- Аймақ тынысы
- 28 Шілде, 2022
Екі қолға бір күрек табылады
Түркістан облысында 2025 жылға дейін 250 мыңнан астам жаңа жұмыс орны ашылады. Бұл туралы түркістандықтармен кездесуде облыс әкімі Өмірзақ Шөкеев мәлімдеді. Халықтың табысын арттыру мақсатында Түркістан облысы бойынша 2022-2025 жылдарға арналған жұмыспен қамту картасы жобасы бекітіліп, нәтижесінде 143 792 жұмыс орнын ашу жоспарланған.
Сонымен қатар, Мемлекет басшысының «10 мың тұрғынға 100 тұрақты жұмыс орындарын ашу» жөніндегі тапсырмасына сәйкес, облыстың экономикалық белсенді халық санына қарай 8 194 жаңа жұмыс орнын ашу жоспарлануда.
Биыл 444 салалық жобаны іске асыру аясында 33 819 жұмыс орнын ашу көзделуде. «Еңбек» бағыты аясында облыс бойынша 70 мың адамға жұмыспен қамту шараларын көрсету жоспарлануда. Биылдан бастап «Жастар тәжірибесі» жобасы шеңберінде 5 658 адамға 6,2 млрд теңге, «Алғашқы жұмыс орны» жобасы аясында 386 азаматқа 436,7 млн теңге қаржы қаралды. Сондай-ақ жастардың іскерлік бастамаларына қайтарымсыз 3,4 млрд теңгеге 2 765 грант беру көзделуде. «Өңір халқының табысын арттыруға бағытталған жұмыстар өз жалғасын табатын болады. Мемлекет басшысы атап өткендей, Қазақстанның шынайы жаңару кезеңіне сәтті қадам басуы жолында алдымызға қойылып отырған тапсырмалар мен міндеттерді бүкіл қоғам болып жұмыла атқаруымыз маңызды. Осы ретте бар күш-жігерімізді жұмылдырып, өз міндетімізді абыроймен атқарамыз деген сенімдемін. Баршаңызды Түркістанның қайта түлеп, дамуы үшін өз үлестеріңізді қосуға шақырамын. Еңсеміз биік, Тәуелсіздігіміз тұғырлы болсын», – деді Өмірзақ Шөкеев.
Түркістандағы құрылыс жұмыстарының көлемі 132,6 млрд теңгені құрады. Жыл басынан бері жалпы алаңы 296,2 мың шаршы метр тұрғын үй пайдалануға берілді. Жалпы сауда көлемі 148,3 млрд теңгеге жетті. Қаңтар-маусым арасында тасылған жүк көлемі 47,2 млн тоннаға жеткен.
Облыс әкімінің есепті кездесуінде 500-ден астам адам өздері және қала үшін маңызды мәселелерді талқылауға қатысты. Тағы үш мың адам желіге қосылды. Мұндай кездесулер тұрақты негізде өткізілетін болады.
САЛТАНАТ ҚАЖЫКЕН
453 рет
көрсетілді0
пікір