- Бизнес & Қоғам
- 13 Қазан, 2022
НАН НЕГЕ ҚЫМБАТТАДЫ?
«Ас атасы – нан» дейтін халқымыздың дастарханындағы басты тағам қымбаттады. Қыркүйекте нан бағасы өткен жылдың сол айымен салыстырғанда 19,4 пайыз қымбаттаған. Әлемдегі астық экспорттаушы ірі он елдің бірінен саналатын республикамызда нан бағасының айтарлықтай қымбаттауына не себеп?
Осы ретте еліміз экономикасында астық өндірісінің атқаратын рөлі, ауыл шаруашылығын қолдауға бағытталған мемлекеттік бағдарламалардың саланың дамуына, нан өнімдерінің бағасына әсері қандай деген сұрақтарға сарапшылардың пікірлеріне сүйене отырып, жауап іздеп көрелік.
Ас атасы – нан бидай ұнынан жасалады. Адам рационындағы ең маңызды өнімдердің бірі болғандықтан, бидай тамақ өнеркәсібінде кең қолданылады. Дәнді дақылдар арасында бүкіл әлемдік өндірістің 29,1%-ы бидайдың үлесіне тиесілі. Осы тұрғыда Ұлттық банк сарапшылары өз баяндамасында атап көрсеткендей, соңғы алпыс жылда әлемдік бидай өндірісі айтарлықтай өсті. Мәселен, 1961 жылы 222 млн тонна деңгейінде болған жаһандық астық өндірісі 2020 жылы 761 млн тоннаға жетті. Осы жылдар аралығында бидай өндіру көлемі Жер шары халқының санына қарағанда біршама жылдам өсті (1,6%-ға қарағанда орташа жиынтық өсу қарқыны 2,1%). Дегенмен соңғы он жылда тұтыну қарқынды өсіп келеді. Өндірістің өсіміне жеткен тұтыну барысы әзірге қолдағы бар астық қорының жоғары деңгейімен өтелуде. Сонымен қатар 1961 жылдан бастап экспорт өндіріске қарағанда барынша жедел қарқынмен (2,7%) өсіп отыр. Бұл әлем елдері арасында сауданың серпінді дамып отырғанын білдіреді.
Жаһандық нарыққа басты астық жеткізушілер – Ресей, АҚШ, Канада, Франция, Украина, Австралия, Германия, Аргентина, Қазақстан және Польша елдері болып табылады. Әлемдік экспортта Қазақстанның орташа үлесі 2,9%-ды құрайды. Қай елдің болмасын азық-түлік қауіпсіздігінің маңызды бір негізі болғандықтан, әлемде бидайға деген сұраныс ауқымы аса зор. Барлық сұраныстың жартысы басты 15 сатып алушыға тиесілі. Оның ішінде Египет, Индонезия, Түркия, Алжир және Италия елдері негізгі астық импорттаушылар болып табылады. Бізден астық сатып алушы негізінен Орталық Азия елдері – Өзбекстан, Тәжікстан және Түрікменстан. Сондай-ақ бидай Әзірбайжан, Ауғанстан, Иран, Италия және Түркияға да экспортқа шығарылады.
Елімізде барлық егіс алқаптарының орта есеппен 61,4% бидайдың үлесіне тиесілі. 2004 жылдан бері бидай егістігінің көлемі мен гектар өнімділігі айтарлықтай өзгере қойған жоқ. Сарапшылардың пікіріне сүйенсек, астық түсімі жоғары әлемдік деңгеймен салыстырғанда бізде өнімділіктің төмен болуы ауа райының жағдайына, егістікке қажет су ресурстарының жетіспеушілігіне, өндірісте озық технологияларды пайдаланудың жеткіліксіздігі мен машина-техника паркінің ескіруіне байланысты.
Бидай өсіру, оның шығымдылығы ауа райы жағдайына өте тәуелді. Көктен тамшы тамбай, қуаңшылық болған былтырғы жылдың нәтижелері көрсеткендей, жалпы бидай жинау көлемі 17% қысқарды (11,8 млн тоннаға дейін). Өз кезегінде, бұл нан-тоқаш, макарон және ұннан жасалатын өнімдердің қымбаттауына әсер етті, дейді сарапшылар. Сонымен қатар ауыл шаруашылығын қолдауға бағытталған мемлекеттік бағдарламалардың саланың дамуына айтарлықтай әсері болмағанын да атап өтеді.
