- Бизнес & Қоғам
- 09 Қыркүйек, 2022
Жетісулық жас отбасы бөдене фермасын ашты
Сарқан ауданында жас отбасы бөдене фермасын ашты. Бұл істі бастау Алматыдан ауылға қоныс аударғаннан кейін ойға келген еді. Қазір отбасылық шағын шаруашылықта күніне 1000 жұмыртқаға дейін өнім алынады. Жыл соңына қарай фермер бөдене санын ұлғайту арқылы оның көлемін 10 мыңға жеткізуді жоспарлап отыр.
Жас жұбайлар біраз жыл Алматы қаласында тұрған, бірақ отбасы балалармен толыққан соң табиғатпен етене болуды жөн көрген. «Өзім Қарағандыданмын, жоғары оқу орнын да сол жақтан бітірдім. Ал жұбайым осы жақтан. Сарқан ауданының Қарғалы ауылында туып-өскен. Ауылға 2019 жылы көшіп келдік, осында келгелі менің жаңа тынысым ашылғандай болды. Ауа таза, азық-түлік табиғи, балалар еркін. Бірақ мұнда қарап жатпай, жұмыс істеу керек. Тәжірибе жүзінде көз жеткізгеннен кейін диеталық ет пен жұмыртқа жеген өте пайдалы екенін біліп, содан бөдене өсіруді қолға алдым. Туысымыз осы бөдененің арқасында денсаулығын жақсартты. Бұрын ауыл шаруашылығын жете білмейтінмін. Кейін бәрін өзім интернеттің көмегімен үйрендім. Өткен жылдан бастап ара шаруашылығымен де айналыса бастадым. Өз жылыжайымыз бар, қызанақ, қияр, көк шөптер өсіреміз», – дейді отағасы Азамат Абыроев.
Қазір Азаматтың фермасында 1000 бөдене бар. Инкубаторға шамамен 7500 жұмыртқа салынған. 17 күннен кейін балапан жарып шыға бастайды, шамамен 40-шы күні аналықтары жұмыртқаласа, 45-ші күнге қарай аталықтары сойыла бастайды. Сондықтан да бастапқы кезде 3500 құс болған. Экологиялық таза еттің 1 келісін Азамат 3200 теңгеден сатады, 1 жұмыртқаның құны – 23 теңге. Бағалар әдеттегіден төмен, өйткені Азамат жергілікті фермерлердің арқасында құс азығы мәселесін шешіп алды. «Бұрын мен Ресейде өндірілетін дайын азықты алуға мәжбүр болдым. Бұл қалтама едәуір салмақ салатын. Бүгінгі күні шикізатты жергілікті фермерлерден сатып алып, құрама жемді өзім дайындаймын. Жақында тағы 100 тоннаға тапсырыс бердім», – деп атап өтті ісін жаңа бастаған кәсіпкер.
Қазір фермер күніне 1000 жұмыртқа алады, жыл соңына дейін құс санын 10-15 мыңға дейін көбейту арқылы оның көлемін 10 мыңға дейін жеткізуді жоспарлап отыр. Өнімді өткізу мәселесі де шешілді. Алматыдағы сауда орындарымен келісімге отырып, оған бөдененің жұмыртқасын және мұздатылған қалыптағы етін жібереді. Өнімді жергілікті тұрғындар да белсене сатып алады.
Шағын ферма кеңейтіліп, ресми тіркеуден өткеннен кейін алдағы уақытта Азамат нысанның іргесін одан әрі ұлғайтып, заманауи жабдықтар сатып алуды жоспарлап отыр. Ал әзірше кәсіпкер бөденеге торды өз қолымен жасап, Алматыда сатып алған инкубаторға арнап үй-жай салған.
Азамат омарташылықпен де айналысады. Өткен жылы оның омартасында 23 ара ұясы болса, биыл оның саны 50-ге жетті. Келешекте ара ұясын 200-ге жеткізу жоспарда бар.
Жұбайы да Азаматтан қалыспайды. Бақша мен жылыжайдағы жұмыс негізінен соның мойнында. Бірақ Әйгерім Абыроева оны ауырсынбайды, қайта өз еңбегінің жемісін көргеніне қуанады. Жас кәсіпкер Әйгерімнің мамандығы экономист, жақында «Бастау Бизнес» бағдарламасы бойынша оқып, қайтарымсыз грант алу үшін өз жобасын қорғады, енді отбасымен конкурс нәтижесін күтіп отыр. «Черкасск ауылдық округінің әкімі бізге үнемі қолдау білдіреді. Әзірге бізде 30 сотық жер бар. Негізінде шешімін таппай жатқан түйткілдер жоқ, алайда, менің туған ауылымда жол жөнделіп, медициналық қызмет көрсету сапасы жақсарғанын қалаймыз, балаларымызды әзірге шағын орталыққа апарып жүрміз, балабақша ашылса жақсы болар еді. Мүмкіндігінше халықты төмен бағадағы сапалы өніммен қамтамасыз етуге тырысамыз, бұл – біздің отбасылық шағын фермамыздың басты міндеттерінің бірі», – деп түйіндеді фермер.
Қазір Черкасск ауылдық округінде жалпы ұзындығы 5 шақырым болатын облыстық және аудандық маңыздағы жолдар жөнделіп жатыр. Көктемге қарай облыстық маңыздағы Қойлық – Қарғалы арасындағы жолдың 10-24 шақырым учаскесінің орташа жөндеуі аяқталады. Бұл жолдың көп бөлігі ауыл ішімен өтетінін атап өту керек.
Қазір шағын отбасылық шаруашылықта ауылдың 7 азаматы жұмыс істейді. Олардың орташа айлық жалақылары – 90-100 мың теңге. Кәсіпкер олардың бәріне істің мән-жайын өзі үйретеді. Ауылдық округтің қоғамдық өміріне белсене араласып, жерлестеріне барынша көмектесуге тырысады.
Жалпы Сарқан ауданында өткен 7 айдың қорытындысы бойынша ауыл шаруашылығында 17 071,4 млн. теңгенің өнімі өндірілген, нақты көлем индексі – 104,5%. 1 485,0 млн. теңге инвестиция тартылған. Экспортқа 508 577 тонна ауыл шаруашылығы өнімі шығарылды, соның ішінде дәрілік шөптер, арпа мен тары да бар.
НҰРЛАН ҚҰМАР
2336 рет
көрсетілді0
пікір