- Білім & Ғылым
- 31 Наурыз, 2022
Қолжазба – ғасырлар руханияты
«Ғылым ордасы» РМК Орталық ғылыми кітапханасы, Сирек кітаптар мен қолжазбалар қорының ұйымдастыруымен геолог ғалым, тау-кен инженері, геология-минералогия ғылымдарының докторы, профессор, Ұлттық ғылым академиясының алғашқы құрылтайшыларының бірі және академияның корреспондент-мүшесі, Қазақстанның еңбек сіңірген ғылым қайраткері Ақжан әл-Машанидің «Табиғат – Матбуғат» атты кітабының тұсаукесер рәсімі өтті.
Ақжан әл-Машанидің 115 жылдық, сонымен қатар Ұлттық ғылым академиясының құрылғанына 75 жыл толу құрметіне арналған шараны «Ғылым ордасы» РМК бас директорының ғылыми инновациялар және халықаралық байланыс жөніндегі орынбасары Нұрлан Сейдін жүргізіп отырды. ҚР ҒА вице президенті, академик, техника ғылымдарының докторы Ғалымқайыр Мұтанов, әл-Фараби атындағы Қазақ ұлттық университетінің Шығыстану факультетінің деканы Ықтияр Палтөре, «Руханият – Әбу Насыр әл-Фараби» музейінің қызметкері Жанболат Әбжаппар, Сирек кітаптар, қолжазбалар және ұлттық әдебиет бөлімінің бас қор сақтаушысы Дария Нұрмұхамбетова және тағы да басқа ғалымдар құнды кітап туралы өз пікірлерін білдіріп, баяндамалар оқыды. Сонымен қатар шара аясында көшпелі музей және фотокөрме ұйымдастырылып, тұсаукесерге қатысушылар мұрағаттан алынған бейнебаянды тамашалады.
«Табиғат – Матбуғат» – Ақжан әл-Машани әл-Фарабидің космологиялық еңбегіндегі табиғат ғылымынан адам тағылым алуға міндетті деген ойды дәлелдейді. Құнды қолжазба басылымы — жас зерттеушілерге, ұстаздар мен студенттерге, жалпы оқырмандарға ой салып, ақыл-сананы даналыққа баулитын; халқымыздың – мәдениет, ғылым, өнер, сәулет, жазу тарихын, дін мен ұлттық дүниетанымының сырларын жаңа қырларынан тануға жетелейтін бір көмекші құрал.
«Табиғат – матбуғат» деген сөз аударғанда «Табиғат – баспа» деген мағынаны береді. Табиғаттың әр жаратылысында Алланың белгісі бар. Қолжазба табиғаттың сол сырын метофизикалық, жоғары математика, дін, мәдениет жағынан ашуға тырысады. Мәселен, «жер кіндігі — темірқазық» деген мақал тек қазақта ғана бар. Құранда «Сендерде темірді жасайтын орасан күш бар» делінген. Сол күшті ата-бабаларымыз баяғыда игерген. Алтайда темір өндірген. Бұл ғылыми еңбекте көптеген жаратылыстың құпиялары, соның бірі темірдің сыры, оның ерекше қасиеті және өзгеде табиғаттың тылсымдары жайлы сыр шертіледі.
Қолжазба да, кітап та ҚР БҒМ ҒК «Ғылым ордасы» РМК Орталық ғылыми кітапханасының Сирек кітаптар мен қолжазбалар қорында сақтаулы және барлық қызығушылық танытқан оқырмандарға қолжетімді болады. Бір қызығы, «Табиғат – матбуғатты» 1984 жылы профессор Ақжан әл-Машанидің өзі кітапханаға сыйлаған. Сол күннен бастап қолжазба 38 жыл бойы біздің қорда сақталды, бірақ араб тілінде жазылғандықтан оны ешкім пайдалана алмады. Өткен жылы қолжазбаның аударма ісінің ұйымдастыруын Ақжан әл-Машанидің шәкірті, фарабитанушы зерттеуші Гүлсім Садақбаева қолға алған болатын.
Ақжан Әл-Машани – Әбу Насыр әл-Фарабидің ғылыми мұрасын Қазақстанда және шетелде зерттеген тұңғыш ғалым. Әбу Насыр әл-Фарабидің Дамаскідегі (Сирия) Баб ас-Сағир қорымынан қабірін тауып, құлпытас орнатуға атсалысқан және ұлы ойшылдың Қазақстан жерінде – Отырарда туғанын дәлелдеген. Әл-Машанидің 100 жылдық мерейтойы ЮНЕСКО көлемінде аталып өтілді.
НҰРЛАН ҚҰМАР
2985 рет
көрсетілді0
пікір