- Білім & Ғылым
- 20 Қазан, 2022
Жастар келешегі жарқын
Осыдан айжарымдай уақыт бұрын жарияланған Мемлекет басшысының Қазақстан халқына арналған Жолдауы біраз жаңалықтарға толы болды. Алғашқы кезекте еліміздің әлеуметтік-экономикалық жай -күйіне баса назар аударып, оның ішінде көптің көкейінде жүрген медицина саласының реформаларын жүзеге асырудағы істерді нақты жоспармен атағаны бар.
Бұл жөнінде әл-Фараби атындағы Қазақ ұлттық университеті саясаттану технологиясы кафедрасының доктаранты, саясаттанушы Руслан АХМАҒАНБЕТОВ өз ойымен бөлісті.
Мемлекет басшысының Қазақстан халқына арналған Жолдауында маңыз берілген қазіргі күннің көкейтесті мәселесінің бірі – медицина саласындағы ахуал, әсіресе, елден тысқары аймақтағы тұрғындар үшін ауылдық жердегі медициналық пункттер заман талабына сай болмай тұр. Себебі, уақытында қажетті ем қабылдамаған науқастар түрлі ауруларға шалдығып, асқынып кету қаупі тағы бар. Бүгінгі күннің өзекті мәселесіне айналған аталған саланы баса айтып, болашақта заманауи медициналық пункттер мен емханалар салуды қамтамасыз етуді нақты жоспар ретінде бекітті.
Президент өз Жолдауында жас өспірімдердің болашағына алаңдаушылық білдіріп, келешектерін инвестициялауды қолға алғаны құптарлық жайт болды. Мен бұл Ахмет Байтұрсынұлының «Ұлым дейтін ұлт болмаса, ұлтым дейтін ұл қайдан болсын» деген сөзінің практикалық нұсқасы дер едім.
Бұдан өзге Жолдаудағы көптің талқысына түскен Президент пен Парламент сайлауы «Жаңа Қазақстан» құрудағы жариялылықтың бір көрінісі ретінде білінді. Бұл сайлауға түсуге ниетті топтардың дайындалуына және уақыт ресурстарын тиімді пайдалануына мүмкіндіктері жетерлік. Бұрындары «кезектен тыс сайлау кенеттен айтылып, уақыт тығыздығынан қатысуға өз кандидатурамызды ұсына алмадық», дейтін оппозиция өкілдеріне де, белгіленген талапқа сай сайлауға түсемін деген жанға да қай жағынан болсын мүмкіндіктер берілді. Енді «бақ шаба ма, бап шаба ма» дегендей, оны қараша айының соңына қарай біле жататын боламыз. Жолдаудағы тағы бір айтылған ой «Президент өкілеттігінің ұзақтығы жеті жыл, бір-ақ рет ұсынылады» деген. Бұл жеке бастың мүддесінен мемлекет мүддесі басым екенін және биліктің вертикалдығын төмендету турасында айтылған мәселе болды. Еліміз осылай бірте-бірте демократиялық бағытта дамуын жалғастыра беретінін президент алдымен өзінен бастауды жөн көргенді білдіреді. Сонымен қатар Парламент Мәжілісінің 30% жеке мандат арқылы сайланады. Бұл жекелеген тұлғалардың депутаттыққа сайлануына мүмкіндігі бар деген сөз. Өз пайымдауымша, алдағы Парламент Мәжілісінің сайлауы арқылы жаңа саяси элитаның іріктелуіне мүмкіндік туары хақ.
ГҮЛМИРА МЕРАЛИНА
13167 рет
көрсетілді0
пікір