- Аймақ тынысы
- 12 Қаңтар, 2023
Өнеркәсіп дамуында не өзгеріс бар?
Өнеркәсіп – пайдалы қазбалар мен басқа да табиғи шикізатты өндіруден бастап, өңдеуге машықтанған әрі халыққа арнап алуан түрлі тауарлар шығаратын кәсіпорындардың қызметі жолға қойылған ұлттық экономиканың маңызды бөлігі.
Индустрия және инфрақұрылымдық даму министрлігінің дерегі бойынша 2022 жылдың қаңтар-қараша аралығында өнеркәсіптегі өндіріс көлемі 2021 жылдағы кезеңмен салыстырғанда 101,4%-ға жетті. Бұл өсім өңдеу (4,2%), металлургия (3,9%), машина жасау (8,9%) жеңіл өнеркәсіп (6,9%), сондай-ақ түсті металл кендерін өндіру саласындағы (5,9%) өндіріс көлемінің ұлғаюы есебінен байқалып отыр. Сонымен бірге тау-кен өнеркәсібіндегі көрсеткіш 0,9%-ға төмендеген.
Салалық басқармалардың жұмысы қорытындыланып, алдағы жоба-жоспарлары таныстырылған жиында жеңіл өнеркәсіп, құрылыс индустриясы, түсті және қара металлургия, көмір және химия өнеркәсібі, машина жасау, арнайы экономикалық және индустриялық аймақтардың жай-күйі баяндалды. Әрбір бағытты дамыту бойынша өз ұсыныстарын айтып, биылғы жылға көзделген негізгі мақсаттарға тоқталған индустриялық даму комитетінің төрағасы Ілияс Оспанов: «Өнеркәсіптің әрбір саласының ел экономикасындағы маңызы ерекше. Кәсіпорындарымыз ішкі, сыртқы нарықта белсенді дамып, ел азаматтарын тұрақты жұмыс орындарымен қамтуда. Соған сай өз тарапымыздан қолдау көрсетіп, саланың жаңа деңгейге көтерілуіне септігімізді тигізуіміз керек», – деп атап өтті.
Автомобиль, арнайы техника және ауыл шаруашылығы машиналарын жасау басқармасының басшысы Руслан Хисамутдиновтың айтуынша, 2021 жылы ЖІӨ-дегі автоөнеркәсіп секторының үлесі 0,5 пайызды құраса, 2027 жылы бұл көрсеткішті 6,9 пайызға жеткізу көзделіп отыр. Алдағы уақытта жаңа жобаларды жүзеге асыра отырып, нарықтағы отандық авто үлесін 77 пайызға арттыру көзделген.
Ал арнайы экономикалық және индустриялық аймақтар басқармасының басшысы Алмат Досқалиевтің хабарлауынша, аймақтардың тиімділігін арттыру мақсатында бірқатар жаңашылдықтар енгізілуде. Соның ішінде АЭА қызметінің тиімділігін арттыру бойынша жол картасы әзірленгені, ол дамудың басты стратегиялық құжатқа айналып, барлық мүдделі тараптарды нақты міндеттерді шешуге жүйелендіретіні айтылды. Технологиялық күрделілігіне, жобаны іске асырудың әлеуметтік-экономикалық тиімділігіне қарай инвестициялық преференцияларды ұсынуда сараланған тәсіл қолданылады. Сондай-ақ аралас режимдегі аумақ енгізілмек.
Өткен жылы өнеркәсіпке цифрлық технологияларды енгізуге байланысты ынталандырудың тың тетіктерін қолданған Индустрия және инфрақұрылымдық даму министрлігі өнеркәсіптік-инновациялық қызмет субъектілерінің еңбек өнімділігін арттыруға септігін тигізетін іс-шараларды кеңінен жүргізуде. Өнеркәсіпке мемлекеттік ынталандыру шараларын ұсыну қағидаларына сәйкес, шығындарды өтеу Индустрия 4.0 технологияларын енгізуге және автоматтандырылған басқару жүйелерін әзірлеуге немесе қолданысқа енгізуге (оның ішінде лицензиялық бағдарламалық қамтамасыз етуді сатып алуға) беріледі. Осылайша, қазір 6 өнеркәсіптік кәсіпорын IT-шешімдерге жұмсалған шығындардың орнын толтыра алды.
Сонымен қатар министрлік сатып алынатын жабдық құнының 50% (750 млн теңгеден аспайтын) мөлшеріне дейін технологиялық жабдықты жаңғыртуға арналған өнеркәсіптік грантты ұсыну арқылы өндіріс орындарын қолдауды жалғастырып келеді. Биыл осы грантты ұсынуға республикалық бюджеттен 1,6 млрд теңге қарастырылған.
Биыл ИИДМ өнеркәсіпті қолдаудың қосымша шаралары ретінде бірқатар іс-шараларды: халықаралық тау-кен металлургия конгресін, шетелдік делегаттардың қатысуымен Қазақстан машина жасаушыларының XI форумын өткізбек. Astana Mining&Metallurgy – тау-кен индустриясындағы ауқымды іс-шаралардың бірі саналады. Жыл сайын ұйымдастырылатын жиын салааралық инвестициялық байланысты кеңейтуге, жаңа келісімшарттар жасауға және заманауи сын-қатерлерге бірлескен шешімдерді әзірлеуге әсерін тигізіп келеді. Ал Қазақстан машина жасаушылар форумында автокөлік өндірісінен бөлек, еліміздің өңдеу өнеркәсібін дамыту стратегиясы қалыптастырылып, салалық кәсіпорындарды арзан бағадағы шикізатпен қамтамасыз етудің және жергілікті қамтуды дамытудың жаңа тетіктері қарастырылады.
БОТАГӨЗ ӘБДІРЕЙҚЫЗЫ
542 рет
көрсетілді0
пікір