- Бизнес & Қоғам
- 23 Маусым, 2022
Өмір сапасын жақсарту мақсатында
Қазақстанда тірек-қимыл, жүйке жүйесі ауыратын, аутизмге шалдыққан 100 мыңға жуық бала бар. «Балалар жылы» аясында оларды оңалту орталықтары көбейген. Емдеу мекемелерінде төсек-орын саны екі есе артып отыр. Нәтижесінде бір тоқсанның өзінде ерекше күтімге мұқтаж 12 мың бала арнайы медициналық көмек алып үлгерді.
Ерекше балаларды емдейтін эрготерапевттер ел аумағында биылдан бастап қана дайындала бастаған. Ал әлем елдерінде мұндай дәрігерлер 50 жылдан бері бар.
Алматыдағы Перинатология және балалар кардиохирургиясы орталығында эхокардиографиялық скрининг жүргізу тәжірибесі жүріп жатыр.
Дер кезінде жасалған медициналық тексеріс – сәтті емнің кепілі болғандықтан, бүлдіршіндердің денсаулығын алдын-ала тексерудің өзіндік тиімділігі көп.
Жыл сайын бұл орталықта мыңдаған сәби дүниеге келеді. Бала туған күннен бастап бір айға дейін скринингтен өтеді. Жалпы скрининг дегеніміз – ауруды және оның туындауына әсер ететін факторларды ерте анықтауға мүмкіндік беретін медициналық зерттеулер жиынтығы. Бір сөзбен айтқанда аурушаңдық пен мүгедектікті алдын алуға жасалатын амал. Орталықта жүйке жүйесінің зақымдануын ерте кезден анықтайтын психофизикалық, жүрек-қан тамырларын тексеретін кардиохирургиялық және шала туған балаларға эхокардиографиялық скрининг жасалады.
Жалпы бұл перинатальдық орталықта туған әр нәрестеге скрининг жасалады. Соңғы бес айда аудиологиялық скрининг жүргізу нәтижесінде 50-ден астам нәрестенің есту қабілеті нашар екені анықталған. Бірақ оларға дер кезінде ем тағайындалып, дәрігерлер кереңдіктің алдын алды. Сондықтан скрининг қоғамдық денсаулықты сақтап, өмір сүру сапасын жақсартуды мақсат етеді.
Қазіргі медицинада аурудың алдын алу маңызды болып табылады. Біздің елімізде балалардың денсаулығына ерекше назар бөлінеді және дені сау ұлт қалыптастыруға қажетті іс-шаралар жүзеге асырылады. Соның ішінде, біріншіден, отбасын жоспарлау бойынша кешенді шаралар қарастырылған. Екіншіден, жүкті әйелдердің перинатальды скринингі 3 рет жүргізіледі, бұл ұрықтың патологиясы мен кемшіліктерді уақытылы анықтауға мүмкіндік береді. Үшіншіден, перзентханада жаңа туған нәрестеге неонаталдық скрининг жүргізіледі. Бұдан басқа, педиатриялық көмек көрсетуді ұйымдастыру стандарттарына сәйкес балалардың аурушаңдығының, мүгедектігінің және өлім-жітімінің алдын алу, төмендету бойынша шаралар көзделген.
Әлеуметтік медициналық сақтандыру қоры хабарлағандай, ағымдағы жылы МӘМС жүйесінде скринингтер мен профилактикалық тексерулерді жүргізуге 39,7 миллиард теңге қарастырылған. Оның ішінде аудиологиялық скринингке – 5,1 миллиард теңге, 5 жасқа дейінгі балаларды профилактикалық тексеруге – шамамен 11,7 миллиард теңге, мектеп медицинасы шеңберінде профилактикалық тексеруге – 22,9 миллиардтан астам теңге.
Қорда балалар жеңілдікті санаттардың біріне кіретінін, сондықтан олар үшін 18 жасқа дейін міндетті әлеуметтік медициналық сақтандыру жарналарын мемлекет төлейтінін еске салды. Осылайша, барлық балалар автоматты түрде сақтандырылған және МӘМС жүйесінде қажетті медициналық көмекке құқылы.
Жаңа туған нәрестелерге, ерте жастағы және 6 жасқа дейінгі балаларға аудиологиялық скрининг жүргізіледі. Бұл баланың есту қабілетінің бұзылуын анықтауға мүмкіндік беретін жаппай стандартталған тексеру. Ол екі кезеңде жүзеге асырылады. Біріншісі – бала өмірінің алғашқы үш күнінде тікелей перзентханада. Екіншісі – өз емханасындағы баланы дамыту кабинеттеріндегі белгілі бір жастағы балаларға жүргізіледі. Бұл жағдайда учаскелік медбике ата-аналармен байланысып, белгіленген мерзімде скринингтен өтуге шақырады.
Балалардың есту қабілетінің бұзылуы анықталған жағдайда мүгедектікке әкелетін ауруларды оңалту және алдын алу бойынша шаралар қабылданады. Егер құлақ мүкістігі немесе кереңдік қаупі туындаса, онда баланы одан әрі тереңдетіп тексеру үшін сурдологиялық кабинеттерге, сондай-ақ тексеру және түзете-дамыта оқыту мәселелерін шешу үшін психологиялық-медициналық-педагогикалық консультацияға жібереді.
САЛТАНАТ ҚАЖЫКЕН
1993 рет
көрсетілді0
пікір