FAO деректері пандемияға дейін бидайдың бағасы салыстырмалы түрде тұрақты болғанын көрсетеді. Коронавирусқа байланысты шекаралар жабылып, елдер арасында сауда-саттық пен барыс-келістің шектелуімен қымбаттау тізбегі басталды. Оның үстіне, көптеген елдерде ұлттық экономиканы жандандыру үшін қолға алынған фискалдық ынталандыру шаралары инфляцияның бүгінгідей жеделдеуіне әкелген себептердің бірі болды. Бұл өз кезегінде өндірушілер шығынының ұлғаюына әсер етті. Биылғы ақпанда геосаяси жағдайдың шиеленісуі энергия тасымалдаушылардың қымбаттауына, сондай-ақ көлік логистикасының бұзылуына байланысты (астықты әкету үшін Украинаның Қара теңіз порттарын бұғаттау) бидай бағасының одан әрі өсуіне ықпал етті.
Бүгінгі қымбатшылыққа келсек, нан бағасы еліміздің барлық өңірінде өскен. Energyprom.kz сайтының хабарлауынша, биыл қыркүйекте нан бағасы өткен жылдың есепті айымен салыстырғанда 19,4 пайыз, тіпті облыстардың бірінде, атап айтқанда Ұлытау облысында бірден 48,3% қымбаттаған. Қара бидай мен бидай ұнынан пісірілген нан 24,7%, жоғары сұрыпты ұннан пісірілген нан 28,2%, бірінші сұрыпты ұннан пісірілген нан 14,4%, кесілген нан 28,1% қымбаттады, делінген хабарламада.
Осы ретте сейсенбідегі үкімет отырысынан кейін журналистермен кездесуде ауыл шаруашылығы министрі Ербол Қарашөкеев халық дастарханындағы басты азық – нан бағасының қымбаттауының бірнеше себебін атады. «Электр энергиясы, жинақтаушы бөлшектер, дизель отыны, коммуналдық қызметтер қымбаттап жатыр. Сондықтан 11,9 пайызға қымбаттады, жалпы бағада өсім бар. Оны статистикадан байқап отырмыз. Қаңтардан бастап бағаны тұрақтандыру үшін барлық іс-шараны қолға алып отырмыз. Жалпы, бағаның күрт көтерілуіне негіз жоқ. Өйткені ұн өткен жылмен салыстырғанда молынан өндіріліп жатыр. Биыл бізде бидай мол, орташажылдық түсімнен жоғары астық жиналды», – деді ол.
Ведомство басшысы тұрақтандыру қорына биыл миллион тонна астық жинау көзделіп отырғанын айтты. Оның 900 мың тоннасы бидай болады. Сонымен қатар Азық-түлік келісімшарт корпорациясында бар қорды ескере отырып, әлеуметтік азық-түліктің барлығының, оның ішінде әлеуметтік ұн бағасының тұрақты бақылауда болатындығын атап өтті. «Ішкі нарықта баға тұрақты. Ауыл шаруашылығы министрлігі мен Азық-түлік келісімшарт корпорациясы қаңтардан қыркүйекке дейін арзандатылған астық тоннасын 90 мың теңгеден жеткізді. Қазан айынан бастап жылдың соңына дейін өңірлер жаңа астықты өздері сатып алып жатыр. Биыл астық бағасы жылдың ортасындағы бағамен салыстырғанда біршама төмендеді. Біз 15 қыркүйектен 121 мыңнан бастап 125 мың теңгеге дейін форвардық келісім бойынша сатып алу бағасын жарияладық. Қазір аталған келісімдер негізінде астық жинау жақсы жүріп жатыр, сондықтан баға тұрақты», – деді Қарашөкеев.
Ал эспорттық нарықтарда бағаның өсуі отандық ауыл шаруашылығы тауар өндірушілері үшін тиімді болмақ. Бұл тұрғыда еліміз астық экспорты бағдарының аясын кеңейту, өнімділікті ұлғайту, саланың дамуын қолдауға бағытталған мемлекеттік бағдарламалардың тиімділігін арттыру мақсатында тиісті шаралар қарастырылуда.
Бүгінгі таңда дәнді дақылдар жинау науқаны аяқталуға жақын. Облыс әкімдіктерінің 10 қазандағы жедел деректеріне сәйкес, 15,9 млн гектар алқаптың астығы жиналған. Орташа гектар өнімділігі 13,5 центнерден айналып, бастапқы салмақта 21,6 млн тонна астық бастырылды. Биыл бітік шыққан егіннің сапасы да жақсы. Егін орағының көңіл қуантарлық нәтижелерін айта келіп, министр ішкі нарықтың диқандарымыз өсірген бидай ұнымен және өз астығымызбен толықтай қамтамасыз етілетінін, яғни бағаның тұрақты болатынын тағы бір нақтылады.
РЫМТАЙ САҒЫНБЕКОВА
3472 рет
көрсетілді0
пікір