінде болса, вирустық инфекция тура осыдан екі жыл бұрын наурыз айының орта шеңінде шетелден келген азаматтан анықталып тіркелген еді. Елімізге енген вирустың өршуіне жол бермеу мақсатында бірнеше іс-шаралар қабылданғаны да белгілі. Әлі де болса инфекцияны ауыздықтауға бағытталған жұмыстар іске асырылып келеді. Қазақстанда вирустық инфекция табылған алғашқы күні Мемлекет басшысы шұғыл түрде шара қабылдап, Үкімет жанынан ведомствоаралық комиссия құрылған болатын. Содан бері комиссия құрамы 2 мыңнан аса шешім шығарған. Оның ішінде COVID–19 алдын алуға негізделген бағыттардың бірі халық денсаулығын сақтау және қорғауды, мемлекеттік органдардың өзара іс-қимылын, медициналық ұйымдардың инфрақұрылымын нығайтуды, дәрілік заттарды, иммундық-биологиялық препараттарды, медициналық мақсаттағы бұйымдар мен жабдықтарды, жеке қорғаныш құралдарын сатып алу мәселелері жөнінде елдегі ахуал мен әлемдегі эпидемиологиялық жағдайды ескеріп, шектеу шараларын күшейтуді және жеңілдету мәселелері тұрғысында ұтымды шешімдер қабылдады. Пандемия кезінде халықаралық тәжірибені ескеріп, эпидемиологиялық ахуал мен эпидемияға қарсы күресті нығайтты. Елдегі іскерлік белсенділікті сақтау аралығындағы балансты ой елегінен өткізе келе, халық арасында індетті алдын алу, емдеу және шектеу шараларын енгізу тәсілдерін үнемі бақылап отырды. Жарияланған мәліметке сәйкес, осы екі жыл аралығында вирустың тарау көрсеткіші 1 айдан 3 айға дейін созылып 5 рет көбейгендігі айтылған. Еліміздегі вирусқа шалдыққан науқастарға уақтылы медициналық көмек көрсету үшін қысқа мерзімді 16 модульдік аурухана салынып, 3 инфекциялық аурухана реконструкциядан өткен. Сонымен қатар 63 амбулаторлық-емхана ұйымы, 64 оттегі станциясы пайдалануға берілген. 3 мыңнан астам өкпені жасанды желдету аппараты сатып алынған. 185 аудандық аурухана 100 пайызға рентгендік диагностикалық құралдармен жабдықталып, жедел медициналық көмек көрсету қызметіне 1 367 бірліктегі жаңа автокөлік құралы сатып алынып, соның арқасында сырқаттанушыларға өз уақытында көмек көрсетілген.
Сондай-ақ жылжымалы медициналық кешендер паркі 100 пайызға жабдықталғандығы аталды. Еліміздің 184 зертханасында пандемия басталған кезеңнен бері коронавирус инфекциясын ПТР тәсілімен анықтау бойынша республикада 22 миллионнан астам сынамаға зертханалық зерттеу жүргізілген. Полемераздық тізбек реакциясында талдауларды диагностикалауда және сырттан әкелінген материалдарға вирустың мутациялық өзгергіштігін мониторингілеуді қамтамасыз етуде министрлік вирусқа генетикалық зерттеуді (1331 сынамаға 26420 зерттеулер) үздіксіз жүргізіп және қадағалап отырды. Осы аралықта еліміздің аймағында коронавирус инфекциясының 5 түрлі штаммы (Альфа, Бета, Дельта, Эта, Омикрон) анықталғандығына тоқталып өтті.
Өткен жылдың 1 ақпанынан басталған тұрғындарды вакциналау жөнінде Қарағанды фармацевтикалық кешенінің базасында «Спутник V», «Спутник Лайт» (Ресей) вакциналарын өндіру іске қосылғаны белгілі. Ұлттық биологиялық қауіпсіздік институтының базасында «QazVac» отандық вакцинасы әзірленіп қолданысқа берілген болатын. Бүгінгі күні коронавирус инфекциясына қарсы халықты ревакцинациялау жалғасып келеді. Қазақстан азаматтары үшін вакцинаның 6 түрі (Спутник V, QazVac, Hayat-Vax, SinoPharm, Спутник Light және Pfizer) қолжетімді болып тұр. Қайсысын алам десе де адамдардың өз еркі. Сонымен елімізде I компонентпен -10,3 млн адам, II компонентпен -9,7 млн. адам вакциналанған. 3 млн. жуық адам қайта вакциналаудан өткен.
Қазіргі күні елімізде эпидемиологиялық ахуал тұрақтанып келеді. Өңірлер жасыл аймаққа еніп, барлық шектеу шаралары алынып жатыр. Мамандар коронавирус инфекциясының пандемиясы әлі ұшты-күйлі аяқталмағандығын айтып, вакциналау мен ревакциналаудың пайдасына дұрыс таңдау жасау керектігін және бұл ұжымдық иммунитеттің қалыптасуына әрі елдегі эпидемиологиялық жағдайдың тұрақтануына септігін тигізетініне кәміл сенімді.
ГҮЛМИРА МЕРАЛИНА
1969 рет
көрсетілді0
пікір