- Руханият
- 28 Сәуір, 2022
«Теңізшевройл» өткізген шеберлік сыныбы
Бүгінде отандық еңбек нарығында орталық және жергілікті басқару органдарымен, үкіметтік мекемелермен байланыс жөніндегі мамандарға сұраныс жоғары.
Әл-Фараби атындағы Қазақ ұлттық университетінің журналистика факультеті мен «Теңізшевройл» компаниясының қоғаммен және үкіметпен байланыс қызметі арасында білікті кадрлар даярлауға әдістемелік көмек көрсету жөніндегі жемісті ынтымақтастық жолға қойылған. Сейсенбіде өткізілген шеберлік сыныбында компанияның үкіметпен және жұртшылықпен байланыс бөлімінің бас менеджері Рзабек Артығалиев, компанияның құқықтық қамту бөлімінің бас менеджері Әсет Құрманбаев, қоғаммен байланыс жөніндегі білікті мамандар Светлана Қайырғалиева, Раушан Найзабаева, сондай-ақ журналистика факультетінің деканы Сансызбай Мадиев, кафедра меңгерушісі Назгүл Шыңғысова жоғары білім мен өндіріс арасындағы байланыстарды баянды ету жөнінде бірлескен іс-шаралар қабылдау қажеттігіне тоқталды. «Теңізшевройл» компаниясы тарапынан университеттің білім беру бағдарламаларының мазмұнын өндіріс қажеттілігіне сәйкестендіріп, жетілдіру, бірлескен зерттеулер мен жобалар жүргізу, оқытушы-профессорлық құрамның біліктілігін арттыру, студенттерді тағылымдамалардан өткізу жөнінде нақты ұсыныстар алға тартылды. Мұның өзі маман даярлау сапасын арттыруға жәрдемдесетіні атап өтілді.
Қоғаммен және үкіметпен байланыс, сондай-ақ кәсіпорынның ақпараттық саясаты мен ішкі және сыртқы коммуникация желілерін жолға қою мәселелері «Қазақ университеті» баспасынан жуырда жарық көрген «Қазіргі заманғы баспасөз қызметі» оқулығы мысалында сөз етілді. Оқулықтың жеке тарауы еліміздегі ірі салық төлеуші болып табылатын «Теңізшевройл» кәсіпорнының мұнай-газ саласындағы коммуникацияларының ерекшеліктеріне арналған. Басылымда жұртшылықпен және үкіметпен байланыс бағыттарына жан-жақты шолу жасалып, заманауи менеджменттің ерекшеліктері мен әлеуметтік инвестициялар саласындағы жұмыстың қыр-сыры жан-жақты қамтылған. Кітап авторы, әл-Фараби атындағы Қазақ ұлттық университеті журналистика факультетінің профессоры Жетпісбай Бекболатұлы «үкіметпен байланыс» мамандығы бойынша білім беру бағдарламаларын түзу, өзара тәжірибе алмасу, сондай-ақ бірлескен оқу құралын жазу жөніндегі пікірін ортаға салды.
РЫМТАЙ САҒЫНБЕКОВА
439 рет
көрсетілді0
пікір